Capitol 6

1. A un saturdi, cuando Jesus ia traversa un campo de gran, sua disiplos ia es prendente la testas de gran, frotante los con sua manos, e comente los.
2. Algun de la fariseos ia dise a los: “Perce vos fa lo cual no es permeteda en saturdi?”
3. Jesus ia responde a los: “Esce vos no ia leje lo cual David ia fa cuando el e la suas ia es faminte,
4. como el ia entra en la Casa de Dio e, prendente la panes de la ofre, cual sola la pretes pote come, el ia come e ia dona a sua acompaniores per come?”
5. A pos, el ia dise a los: “La fio de la om es senior de la saturdi.”
6. A un otra saturdi, el ia entra en la sinagoga e ia comensa ensenia. On ia ave ala un om de ci sua mano destra ia es paraliseda.
7. La scrivistes e fariseos ia oserva forte Jesus per vide esce el va sani maladas en saturdi, car los ia vole trova alga cosa con cual acusa el.
8. Ma Jesus, conosente lor intendes, ia dise a la om con mano paraliseda: “Leva e sta ante nos”. El ia leva e ia sta.
9. A pos el ia dise: “Me demanda a vos: Esce lo es permeteda en saturdi, ce on fa bon o fa mal, ce on salva un vive o perde lo?”
10. E regardante totas, el ia dise a la om: “Estende tua mano.” El ia estende lo e la mano ia es intera sanida.
11. Ma los ia coleri, e ia discute entre se per vide cua los pote fa contra Jesus.
12. En acel dias, Jesus ia retira se a un monte per prea, e ia resta tra tota la note en prea con Dio.
13. Cuando la dia ia veni, el ia clama sua disiplos e ia eleje des-du de los, a ci el ia dona la nom “apostoles”:
14. Simon, ci el ia nomi Petro, Andres, sua frate, Jacobo, Joan, Felipe, Bartolome,
15. Mateo, Tomas, Jacobo, la fio de Alfeo, Simon, nomida la Estremiste[¹],
16. Judas, fio de Jacobo, e Judas Iscariote, ci ia deveni un trador.
17. E el ia desende con los e ia sta sur un plano. Ala on ia ave multe disiplos e un fola grande ci ia ariva de tota Judea, de Ieruxalim e de la rejion costal de Tiro e Sidon,
18. per escuta el e sani sua maladias. Los ci ia es tormentada par spiritos nonlimpa ia es sanida;
19. e tota la persones ia vole toca el, car un fortia cual ia sani totas ia sorti de el.
20. Alora Jesus, levante sua regarda a sua disiplos, ia dise: “Joiosa vos, la povres, car la Rena de Dio parteni a vos!
21. Joiosa vos, ci aora es faminte, car vos va es sasiada! Joiosa vos, ci plora aora, car vos va rie!
22. Joiosa vos, cuando la omes odia, esclui, insulta e proibi vos, considerante vos malfamosa par causa de la Fio de la om!
23. Es joiosa e salta con joia en acel dia, car vosa recompensa va es grande en la sielo. Car lor asendentes ia trata tal la profetas!
24. Ma, ai a vos la ricas, car vos ave ja vosa consola!
25. Ai a vos, ci es aora sasiada, car vos va fami! Ai a vos, ci rie aora, car vos va conose lamenta e larmas!
26. Ai a vos cuando totas loda vos! Tal lor padres ia trata la profetas falsa!
27. Ma me dise a vos ci escuta: Ama vosa enemis, fa bon a los ci odia vos!
28. Bondise los ci maldise vos, prea per los ci malacusa vos.
29. A el ci colpa un de vosa jenas, ofre ance la otra; a el ci prende vosa capa, no reteni ance vosa tunica de el.
30. Dona a el tota cual el demanda de vos, e a el ci prende lo cual es tua, no reclama lo de el.
31. Fa per la otras lo cual vos vole ce la omes fa per vos.
32. Se vos ama los ci ama vos, cua es vosa merita? Car an la pecores ama los ci ama los.
33. Se vos fa bon a los ci fa bon a vos, cual merita vos ave? An la pecores fa esta.
34. E si vos presta a los de ci vos espeta reseta, cual merita vos ave? Ance la pecores presta a la pecores, per reseta de los la mesma.
35. Ma, plu bon, ama vosa enemis, fa la bon e presta sin espeta alga cosa par intercambia. A pos, vosa recompensa va es grande e vos va es fios de la Plu Alta, car El mesma es bon con la nongrasiosas e la malvolentes.
36. Es pardonosa, como vosa Padre es pardonosa.
37. No judi e vos no va es judida; no condena e vos no va es condenada; pardona e vos va es pardonada.
38. Dona, e donadas va es donada a vos. Un bon mesura, presada, secuteda e suprabundante, va es versada a vosa vasto. Car la mesura con cual vos mesura va es usada ance per vos.”
39. E el ia raconta a los un parabola: “Esce un sieca pote gida un otra sieca? Esce ambos no va cade en un poso?
40. La disiplo no es superior a la mestre; cuando la disiplo ateni perfetia, el va es como la mestre.
41. Perce tu regarda la ageta en la oculo de tua frate e no vide la faxon de lenio en la tua?
42. Como tu pote dise a tua frate: “Frate, ta ce me sutrae la ageta de tua oculo”, cuando tu no vide la faxon de lenio cual tua ave en la tua? Ipocrita! Prima estrae la faxon de lenio de la tua, e a pos tu va vide clar per estrae la ageta de la tua frate.
43. No bon arbor dona mal frutas, e no mal arbor dona bon frutas:
44. car cada arbor es reconoseda par sua frutas. On no colie figos de acantos e no colie uvas de rubos.
45. La bon om produi bon cosas de la tesoro de bonia cual ave en sua cor, ma la mal om produi mal cosas de malia, car la boca dise lo cual abunda en la cor.
46. Perce vos clama a me: “Senior, Senior”, e no fa lo cual me dise a vos?
47. Me va dise como es cadun veni a me, e escuta mea parolas, e pratica los.
48. El es como un om ci, volente construi un casa, ia escava profonda e ia pone la funda sur la roca. Cuando la deluvia ia veni, la acuas ia freta con fortia contra acel casa, ma los no ia pote rompe lo, car lo ia es bon construida.
49. Ma algun ci escuta la Parola e no pratica lo, es como un om ci ia construi sua casa sur tera, sin funda. Cuando la acuas ia freta contra lo, lo ia colasa subita, e la desastre cual ia aveni a acel casa ia es grande.”

