3

Cuando me entra en la nartex de la eglesa, me vide sola un spasio vasta, plenida par un nube misteriosa e envolveda par parfumes de insenso. Un insensador grande penduli lenta, al fondo, ante la iconostasio. Ultra la silentia, me ta crede oia alga zumbi debil.

Me pasea plu, traversante tota la nave. La sona pare veni de distante, rebondinte sur la apside, de tal modo ce lo ta pote veni de cualce parte. Al punto la plu alta de la sielo de la apside, la forma ronda de un crus serifida atrae me como un sinia ; gidada par la sona, me pasa la iconostasio e ariva a la sintrono, un spesie de scalera de bancas. Me apoia mea mano contra lo : tota la sintrono es vibrante —, e me mesma, sensante acel vibra, me comensa senti strana. Me recorda ce, a alga veses, su la sintrono, en la arciteta paleocristian, on ave un coredor suteran, un supasaje cual segue la mur de la apside. E, en efeto, la sona veni de ala.

Me no va detalia — e me no desira fa lo — como me ia susede trova la asede, ma me va dise sola ce, final, me ia entra en un coredor semi-oscur, desendente su la nivel xef de la eglesa, a dirije de la vibra. Me no ia avansa plu, car, en la cripta visina, du persones es discutente: la pope Atanasios e la compror de la conca, me divina. Me resta ascondeda, con intende de no es descovreda. An con la resona forte causada par la modulas de la vibra, me distingui, a veses, partes de la discute.

« En efeto, esta es vera stonante », un de los dise. « Nos teni la petra, sin duta! Lo sona bela ancora. E lo coresponde a la descrive par padre Kircher.

— Esata », la otra responde. « Tra sentenios lo ia es protejeda en la isoleta. Fa cua? Conserva lo asi? Retrae lo?

— La santeria ia es privada de lo per tro longa. Vide la resulta! Ta ce nos retrae la petra, ce nos reloca lo a la cor del arca. La planetas no pote turna sin la sol.

— E si lo ta es furada a un ves nova? Si lo es vendeda como un anticalia bruta? »

La padre Atanasios leva sua mano e dise, forte fidosa:

« Me es serta ce la furor conserva per se mesma la secreta de la loca. Me va retrova el. A Valeta, en Malta, me ia vide el. Me va reconose el. Me es serta.

— Tu ia vide el ja, tu dise?

— Tra mea resta ala, a alga tempo ante oji, me ia es pasante multe oras en la sala de leje, la lectorium de la biblioteca nasional de la site, xercante informas cual Kircher ia ta cade sur nosa isola. Ala, a prima, me ia vide nosa furor. E ala, me no duta, el ia vide me. Cisa el ia oia me demandante la titulos de la documentos.

« En la volumes de la Studia Kircheriana, evidente, me ia descovre la studias de Kircher sur la magnetica, la matematica, la acustica, la musica, spesial sur la construi de strumentos automata. An el ia atenta construi un lingua universal. Coavenis acaso?

« Plu, en 1636, Kircher ia vade a Malta per studia la flues de mar, la volcanes e la tremateras. El ia viaja par mar, spesial entre Sisilia e Malta. Me no duta: acel studias ia gida el a la isola, car la cosas de cual Kircher parla esiste sur nosa isola.

« An tal, la isola es aora tota nonconoseda par la mundo, e sua santerias de la edas antica ta debe es retenida secur ala ; plu, los es ascondeda en la locas la plu nonasedable de la isola. Como la furor ia ta pote trova los? O el ia segue indicas trovada en la obras de Kircher. O el ia segue me. O ambos.

« Sortinte de la biblioteca, me ia nota, a veses, acel om stante, apoiante sua dorso a un colona de arcada en la plaza grande. Esce el ia es espetante per segue me? Per alga tempo, me ia oserva el, e a interna e a esterna de la biblioteca. Me va retrova el e convinse el. Nos va converti el.

— Multe bon. Nos va retrae la petra. Pronto cuando La Crus del Sude ariva a la molo, nos embarca. »