PRELUDE
Sur la isola, 10 febrero ****.
Mea ami dulse,
Me no oblida. Me oblida nunca. Oji, a esta dia de tua aniversario, me envia mea bon desiras a tua adirije ultima conoseda. Esce tu va reseta los?
Strana, a esta matina, tu ia ta trova me a borda de la ondas, envolveda en mea mente, en esta imaje: tu, stante sur nosa plaia, escutante atendosa la musica de la mar en la conca cual tu ia colie ala. Me ia es restante en esta posa, vagante sur la ondas de mea memoria…
Tal, me senti ancora la alma de nosa locas antica… Acel alma tu ia es, longa a ante, tan longa ante oji, tan a via de asi. E me vaga, loco ci no ia sabe entra en tua mundo.
Ance me pone un conca sur mea orea: cisa, me va oia la musica de tua vose?
∴
Me crede ce me es la sola abitor de esta otel cual me ia trova nondistante de la molo do me ia desembarca. Esta isola pare abandonada par la mundo. Me teme ce, si, en la intende de visita la interna de la isola, me penetra en la foresta densa, strana tropical, a lado de la cason, e si me perde me, nun va veni per xerca me, nunca…