---

Capitol 6

1

…

17 18 19 E tota la multia desira toca el, car la potia estende de el, e el sani tota de los.

20 E el leva se oios a se disiplos e dise:
Bondiseda es vos ci es povre;
car la renia de Dio es de vos.
21 Bondiseda es vos ci es aora fama;
car vos va es plenida.
Bondiseda es vos ci plora aora;
car vos va rie.
22 Bondiseda es vos, cuando persones odia vos,
e cuando los separa vos de se,
e reproxa vos, e desprende vos nomes como malia,
per la benefica de la fio de umania.

23 Joia en acel dia, e salta con joia; car vide, vos recompensa es grande en la sielo; car se padres ia trata la profetas en la mesma modo.

24 Ma mal fortuna veni a vos ci es rica;
car vos ia reseta ja la vos consola.
25 Mal fortuna veni a vos ci es aora plenida;
car vos va es fame.
Mal fortuna veni a vos ci rie aora;
car vos va lamenta e plora.
26 Mal fortuna veni a vos, cuando tota persones va dise bon de vos;
car se padres ia trata la profetas falsa en la mesma modo.

27 Ma me dise a vos ci pote oia: Ama vos enemis; fa bon a los ci odia vos; 28 bondise los ci maldise vos; prea per los ci usa vos en un modo odios. 29 A el ci colpa tu a un jena, ofre ance la otra; e a el ci prende tu capa, ance no reteni tu jaca. 30 Dona a cadun ci demanda de tu; e no demanda de el ci prende tu benes ce el redona los. 31 E cual vos desira ce otras ta fa a vos, vos debe fa a los ance.

32 E si vos ama los ci ama vos, cual grasias tu espeta? An pecores ama los ci ama los. 33 E si vos fa bon a los ci fa bon a vos, cual grasias tu espeta? An pecores fa la mesma. 34 E si vos presta a los de ci vos espera reseta, cual grasias tu espeta? An pecores presta a pecores, per reseta denova la mesma. 35 Ma ama vos enemis, e fa bon a los, e prende, sin despera; e la vos recompensa va es grande, e vos va es fios de La Plu Alta, car el es compatos a la nongrasios e mal. 36 Es pardonos, como tu padre es pardonos.

37 E no judi, e vos no va es judida; e no condena, e vos no va es condenada; relasa, e vos va es relasada; 38 dona, e vos va reseta; mesura plen, presada, miscada, suprafluente, los va dona a tu peto. Car, la mesura cual tu dona va es donada denova a vos.

39 E el dise ance un parabola a los: Esce la sieca gida la sieca? Esce ambos no cade en un caveta? 40 La studente no es supra se mestre; ma cadun, cuando el es perfetida, va es como se mestre.

41 E per ce tu indica la particula en la oio de tu frate, ma no pensa de la faxon en tu oio propre? 42 O como tu pote dise a tu frate “Frate, permete ce me estrae la particula en tu oio” - cuando tu mesma no pote vide la faxon en tu oio propre? Ipocrita, estrae prima la faxon en tu oio propre, e alora tu pote vide clar per estrae la particua en la oio de tu frate.

43 Car no ave un arbor bon cual dona fruta mal; e ance no ave un arbor mal cual dona fruta bon. 44 Car alga arbor es conoseda par se fruta propre. E omes no colie figas de spinoses, e los no colie uvas de rubos. 45 La bon om, de la bon tesor de se cor, mostra la bon; e la mal om, de se tesor mal, mostra la mal; car, de la plen de se cor, se boca parla.

46 E per ce vos clamada me “Senior! Senior!” e no fa la cosas cual me dise? 47 Cadun ci veni a me, e oia me parolas, e fa los, me va mostra a vos cual el sembla: 48 El es como un om, construinte un casa, ci ia escava profunda, e ia pone un funda sur la roca; e cuando un deluvia aveni, la rieta ia colpa la casa ma no pote secute el, car el ia es bon construida. 49 Ma el ci oia e no fa es como un om ci ia construida un casa sur la tera sin un funda; e cuando la rieta ia colpa el, el ia cade pronto, e la ruina de esta casa ia es grande.

---

[¹] La estremistes ia es un grupo de iudis filastini ci ia provoca la Prima Revolta contra Roma en 66-70 ec.