Capitol 23

1. Poi tota la asembla ia sta e los ia trae el ante Pilato.
2. E los ia comensa acusa el, disente: “Nos ia trova esta om provocante nosa popla a un rebela, oposante la paia de impostas a la Imperor, e finjente es la re Maxia.”
3. Pilato ia interoga el, disente: “Esce tu es la re de la iudis?” “Tu dise lo,” Jesus ia responde.
4. Pilato ia dise a la Pretes Alta e a la fola: “Me no trova en esta om un motiva per condena.”
5. Ma los ia insiste: “El revolta la popla con sua ensenia en tota Judea. El ia comensa en Galilea e ia ariva asi.”
6. Pos oia esta, Pilato ia demanda esce acel om es galilean.
7. E pos es serta ce el parteni a la autoria de Herodes, el ia envia el a Herodes. En acel dias, ance Herodes ia es en Ieruxalim.
8. Herodes ia es multe contente par vide Jesus. El ia vole vide el de multe tempo a ante, par causa de lo cual el ia oia dise de el, e el ia espera ce el va fa alga miracle en sua presentia.
9. El ia fa multe demandas, ma Jesus no ia responde.
10. Entretempo, la pretes alta e la scrivistes ia es ala e ia acusa forte el.
11. Herodes e sua gardores, pos trata el con despeta e burla el, ia covre el con un veste merveliosa e ia envia el denova a Pilato.
12. E en acel dia, Herode e Pilato, ci ia es enemis, ia deveni amis.
13. Pilato ia reuni la pretes alta, la xefes e la popla,
14. e ia dise a los: “Vos ia trae esta om a me, acusante el de provoca la popla a rebela. Ma me ia interoga el ante vos, e me ia trova no razona per condena en la acusas cual vos fa;
15. ance no Herodes, car el ia reenvia el a esta corte. Como vos vide, esta om ia fa no cosa cual merita mori.
16. Pos puni el, me va libri el”.
17. [En cada festa, la governor ia abitua a libri un prisonida.]
18. Ma la fola ia comensa cria: “Ta ce esta om mori! Nos vole ce tu libri Barabas!”
19. Barabas ia es prisonida par causa de un rebela cual ia aveni en la site e par causa de omiside.
20. Pilato ia parla a los denova con intende de libri Jesus.
21. Ma los ia continua cria: “Crusi el! Crusi el!”.
22. A un ves tre el ia dise a los: “Cual mal esta om ia fa? Me trova en el no cosa cual merita mori. Pos puni el, me va libri el.”
23. Ma los ia insiste criante, clamante ce el ta es crusida, e la crias ia comensa fa plu violente.
24. A fini, Pilato ia deside aseta la demanda de la popla.
25. El ia libri el ci los ia demanda, ci ia es prisonida ja par rebela e omiside, e el ia trae Jesus afin los ta fa con el cualce cosa ce los vole.
26. Cuando los ia trae el, los ia deteni un om nomida Simon de Cirene ci ia reveni de la campo, e ia carga el con la crus, afin el ta porta el pos Jesus.
27. Multe persones ia segue el, e un bon cuantia de femes, colpante la peto e lamentante per el.
28. Ma Jesus, turnante a los, ia dise: “Fias de Ieruxalim! no plora per me; plu bon, plora per vos e por vosa enfantes.
29. Car la tempo prosimi en cual on va dise: “Joiosa la nonfertil, joiosa la uteros cual no ia consepi e la senos cual ia dona nunca lete!”
30. Alora lo va es diseda a la montes: “Cade sur nos!”, e a la colinas: “Covre nos!”
31. Car si vos fa esta cuando la lenio es verde, cual va aveni a la lenio seca?”
32. Con el los ia gida ance du criminores per es esecutada.
33. Cuando los ia ariva a un loca nomida “de la Cranio”, los ia crusi el con la du criminores, la un a destra, e la otra a sinistra.
34. Jesus ia dise: “Padre, pardona los, car los no sabe cua los fa.” Poi los ia divide sua vestes, rifante los entre se.
35. La popla ia resta ala e ia regarda. Sua xefes, burlante, ia dise: “ta ce el salva se mesma, si el es la Maxia de Dios, la Elejeda!”
36. Ance la soldatos ia burla el e, prosiminte per ofre vinagra,
37. ia dise a el: “Si tu es la re de la iudis, salva tu mesma!”
38. Supra sua testa on ia ave un enscrive: “Esta es la re de la iudis.”
39. Un de la criminores ia insulta el, disente: “Esce tu no es la Maxia? Salva tu mesma e ance nos.”
40. Ma la otra ia reproxa el, disente: “Esce tu no teme Dio, tu ci sufri la mesma puni como el?
41. Nos sufri justa, car nos paia per nosa culpas, ma el ia fa no mal.”
42. E el ia dise: “Jesus, recorda me cuando tu veni entra a tua Rena.”
43. El ia responde a el: “Me serti tu ce oji tu va es con me en Paradiso.”
44. Lo ia es mediadia. La sol ia eclisi e la oscuria ia covre tota la tera asta la ora tre de posmedia.
45. La cortina de la Templo ia rompe en la media.
46. Jesus, con un cria, ia esclama: “Padre, en tua manos me confida mea spirito.” E disente esta, el ia mori.
47. Cuando la senturion ia vide cua ia aveni, el ia loda Dio, esclamante: “Vera, esta om ia es justa.”
48. E la fola ci ia reuni per contempla la spetaculo, pos vide cua ia aveni, ia reveni colpante se a la peto.
49. Tota sua amis e la femes ci ia acompania el de Galilea ia resta distante, contemplante cia ia aveni.
50. Alora, un membro de la Consilio ia ariva, nomida Jose, un om reta e justa,
51. ci no ia acorda con la desides e atas de la otras. El ia es de Arimatea, un site de Judea, e el ia espeta la Rena de Dio.
52. El ia vade per vide Pilato, per demanda per la corpo de Jesus.
53. Pos desende el de la crus, el ia envolve el en un telon e ia pone el en un tomba escavada en la roca, do nun ia es enterada.
54. Lo ia es la dia de la Prepara, e la saturdi ia comensa.
55. La femes ci ia veni de Galilea con Jesus ia segue Jose, ia oserva la tomba e ia vide como el ia es enterada.
56. Poi los ia reveni e ia prepara balsames e parfumes, ma los ia reposa en la saturdi, seguente la comanda.