Capitol 18

1. Poi el ia ensenia par un parabola ce on debe prea sempre sin fatiga:
2. “En un site on ia ave un judor ci no ia teme Dio e ia iniora la opinas de la popla;
3. en la mesma site un vidua ia vive ci ia veni a el, disente a el: ‘Me suplica ce tu fa justia contra mea enemi.’
4. Tra multe tempo la judor ia refusa, ma a pos el ia dise: ‘Me no teme Dio e me iniora la opinas de la popla,
5. ma como esta vidua pesti, me fa justia a el afin el no veni constante per disturba me.’”
6. E la Senior ia dise: “Escuta lo cual esta judor nonjusta ia dise.
7. E Dio, esce el no va reali justia per sua elejedas, ci clama a el tra dia e note? Esce el va pospone los?
8. Me serti vos ce justia va es fada a los multe rapida. Ma cuando la Fio de la om veni, esce el va trova fida sur la tera?”
9. E referente se a algun ci ia es convinseda de sua propre virtuosia e ia despeta la otras, el ia dise ance esta parabola:
10. “Du omes ia asende a la Templo per prea; la un ia es un fariseo e la otra un impostor.
11. La fariseo, stante, ia prea tal: ‘Mea Dio, me grasia tu car me no es como la otra omes, ci es furores, nonjusta e adulterante; ance no como esta impostor.
12. Me juna a du veses per semana e paia la desi de mea revenu.’
13. An tal, la impostor, manteninte sua distantia, no ia leva la oios a la sielo, ma el ia colpa sua peto, disente: ‘Mea Dio, compatia me, ci es un pecor!’
14. Me serti vos ce esta ia reveni a sua casa escusada, ma no acel. Car totas ci alti se va es umilida, e los ci umili se va es altida”.
15. Ance los ia presenta enfantes peti a el, afin el toca los; ma cuando los ia vide esta, la disiplos ia reproxa los.
16. Alora Jesus ia comanda ce los es clamada e ia dise: “Permete ce la enfantes prosimi a me e no impedi lo, car la Rena de Dio parteni a los ci es como los.
17. Me serti vos ce el ci no reseta la Rena de Dio como un enfante, no va entra en lo.”
18. Un om importante ia demanda a el: “Bon mestre, cua me debe fa per erita la vive eterna?”
19. Jesus ia dise a el: “Perce tu nomi me bon? Sola Dio es bon.
20. Tu conose la comandas: No adultera, no mata, no fura, no dona atestas falsa, onora tua padre e tua madre.”
21. La om ia responde: “Me ia reali estas de mea jovenia.”
22. Pos escuta esta, Jesus ia dise a el: “Un cosa manca ancora de tu: vende tota cual tu ave e distribui lo entre la povres, e tu va ave un tesoro en la sielo. Poi veni e segue me.”
23. Pos oia esta parolas, la om ia tristi, car el ia es multe rica.
24. Vidente el tal, Jesus ia dise: “La entra a la Rena de Dio va es tan difisil per la ricas!
25. Si, lo es plu fasil ce un camel pasa tra la oio de un ago, ca ce un rica entra a la Rena de Dio.”
26. Los ci ia escuta ia dise: “Ma alora, ci va pote salva se?”
27. Jesus ia responde: “Lo cual es nonposible per la omes, es posible per Dio.”
28. Pedro ia dise a el: “Nos ia lasa tota cual nos ia ave e nos ia segue tu.”
29. Jesus ia responde: “Me serti vos ce el ci ia lasa sua casa, sposa, frates, padres o enfantes per la Rena de Dio,
30. va reseta multe plu en acel mundo; e en la mundo futur el va reseta la vive eterna.”
31. Poi Jesus ia prende la Desdu a lado, e ia dise a los: “Aora nos asende a Ieruxalim, do tota va es realida cual la profetas ia anunsia sur la Fio de la om.
32. El va es donada a la paganes, los va burla el, los va insulta el, los va sputa a el
33. e, pos flajeli el, los va mata el. Ma a la dia tre el va revive.”
34. Los ia comprende no cosa de tota esta; la sinifia ia resta ascondeda de los e los no ia susede comprende lo cual el dise.
35. Cuando el ia prosimi a Jerico, un sieca ia es sentante a lado de la via, solisitante carita.
36. Cuando el ia oia ce multe persones es pasante, el ia demanda cua aveni.
37. Los ia responde a el ce Jesus de Nazaret es pasante.
38. La sieca ia comensa cria: “Jesus, Fio de David, compatia me!”
39. Los ci ia vade a ante ia reproxa el a silenti, ma el ia cria plu forte: “Fio de David, compatia me!”
40. Jesus ia para e ia comanda los a trae el. Cuando el ia es prosima, Jesus ia demanda:
41. “Tu vole ce me fa cua per tu?” “Senior, ta ce me vide denova.”
42. E Jesus ia dise: “Regania tua vide, tua fida ia salva tu.”
43. En acel momento, la sieca ia regania sua vide e ia segue Jesus, glorinte Dio. Pos vide esta, tota la popla ia loda Dio.