Capitol 7

1. Cuando Jesus ia fini dise tota esta cosas a la popla, el ia entra en Cafarnaum.
2. Ala on ia ave un senturion ci ia ave un servor malada, a punto de mori, ci el ia ama multe.
3. Car el ia oia parla de Jesus, el ia envia a un iudi vea per solisita ce el veni per sani sua servor.
4. Cuando los ia es prosima a Jesus, los ia suplica insistente, disente: “El merita ce tu fa esta per el,
5. car el ama nosa nasion e ia construi nosa sinagoga”.
6. Jesus ia vade con los e, cuando el ia es prosima a la casa, la senturion ia envia alga amis per dise: “Senior, no disturba tu, car me no merita ce tu entra a en mea casa;
7. par esta causa me no ia considera me como meritante vade per mesma vide tu. Lo sufisi ce tu dise la parola e mea servor va sani.
8. Car me mesma es un ofisior su autoria, con soldatos su mea comanda). E cuando me dise a un: ‘Vade’, el vade; e a otra: ‘Veni’, el veni; e cuando me dise a mea servor: ‘Tu debe fa esta!’, el fa lo.”
9. Cuando Jesus ia escuta esta parolas, el ia es stonada par el, e turnante se a la fola ci ia segue el, el ia dise: “Me serti vos ce an no en Israel me ia trova tan multe fida.”
10. Cuando la enviadas ia reveni a la casa, los ia trova la servor completa sanida.
11. Subita, Jesus ia dirije se a un site nomida Naim, acompaniada par sua disiplos e par un fola grande.
12. Cuando el ia prosimi a la porte de la site, on ia porta per entera la fio unica de un fem vidua, e multe persones de la loca ia acompania el.
13. Pos vide el, la Senior ia compatia el e ia dise: “No plora.”
14. Poi el ia prosimi e ia toca la caxon funeral. Los ci ia porta el ia para e Jesus ia dise: “Joven, me comanda tu, leva te.”
15. La mor ia senta e ia comensa parla. E Jesus ia dona el a sua madre.
16. Totas ia resta plenida par teme e ia loda Dio, disente: “Un profeta grande ia apare en media de nos e Dio ia visita sua popla.”
17. La rumor de lo cual Jesus ia veni de fa ia estende tra tota Judea e en tota la rejion visina.
18. Joan ia es informada sur tota esta par sua disiplos e, clamante du de los,
19. el ia envia los per dise a la Senior: “Esce tu es el ci debe veni o nos debe espeta un otra?”
20. Cuando los ia veni ante el, los ia dise: “Joan la Batiste envia nos per demanda a tu: ‘Esce tu es el ci debe veni o nos debe espeta un otra?”
21. A acel mesma ora, Jesus ia sani multe persones de sua maladias, doles e spiritos malvolente, e el ia restora la vide a multe siecas.
22. Alora el ia responde a la enviadas: “Vade per dise a Joan lo cual vos ia vide e oia: la siecas vide, la paralisedas pasea, la leprosas es purida e la sordas oia, la mores revive, la Bon Nova es anunsiada a la povres.
23. E bondiseda es cadun ci no es ofendeda par me.”
24. Cuando la enviadas de Joan ia parti, Jesus ia comensa parla sur Joan a la fola, disente: “Vos ia sorti per vide cua en la deserto? Un cana osilante en la venta?
25. Vos ia sorti per vide cua? Un om vestida en vestes amirable? Los ci vesti lusosa se e vive en ricia es en la palasios de la res.
26. Donce vos ia sorti per vide cua? Un profeta? Si, me dise a vos, e plu ca un profeta.
27. El es acel sur ci on ia scrive: Me envia mea mesajor ante tu per prepara la via a tu.
28. Me serti vos ce on ave no om plu grande ca Joan, e an tal, la plu peti en la Rena de Dio es plu grande ca el.
29. Tota la popla ci ia escuta el, an la impostores, ia reconose la justia de Dio, resetante la batiza de Joan.
30. Ma la fariseos e la dotores de la Lege, ci no ia es batizada par el, ia rejeta la intende de Dio per los.
31. “Con ci me pote compara la omes de esta jenera? Ci los sembla?
32. Los sembla la xicos ci senta en la venderia e dise a lunlotra: ‘Nos ia jua la flauta per vos, e vos no ia dansa! Nos ia canta un lamenta, e vos no ia plora!’
33. Car Joan la Batiste ia veni, no comente pan e no bevinte vino, e vos dise: ‘El es poseseda par un demon.’
34. La Fio de la om ia veni, comente e bevinte, e vos dise: ‘El es un gloton e un enebriada, un ami de impostores e pecores.’
35. Ma la Sajia ia es reconoseda como justa par tota sua enfantes.”
36. Un fariseo ia invita Jesus a come con el. Jesus ia entra a la casa e ia senta a la table.
37. Alora un fem pecosa ci ia vive en la site, pos sabe ce Jesus come en la casa de la fariseo, ia presenta se con un botela de unjente.
38. E, locante se pos el, el ia comensa plora a sua pedes, e ia comensa bani los con sua larmas; el ia seci los con sua capeles, ia covre los con besas e ia unje los con parfum.
39. Pos vide esta, la fariseo ci ia invita el ia pensa: “Si esta om ta es profeta, el ta sabe ci es la fem ci toca el e lo cual el es: un pecor!”
40. Ma Jesus ia dise el: “Simon, me ave alga cosa per dise a tu.” “Dise a me, Mestre!” el ia responde.
41. “Un creditor ia ave du detores: un ia deta sincosento denarios a el; la otra, sincodes.
42. Car los ia ave no cosa con cual los ta paia el, el ia pardona la deta a ambos. Cual de los va ama el plu?”
43. Simon ia responde: “Me pensa el a ci la deta plu grande ia es pardonada. Jesus ia dise: “Tu judi bon.”
44. E turnante a la fem, el ia dise a Simon: “Esce tu vide esta fem? Me ia entra a tua casa e tu no ia versa acua sur mea pedes; an tal, el ia bani los con larmas e ia seci los con sua capeles.
45. Tu no ia besa me; el, an tal, de cuando me ia entra, no ia sesa besa mea pedes.
46. Tu no ia unje mea testa; el ia versa parfum sur mea pedes.
47. Par esta causa me dise ce sua pecas, sua multe pecas, es pardonada car el ia mostra multe ama. Ma el a ci poca es pardonada, mostra poca ama”.
48. Poi el ia dise a la fem: “Tua pecas es pardonada.”
49. La invitadas ia pensa: “Ci es esta om ci pardona an pecas?”
50. Ma Jesus ia dise a la fem: “Tua fida ia salva tu. Vade en pas.”