Capitol 22

1. La festa de la pan nonfermentada, nomida Pascua, ia es prosima.
2. La pretes alta e la scrivistes ia xerca un modo de elimina Jesus, car los ia teme la popla.
3. Alora Satan ia entra en Judas, nomida Iscariote, ci ia es un de la Des-Du.
4. Esta ia vade a la pretes alta e la xefes de garda per discute un projeta per dona el a los.
5. Los ia joia e ia acorda dona mone a el.
6. Judas ia aseta e ia xerca un momento favorable per tradi el en asentia de la fola.
7. La dia de la festa de la pan nonfermentada ia ariva, en cual on ia debe sacrifia un vitim de pesah.
8. Jesus ia envia Petro e Joan, disente a los: “Vade prepara per nos la nesesadas per la come pascual.”
9. Los ia demanda a el: “Do tu vole ce nos prepara lo?”
10. Jesus ia responde a los: “Cuando vos vade a en la site, vos va trova un om portante un jar de acua. Segue el asta la casa do el entra,
11. e dise a la proprior: La Mestre comanda demanda a tu: “Do es la sala do me va pote come la Pesah con mea disiplos?”.
12. El va mostra a vos un camera grande en la nivel alta, cual es mobilida. Prepara ala lo cual es nesesada.
13. La disiplos ia parti, ia trova tota como Jesus ia dise a los e ia prepara la pesah.
14. Cuando la ora ia ariva, Jesus ia senta a la table con la apostoles e ia dise a los:
15. “Me ia desira zelosa come esta Pascua con vos ante mea sufri,
16. car me serti vos ce me no va come plu asta ce la Rena de Dio ariva a sua reali plen.”
17. E prendente un copa, el ia dise grasias e ia dise: “Prende e divide esta entre vos.
18. Car me serti vos ce de aora me no va bevi plu la fruta de la vite asta ce la Rena de Dio ariva.”
19. Poi el ia prende pan, ia dona grasias, ia divide lo e ia dona lo a sua disiplos, disente: “Esta es mea corpo, cual va es traeda per vos. Fa esta en recorda me.”
20. Pos la come de sera, el ia fa la mesma con la copa, disente: “Esta copa es la Alia Nova selida con mea sangue, cual versa per vos.
21. La mano de la trador es sur la table, a lado de me.
22. Car la Fio de la om vade longo la via cual ia es mostrada a el, ma ai a el ci va tradi el!”
23. Alora los ia comensa demanda a lunlotra ci de los va fa esta.
24. E un discute ia eruta sur ci on debe considera la plu grande.
25. Jesus ia dise a los: “La res de la nasiones domina supra los, e los ci ave la potia sur la popla vole es nomida beneficores.
26. Ma entre vos lo no debe es tal. En oposa, el ci es la plu grande, ta ce el ata como la plu peti; e el ci governa, como un servor.
27. Car, ci es plu grande: el ci es a table o el ci servi? Esce no el ci es a table? E, an tal, me es entre vos como el ci servi.
28. Vos es los ci resta sempre con me en media de mea probas.
29. Par esta me dona realia a vos, como mea Padre ia dona a me,
30. e en mea Rena, vos va come e bevi a mea table, e vos va senta sur tronos per judi la des-du tribus de Israel.
31. Simon, Simon, Satan ia demanda per ave autoria supra tota vos, afin el pote secute vos como trigo,
32. ma me ia prea per tu, afin la fida no manca de tu. E tu, pos tua reveni, confirma tua frates.”
33. Petro ia dise a el: “Senior, me es preparada per vade con tu a prison e per mori.”
34. Ma Jesus ia responde: “Me serti tu, Petro, ce oji, ante ce la gal canta, tu va nega a tre veses ce tu conose me.”
35. Poi el ia dise a los: “Cuando me ia envia vos sin bolsa, saco o sandales, esce alga cosa ia manca de vos?”
36. “No cosa,” los ia responde. El ia ajunta: “Ma aora el ci ave un bolsa, ta ce el porta lo; el ci ave un saco, ta ce el porta ance lo; e el ci no ave un spada, ta ce el vende sua vesti per compra un.
