Capitol 24

1. La dia prima de la semana, a la leva de sol, la femes ia vade a la tomba con la parfumes cual los ia prepara.
2. Los ia trova moveda la petra de la tomba
3. e ia entra, ma los no ia trova la corpo de la Senior Jesus.
4. Cuando los ia es confondeda par esta, du omes con vestes briliante ia apare a los.
5. Car la femes, plenida con teme, no ia osa leva la oios de la solo, la omes ia demanda a los: “Perce vos xerca entre la mores el ci es vivente?”
6. El no es asi, el ia revive. Recorda lo cual el ia dise a vos cuando el ia es ancora en Galilea:
7. “Lo es nesesada ce la Fio de la Om es traeda en manos de la pecores, ce el es crusida e revive a la dia tre.”
8. E la femes ia recorda sua parolas.
9. Cuando los ia reveni de la tomba, los ia dise esta a la Des-Un e a tota la otras.
10. Los ia es Maria de Magadala, Joana e Maria, la madre de Jacobo, e la otra femes ci ia acompania los. Los ia raconta tota a la Apostoles,
11. ma estas ia crede ce los parla deliriosa e no ia crede los.
12. Pedro, an tal, ia leva e ia core a la tomba, e cuando el ia ajena se, el ia vide la vestes de entera. Alora el ia reveni plenida par amira per lo cual ia aveni.
13. En acel mesma dia, du de la disiplos ia vade a un vileta nomida Emaus, situada a des cilometres de Ieruxalim.
14. En via, los ia parla sur lo cual ia aveni.
15. Cuando los ia es conversante e discutente, Jesus mesma ia prosimi e ia continua pasea con los.
16. Ma alga cosa ia impedi sua oios de reconose el.
17. El ia dise a los: “Cua vos discute sur la via?” Los ia sta, con fas triste,
18. e un de los, nomida Cleofas, ia responde: “Tu es la sola stranjer en Ieruxalim ci no sabe cua ia aveni en esta dias!”
19. “Cua?” el ia demanda a los. Los ia responde: “A tema de Jesus, la nazarenan, ci ia es un profeta potiosa de obra e parola ante Dio e tota la popla,
20. e como nosa pretes alta e nosa xefes ia trae el per es condenada a mori e ia crusi el.
21. Nos ia espeta ce el es el ci va libri Israel. Ma esta es ja la dia tre pos la aveni de esta cosas.
22. Lo es vera ce alga femes ci es con nos ia disturba nos: los ia vade a leva de sol a la tomba
23. e pos no trova la corpo de Jesus, los ia reveni disente ce alga anjeles ia apare a los, sertinte los ce el vive.
24. Algas de los con nos ia vade a la tomba e ia trova tota como la femes ia dise. Ma los no ia vide el.”
25. Jesus ia dise a los: “Omes fol, lo es tan difisil ce vos crede lo cual la profetas ia anunsia!
26. Esce la Maxia no ia debe sufri tota acel cosas per entra a sua gloria?”
27. E comensante per Moxe e continuante en tota la Scrivedas Santa, el ia esplica a los lo cual refere a el.
28. Cuando los ia ariva prosima a la vileta, Jesus ia comensa continua plu.
29. Ma los ia insiste: “Resta con nos, car lo es ja tarda e la dia fini”. El ia entra e ia resta con los.
30. E esente a table, el ia prende la pan, ia pronunsia la bondise; poi el ia divide lo e ia dona lo a los.
31. Alora la oios de la disiplos ia abri e los ia reconose el, ma el ia desapare e los no ia pote plu vide el.
32. E los ia dise a se: “Esce nosa cor no ia arde, en cuando el ia parla con nos sur la via e ia esplica a nos la Scrivedas Santa?”
33. E en acel mesma momento, los ia comensa pasea e ia reveni a Ieruxalim. Ala los ia trova la Des-du reunida, e la otras ci ia asembla con los,
34. disente a los: “Lo es vera, la Senior ia revive e ia apare a Simon!”
35. Los ia nara lo cual ia aveni a los sur la via e como los ia reconose el cuando el ia divide la pan.
36. Los ia parla ancora sur esta, cuando Jesus ia apare en media de los e ia dise a los: “Ta ce la pas es con vos.”
37. Stonada e plen de teme, los ia crede vide un fantasma,
38. ma Jesus ia demanda a los: “Perce vos es turbada e vos ave dutas?
39. Regarda mea manos e pedes, estas es me mesma. Toca me e vide. Un fantasma ave no carne, no osos, como vos vide ce me ave los.”
40. E disente esta, el ia mostra sua manos e pedes a los.
41. La joia e amira de la disiplos ia es tan multe, ce los ancora no ia crede. Ma Jesus ia demanda a los: “Esce vos ave asi alga cosa per come?”
42. Los ia porta a el un peso de pex grilida;
43. el ia prende lo e ia come lo ante totas.
44. Poi el ia dise a los: “Cuando me ia es ancora con vos, me ia dise a vos: ‘Lo es nesesada ce tota scriveda sur me en la Lege de Moxe, en la Profetas e en la Salmos es realida.’”
45. Alora el ia abri lor mentes afin los pote comprende la Scrivedas Santa,
46. e el ia ajunta: “Lo es scriveda tal: la Maxia ia debe sufri e revive de entre la mores a la dia tre,
47. e comensante a Ieruxalim, la converti per la pardona de la pecas va es predicada en sua nom a tota la nasiones.
48. Vos es atestores de tota esta.
49. E me va envia a vos lo cual mea Padre ia promete. Resta en la site, asta ce vos es revestida con la fortia cual veni de la altia.”
50. Poi Jesus ia gida los prosima a Betania, e levante sua manos, ia bondise los.
51. En cuando el ia bondise los, el ia separa de los e ia es levada a la sielo.
52. La disiplos, ci ia ajena ante el, ia reveni a Ieruxalim con joia,
53. e los ia resta continuante en la Templo, lodante Dio.