9
Me ia xerca respondes a mea demanda xef, prima en la pila de leteras de la manejor — e abitor presedente — de la otel, sin ce me ta pote trova cualce aida. Serta, los parla de la jeografia interna de la isola, ma indica nunca sua situa en relata con la mundo conoseda. Cisa, sabente sua forma global, me ta pote retrova lo sur un mapa jeneral? A contra, alga cursos en la isola es bastante detaliada tal ce me ta pote visita la isola con plu fida, a alga dia prosima.
Poi, me ia atenta xerca en la libros de AK cualce indica, car me ia espera ce, en la studias sur la magnetica o la flues de mar, alga revela noncomun ta pote esplica como on pote ariva en esta loca isolida tota nonconoseda par la comunia siensal. Alga ipoteses ia veni a me, cual me ta debe esamina plu seria, con la evalua de la angulo del sol relatada a la orizon. (Lo va es pico laborosa, me teme.)
Consernante la conca de petra, en un otra obra de AK, Fonurjia nova1, mea leje sur la sonas e la resonas natural ia es un lumina, plu cuando me ia vide, entre la desinias cuantiosa de esta volumes, plur desinias de spirales simil a acel de la conca. Plu, la descrive de la produi natural de sonas es relatada con la studias de la prete sur la jeneradores automata de sonas. Ma como la descovre de la petra ia aveni?
La esplorores antica de la isola ia trova, cisa, alga cava con cualias rara de resona, tal ce la eco de cada sona produida ala refleta se longa sur la parietes. Me recorda esta parolas, cual me ia leje en la notas de la manejor:
En mea letera presedente, me ia parla a tu de mea intendes. U ala, me ia inisia la esplora de L.! La isola ave la vantaje de loca santerias cui esiste es descriveda en la libros disponable asi. Me ia susede descovre un tal santeria. E sin duta, acel no es la sola! Me divina ce la isola debe inclui otras… Ma cuanto? Probable, los es ascondeda en locas difisil asedable. Ma, a tre dias ante oji, pos ce me ia lasa un curso streta per entra en la cor del montes, me ia descovre un lago secreta, con un plataforma paveda par vasta petras plana a sua riva.
Nondistante, su un covre vejetal densa, me distingui e desveli pronto un entra discreta, marcada con alga leteras gravada sur la clave de arco, multe erodeda. Tu divina mea emosia. Me penetra en la cava, me escuta… La locas, escavada en la roca, resona con un trama sonante singular. On ta pote dise… Si! me osa dise: vivente! Penetra en la vibra de acel locas es un esperia turbante, supranatural. Los ci, como me, ia ave esta oportunia nonestimable, sabe ce acel locas es un enigma vera. Do lor vibras misteriosa veni? La petra de la parietes deteni un secreta: si on covre un paper, poneda sur la solo rocosa, con un pico de arena fina, acel vade a formi pronto coronas consentral, imajes de vibras local. La esperia es stonante. Me ta gusta analise la tinjes e tramas de acel sonas. Ma como analise la efeto sur la spirito?
Direta cuando on entra en la santeria, on senti un vacuia mental noncomun resetosa. A mea lado, me ia sensa ce me afonda en un marania de flues diversa cual ia trae me multe distante… asta la instante presente mesma! Lo es un sensa de fusa del alma e del arte — me ta dise la esperia direta de lo cual la alcimicistes nomi “la arte grande”…
∴
Entre la folios, la desinias presisa de la curso tra la isola segue direta acel letera e lisca entre mea ditos. Cuanto usosa los va es per me! Car me intende dirije mea pasos en la interna de la isola e descovre la locas descriveda ala. La lago secreta, la cava santa, la naos2, la roca cantante… Cisa, los es la loca mesma do la conca de petra vade a es reponeda.
∴