18

Minos estrae la conca de petra de sua bolson e prosimi lo a la rota.

« Ma… me no vide cualce macina cual va jira la rota e la petra. An tal, me sabe ce lo es nesesada… como nos va fa?

— Tu xerca un motor per jira la rota? Me comprende tua surprende; ma la cosa ancora plu surprendente es… ce la motor es ja en tua manos!

— Ma, como lo es posible? Lo es sola un petra!

— No oblida: acel petra es la cor cual tu va pone asi, en la peto de la sistem », Atanasios esplica. « Lo es como la sol a media de la planetas. Tu mesma ia dise: “La planetas no pote turna sin la sol.” Plu esata, la petra, solitar, no es la motor, ma mera un parte nesesada de lo; en fato, la motor es la sistem intera. La cor sin la peto — o la peto sin la cor — es un caos futil. Ma, como tu sabe, la ordina veni de la caos, per dise ce la elementos sola no sufisi, e ce la modo de es ajustada a lunlotra es importante. E comprende ce un cosa xef manca per maneja acel… la mano divin! Sin lo, no cosa funsiona.

— Do es la mano divin, aora?

— En esta momento, lo es en tua propre mano! » Atanasios dise, riente. « Alora vade, vade, mano divin, e porta la cor sacra a en sua arca, cual es esata asi », el declama, mostrante con sua dito la loca presisa do la petra debe es poneda. « Lo es la rituo la plu sacra: me gida tu a la arca de dio — en latina, te ago in arca dei¹. Esta invita es ascondeda en la enscrive Et in Arcadia ego. Do tu ia desifri ja esta frase, o Minos? »

En cuando Minos xerca en sua mente, me deside aida el:

« Esce lo no remente tu de un depinta famosa, La pastores de Arcadia, de Nicolas Poussin?

— Serta! » Minos dise final, pos un momento de introspeta. « Me recorda: me ia desifri acel enscrive gravada sur un tomba, si me no era.

— E tu no era, en efeto. Ma, ultima, tu conose de aora la sinifia vera de esta frase. »

Si on visita la interna de la rota, on trova prima en la macina oto sferas de petra pesante, liada uniforma sirca la ase como oto pendulos cui moves conserva la ecuilibra global a cada posa de la rota. Cada pendulo maneja un lever en forma de gama con un pede traversal cuasi como la letera elinica major Γ, nomida simil!

A interna de la rota, a media de sua altia e a destra de sua ase, un caxa silindre de lenio lejera es suportada e mantenida a esta loca — a sinistra par la ase sentral de la rota, a basa e a destra par la fini de tre pedes. La oto sferas de petra, pendulin, maneja la gamas con pedes cui orteos leva la caxa ronda, preveninte ce lo vade a via o cade plu a basa.

Par un corea de cuoro, on colie la forte developada sur la leveres par la pesa asemblada de la sferas. Tal, cada sfera contribui egal a suporta e manteni la caxa silindre en cuando la rota jira.

Par mano, Atanasios move pico a pico la rota, grado pos grado: cada pendulo de petra, par causa de sua lia duple, ajusta cada lever a cada posa nova, conservante la ecuilibra jeneral, tra la jira completa de la rota.

« Considera la oto petras pendulin, e nota du cosas. Prima, cuando on turna la rota, acel petras maneja la leveres e adata los a la posa nova tal ce la sistem ecuilibra a cada ves. Poi, par acel serie de moves sutil de la pedes de leveres, la un pos la otra, en turnos, suporta e manteni la caxa, tal ce la loca del cor no cambia, permanente sempre a destra de la ase. Ala, en acel caxa — car acel es la peto cual va reseta la cor —, tu va pone la petra.

« Tal, la planetas sirculi sirca la sol sin ce la sol cambia sua loca en la spasio.

« Par esta jira, la lus va brilia plu, la resona va crese, e esta armonia va estende sua spiral vibrante e sperde sua influe a cada dirije, tal como un molin de prea envia sua vibras a la mundo tota a sirca: la arca va prea e labora aciropoeta asta la fini de la tempos, e, o Minos, acel vade a cambia profonda la universo. »

Con la conca de petra en sua brasos, Minos pasea atendosa a la rota, la arca sacra del alia. La caxa de lenio vacua pare espeta. La rota intera espeta. La universo mesma, a sirca, pare reteni sua respira, ance espetante. Tota de nos no es plu ca un sola regarda, juntada en acel atende masima de la miracle.

Con la cautia de un sirurjiste, la manos de Minos lasa ce la cor de petra tan valuosa flue lenta, gradal, en sua peto. La pesa apoia sur la caxa, cual afonda pico ma reveni a sua altia, como relevada par un mola nonvidable. En un jesti ultima, Minos reteni la petra.

« La petra va cade, padre! » el comensa suplica a dui vose, multe ansiosa. « Cua me debe fa?

— Serta, serta, la petra va cade, me acorda, ma… cuieti, o Minos: lo va cade, ma no en la modo abitual. No oblida: an la mestre xef de la Cavaleros del Templo de Solomon es suportada par la oto otra mestres de la ordina. La conca de petra es como la mestre xef de la Templo; la oto otra mestres es presente, a sirca, e susta el: los es la oto sferas de petra.

« En la arca, la cade vertical, retilinial, de la petra va es convertida en un move de jira, sirculo, en la mesma modo como la cade vertical, retilinial, de un pesa es convertida en un move de jira en un pulea.

— Acel es la misterio de la cade sin cade », me ajunta.

— Esata tal, cara frate: la misterio de la cade sin cade. Alora cuieti, corajosi, o Minos! Continua, con fida.

« Ta ce la miracle es performada! »