Capitol 10

1. Pos esta la Senior ia nomi setedes-du otras, e el ia envia los en grupos de du afin los presede el en tota la sites e locas do el ia debe vade.
2. E el ia dise a los: “La recolie es abundante, ma la laborores es poca. Demanda a la proprior de la recolie ce el envia laborores per la recolie.
3. Vade! Me envia vos como oveas a media de lupos.
4. Porta con vos no mone, no saco de sela, no covrepede, e no para per saluta cualcun en via.
5. Cuando vos entra a un casa, dise prima: ‘Ta ce la pas desende sur esta casa!’
6. E si on ave ala algun pasosa, acel pas va reposa sur el; ma si no, lo va reveni a vos.
7. Resta en acel casa, comente e bevinte lo cual es ofreda a vos, car el ci labora merita sua salario. No vade de un casa a un otra.
8. En la sites do vos entra e es resetada, come lo cual es donada a vos;
9. sani la maladas e dise a la popla: ‘La Rena de Dio es prosima a vos.’
10. Ma en la sites do vos entra e no es resetada, sorti a la plazas e dise:
11. An la polvo de esta site cual ia adere a nosa pedes, nos secute lo como averti a vos! Sabe, an tal, ce la Rena de Dio es prosima.
12. Me serti vos ce en acel Dia, Sodoma va es tratada con min severia ca acel site.
13. Ai de tu, Corozain! Ai de tu, Betsaida! Car si la atas potiosa fada en tua media ia es fada en Tiro e Sidon, los ta repenti a multe tempo a ante, sentante en juta e senes.
14. Par esta Tiro e Sidon, en la dia de la Judi, va es tratada plu bon ca vos.
15. E tu, Cafarnaum, esce tu crede ce tu va es altida a la sielo? No, tu va desende a la enferno.
16. El ci escuta vos, escuta me; el ci rejeta vos, rejeta me; e el ci rejeta me, rejeta el ci ia envia me.”
17. La setedes-du ia reveni e ia dise joiosa: “Senior, an la demones sede ante nos en tua Nom.”
18. El ia dise a los: “Me ia vide Satan cadente de la sielo como un lampo.
19. Me ia dona a vos la potia de pasea sur serpentes e scorpiones e per vinse tota la forsas de la enemi; e no cosa va pote dana vos.
20. No es joiosa, an tal, cuando la spiritos sede ante vos; es joiosa car vosa nomes es scriveda en la sielo.”
21. En acel momento Jesus ia joia en la Spirito Santa, e ia dise: “Me loda tu, Padre, Senior de la sielo e de la tera, per asconde esta cosas de la sajas e la cautas e per revela los a la petis. Si, Padre, car tu ia vole lo tal.
22. Tota ia es donada a me par mea Padre, e nun sabe ci es la Fio, estra la Padre, como nun sabe ci es la Padre, estra la Fio e el a ci la Fio vole revela lo.”
23. A pos, turnante se a sua disiplos, Jesus ia dise sola a los: “Joiosa es la oios cual vide lo cual vos vide!
24. Me serti vos ce multe profetas e res ia vole vide lo cual vos vide e no ia vide lo, oia lo cual vos oia e no ia oia lo!”
25. E a pos, un dotor de la Lege ia leva e ia demanda per proba el: “Mestre, cua me debe fa per erita la Vive eterna?”
26. Jesus ia demanda a el: “Cua es scriveda en la Lege? Cua tu leje en lo?”
27. El ia responde: “Tu va ama la Senior, tua Dio, con tota tua cor, con tota tua alma, con tota tua forsas, e con tota tua spirito, e tua visina como tu mesma.”
28. “Tu ia responde esata,” Jesus ia dise a el; “ata tal e tu va ateni la vive.”
29. Ma la dotor de la Lege, per justi sua interveni, ia demanda a el: “E ci es mea visina?”
30. Jesus ia responde: “Un om ia desende de Ieruxalim a Jerico e ia cade en la manos de furores, ci ia nudi el, ia feri el e ia vade a via, lasante el partal morida.
31. Par coaveni un prete ia pasa longo la mesma via: el ia vide el e ia continua sua via.
32. Ance un levita ia pasa ala: el ia vide el, e ia continua sua via.
33. Ma un samarian ci ia viaja ala, cuando el ia pasa a sua lado, ia vide el, e ia es emosiada con compatia.
34. Alora el ia prosimi e ia covre sua feris con olio e vino e ia pone un bandaje sur los; a pos, el ia pone el sur sua propre animal, ia condui el a un otel e ia sani el.
35. A la dia seguente, el ia prende du denares e ia dona los a la proprior de la otel, disente: “Sani el, e cualce cosa cual tu spende, me va paia lo cuando me reveni.”
36. En tua opina, cual de la tre ia ata como visina de la vitim de la furores?”
37. “El ci ave compatia de el,” la dotor ia responde. E Jesus ia dise: “Vade e ata en la mesma modo.”
38. En cuando los ia es paseante, Jesus ia entra a un vileta, e un fem nomida Marta ia bonveni el en sua casa.
39. El ia ave un sore nomida Maria ci, sentante a la pedes de la Senior, ia escuta sua Parola.
40. Marta, ci ia es multe ocupada con la taxes de la casa, ia dise a Jesus: “Senior, esce tu no cura ce mea sore lasa me solitar con tota la labora? Dise ce el ta aida me.”
41. Ma la Senior ia responde a el: “Marta, Marta, tu es ansiosa e preocupada per multe cosas,
42. e, an tal, poca cosas es nesesada, o plu bon, sola un. Maria ia eleje la plu bon, e lo no va es prendeda de el.”