37. Car me serti vos ce en me la parola de la Scrivedas Santa debe reali: El ia es contada entre la males. Tota cual refere a me ariva ja a sua fini.”
38. Los ia dise a el: “Senior, on ave asi du spadas.” El ia responde a los: “Lo sufisi.”
39. Jesus ia sorti direta e ia vade a la monte de la Olivos como el ia fa usual, segueda par sua disiplos.
40. Cuando los ia ariva, el ia dise a los: “Prea, afin vos no cade en tenta.”
41. Poi el ia vade a via de los, plu o min a tal distantia como on ta pote lansa un petra, e, ajenante se, el ia prea:
42. “Padre, si tu vole, sutrae de me esta copa. Ma ta ce mea vole no es fada, ma la tua.”
43. Alora un anjel de la sielo ia apare ci ia comforta el.
44. En media de la angusa, el ia prea plu intensa, e sua suo ia es como gotas de sangue cual ia core asta la solo.
45. Pos prea, el ia leva se, ia vade do sua disiplos es e ia trova los dorminte, fatigada par tristia.
46. Jesus ia dise a los: “Perce vos dormi? Leva e prea afin vos no cade en la tenta.”
47. El ia es ancora parlante, cuando un fola gidada par el nomida Judas, un de la Des-du, ia ariva. Esta ia prosimi a Jesus per besa el.
48. Jesus ia dise a el: “Judas, con un besa tu tradi la Fio de la om?”
49. Los ci ia es con Jesus, vidente lo cual va aveni, ia demanda a el: “Senior, esce nos ta usa la spada?”
50. E un de los ia feri con sua spada la servor de la Prete Alta, cortinte de el la orea destra.
51. Ma Jesus ia dise: “Basta!” E tocante sua orea, el ia cura el.
52. Poi el ia dise a la pretes alta, a la xefes de la garda de la Templo, e a la veas ci ia veni per aresta el: “Esce me es un furor, ce vos veni con spadas e bastos?
53. Tota la dias me ia es con vos en la Templo e vos no ia aresta me. Ma esta es la ora de vos e de la potia de oscuria.”
54. Pos aresta el, los ia gida el a la casa de la Prete Alta. Petro ia segue el en la distantia.
55. Los ia ensende un foco en media de la patio, los ia senta sirca lo e Petro ia senta entre los.
56. Un servor fema, vidente Petro ala en la lus de foco, ia fisa sua regarda a el, disente: “Esta ia es ance con el.”
57. Petro ia nega el, disente: “Fem, me no conose el.”
58. Pico a pos, un otra ia vide el e ia dise: “Ance tu es un de los.” Ma Petro ia responde: “No, om, me no es.”
59. A sirca un ora plu tarda, un otra ia insiste, disente: “On ave no duta ce esta om ia es con el; plu, el es ance un galilean.”
60. “Om,” Petro ia dise, “me no sabe cua tu dise.” En acel momento, cuando el ia es ancora parlante, la gal ia canta.
61. La Senior, turnante se, ia regarda Petro. Esta ia recorda la parolas cual la Senior ia dise a el: “Oji, ante ce la gal canta, tu va nega me a tre veses.”
62. E sortinte, el ia plora amarga.
63. La omes ci ia teni Jesus ia insulta e colpa el;
64. e covrente sua fas, los ia dise a el: “Profeti, ci ia colpa tu?”
65. E los ia dise multe insultas a el.
66. A la leva de sol, la consilio de la veas de la popla ia reuni se, con la pretes alta e la scrivistes. Los ia porta Jesus ante la corte
67. e ia dise a el: “Dise a nos ce tu es la Maxia.” El ia dise a los: “Si me responde a vos, vos no va crede me,
68. e si me ta demanda a vos, vos no ta responde a me.
69. Ma de aora, la Fio de la om va senta a la destra de Dio omnipotente.”
70. Totas ia demanda: “Donce tu es la Fio de Dio?” Jesus ia responde: “Vos es coreta, me es el.”
71. Los ia dise: Esce nos nesesa un otra atesta? Nos mesma ia oia lo de sua propre boca.”