Capitol 14

1. En un saturdi, Jesus ia entra per come a la casa de un de la fariseos xef. Los ia oserva el atendosa.
2. Ante el on ia ave un om malada de edema.
3. Jesus ia demanda a la dotores de la Lege e a la fariseos: “Esce lo es permeteda ce on remedia en saturdi o no?”
4. Ma los ia silenti. Alora Jesus ia prende la mano de la malada, ia sani el e ia envia el a via.
5. E turnante a los, el ia dise a los: “Ci entre vos, si sua fio o bove cade en un poso, no ta estrae lo direta, an si lo es saturdi?”
6. Los no ia sabe responde a esta.
7. Cuando el ia nota ce la invitadas xerca la postos prima, el ia raconta a los esta parabola:
8. “Cuando tu es invitada par algun a un banceta de sposi, no pone tu en la loca prima, car lo pote aveni ce un person plu importante es invitada,
9. e cuando el ariva ci ia invita ambos, el pote prosimi e dise ‘Lasa esta posto a el’, e tal, plenida de vergonia, tu debe pone tu en la loca ultima.
10. Plu bon, cuando tu es invitada, vade e prende la loca ultima, afin, cuando el ci ia invita tu ariva, el dise a tu: ‘Ami, prosimi plu’, e tal tu va gania la respeta de tota la invitadas.
11. Car tota ci alti se va es umilida, e el ci umili se va es altida.”
12. A pos el ia dise a el ci ia invita el: “Cuando tu ospita un come media o de sera, invita no tua amis, no tua frates, no tua jenitores, no tua visinas rica, per caso ce los ta invita tu en responde, e tu ta ave tal tua recompensa.
13. Plu bon, cuando tu ospita un banceta, invita la povres, la descapasidas, la paralisedas, la siecas.
14. Joiosa tu, car los no pote repaia tu, e tal tu va ave tua recompensa en la revive de la justas!”
15. Pos oia esta parolas, un de la invitadas ia dise a el: “Joiosa es el ci va senta a la table de la Rena de Dio.”
16. Jesus ia responde a el: “Un om ia prepara un banceta grande e ia invita multe persones.
17. A la ora de la come de sera, el ia comanda sua servor a dise a sua invitadas: ‘Veni, tota es preparada.’
18. Ma totas, sin eseta, ia comensa escusa se. La prima ia dise a el: ‘Me veni de compra un campo e me debe vade per vide lo. Pardona me.’
19. La invitada du ia dise: ‘Me ia compra sinco iugos de boves e vade per proba evalua los. Pardona me.’
20. E la numero tre ia dise: ‘Me veni de sposi e donce me no pote vade.’
21. Cuando el ia reveni, la servor ia raconta tota esta a la senior de la casa. Esta, colerida, ia dise a el: ‘Vade rapida a la plazas e stradas de la site, e trae asi la povres, la maladas, la siecas e la paralisedas.’
22. La servor ia reveni e ia dise: ‘Senior, tua comandas ia es esecutada e on ave ancora spasio.’
23. La senior ia responde a el: ‘Vade a la vias e longo la sepes, e insiste a la persones ce los entra, afin mea casa es plenida.
24. Car me serti vos ce nun de los ci ia es invitada a ante va proba mea come de sera.’”
25. Un fola granbde ia vade con Jesus e el, turnante se, ia dise a los:
26. “Cualcun ci veni con me e no odia sua padre e madre, sua fem e enfantes, sua frates e sores, an sua propre vive, el no pote es mea disiplo.
27. El ci no carga se par la crus e segue me, el no pote es mea disiplo.
28. Ci de vos, si el vole construi un tore, no senta prima per calcula la spendes, per vide ce el ave sufisinte per fini lo?
29. Si no, pos pone la funda, el no pote fini, totas ci vide lo va burla el, disente:
30. “Esta ia comensa construi e no ia pote fini.”
31. E cual re, cuando el sorti per gera contra un otra, no senta prima per considera esce con des mil omes el pote fronti el ci veni contra el con dudes mil?
32. Ma si no, cuando la otra re es ancora distante, el envia un ambasada per negosia la pas.
33. En la mesma modo, cualcun de vos ci no renunsia tota cual el posese, no pote es mea disiplo.
34. Sal es un cosa eselente, ma si lo perde sua sabor, con cua sua sabor pote es restorada?
35. Lo cabe no per la tera e no per sterco: on debe dejeta lo. Ta ce cualcun oia ci ave oreas!”