Capitol 4

1. Jesus, plenida con la Spirito Santa, ia reveni a la riva de la Rio Jordan e ia es conduida par la Spirito a la deserto,
2. do el ia es tentada par la demon per cuatrodes dias. El no ia come en acel dias, e pos los el ia fami.
3. La demon ia dise alora: “Si tu es la Fio de Dio, comanda esta petra a deveni pan.”
4. Ma Jesus ia responde: “La Scrivedas Santa dise: ‘La om no vive sola de pan.’”
5. A pos la demon ia porta el a un loca plu alta, el ia mostra en un momento tota la renas de la tera,
6. e el ia dise a el: “Me va dona tota esta potia e brilia de esta renas, car los ia es donada a me, e me dona los a cualcun a ci me vole.
7. Si tu proni ante me, tota de esta va parteni a tu.”
8. Ma Jesus ia responde: “Lo es scriveda: ‘Tu va adora la Senior, tua Dio, e tu va servi sola el.’”
9. A pos el ia gida el a Ieruxalim, ia fa ce el sta sur la parapeto de la templo, e ia dise a el: “Si tu es la Fio de Dio, lansa tu mesma a basa de asi,
10. car lo es scriveda: ‘El va comanda sua anjeles consernante tu, per garda tu,’
11. e: ‘Con sua manos los va suporta tu, afin tua pede no tropeza contra un petra.’”
12. Jesus ia responde a el: “Lo dise ance: ‘Tu no debe proba la Senior, tua Dio.’”
13. Pos cuando la demon ia fini ja cada tenta, el ia parti de el per un tempo.
14. Jesus ia reveni a Galilea en la potia de la Spirito, e novas de el ia estende tra tota la rejion.
15. El ia ensenia en la sinagogas e ia es lodada par totas.
16. El ia veni a Nazaret, cuando el ia adulti ja, e ia vade seguente la costum a la sinagoga en la saturdi. El ia sta per leje
17. e los ia dona a el la libro enrolada de la profeta Isaia. El ia desenrola lo e ia trova la pasaje do lo ia es scriveda:
18. “La Spirito de la Senior es sur me, car el ia unje me per trae la Bon Nova a la povres. El ia envia me per proclama libria a la caturadas e recovre la vide a la siecas, per dona libria a la opresadas,
19. e per proclama un anio asetable a la Senior.”
20. Enrolante la libro enrolada, el ia returna lo a la atendor e ia senta, e la oios de totas en la sinagoga ia regarda fisada el.
21. El ia dise a los: “Oji esta pasaje de la Scrivedas Santa cual vos veni de escuta es plenida.”
22. E totas ia atesta sua benefica e ia es stonada par la parolas de grasia cual ia sorti de sua boca. Los ia demanda ance: “Esce esta no es la fio de Josef?”
23. El ia dise a los: “Serta vos va sita esta proverbo a me: ‘Dotor, cura mesma tu’, e dise: “Fa asi en tua loca nativa la cosas cual longo la oiadas tu ia fa en Cafarnaum.”
24. E el ia dise: “Me serti vos ce no profeta es asetada en sua propre loca nativa.
25. Vera, me dise a vos, on ia ave multe viduas en Israel en la dias de Elija cuando la sielo ia es cluida per tre anios e un dui, e un fami sever ia estende tra tota la pais.
26. Elija ia es enviada a nun de los, ma sola a la vidua de Sarepta, en la pais de Sidon.
27. Denova, on ia ave multe leprosas en Israel en la tempo de la profeta Eliseo; ma nun de los ia es purida, sola Naaman la suri.”
28. Cuando la persones de la sinagoga ia escuta esta, los ia es tota plenida con furia.
29. Los ia revolta, ia espulsa el de la site, e ia porta el a la culmina de un colina sur cual lora site ia es construida, per lansa el con prima sua testa.
30. Ma el ia pasa tra la media de los e ia continua sua via.
31. Pos esta, Jesus ia vade a Cafarnaum, un site en Galilea. El ia instrui los en la saturdi,
32. e los ia es stonada par sua ensenia car el ia parla con autoria.
33. En la sinagoga on ia ave un om con la spirito de un demon nonpur, e el ia cria en vose alta,
34. “Ha! Cua tu vole de nos, Jesus de Nazaret? Esce tu ia veni per destrui nos? Me sabe ci tu es – la Santa de Dio!”
35. Jesus ia reproxa el e ia dise: “Silenti! Sorti de el!” Alora la demon ia lansa la om a basa ante los e ia sorti de el sin dana el.
36. Tota de los ia es stonada e ia dise a lunlotra: “Tal parolas! El comanda con potia e autoria a la spiritos nonpur, e los sorti!”
37. E sua fama ia estende tra tota acel rejion.
38. A pos, el ia parti de la sinagoga e ia entra en la casa de Simon. La madre par sposi de Simon ia sufri un febre sever, e los ia demanda ce Jesus aida.
39. Apoiante se sur la madre, Jesus ia reproxa la febre, e lo ia abandona el. Direta, la madre ia leva e ia comensa servi los.
40. Cuando la sera ia veni, totas ci ia ave persones malada o sufrinte maladias diversa ia trae los a el, e el ia pone sua manos sur cadun e ia sani los.
41. Demones ia sorti de multe persones, criante: “Tu es la Fio de Dio!” Ma el ia reproxa los e no ta lasa ce los parla, car los ia sabe ce el es la Maxia.
42. Cuando la matina ia veni, Jesus ia sorti e ia vade a un deserto. La fola ia comensa xerca el, e cuando los ia trova el, los ia vole reteni el afin el no parti de los.
43. Ma el ia dise a los: “Me debe ance predica la bon novas de la rena de Dio a otra sites, car per esta me ia es enviada.”
44. El ia predica en la sinagogas de Judea.