5

Esce me sonia, esce no? Me no vide algun sur esta nivel. La nave pare alga vea; me recorda ce me ia viaja frecuente sur tal barcones gastada par osidi cuando me, joven, ia visita la isolas elinica. Du ximines grande domina lo, sin ce alga fuma esflue. Me resta ala, sentante sur un grado de un scala metal. Me respira, regarda a ante: un orizon vacua ultra un mar cuieta ondin. La aira es tan dulse, aora… La sona regular de la onda pasi. Me senti un calmia profonda enfluente en mea spirito, en mea alma.

Cuando lo comensa noti, me deside desende a la nivel inferior. Strana, lo pare desabitada : no viajor es vidable ala, an me oia nun. Me pasea, solitar, en la coredor silente, luminada par un lus pal e vasilante. A cada lado de la coredor, la portes es abrida ; an la salas es vacua. Me ia espeta trova cabinas usual, alga streta, con un leto a cada lado de la saleta, e un table ladal, fisada a la pariete, a media. Ma, en fato, los tota no es tal! E esta pare remente me de un tempo ja viveda, en un senti de ja videda.

Los es tan vasta — con des, dudes buros scolal, un buro xef a fronte. An un mureta verde ! Me intui ce salas simil ocupa tota acel nivel; cisa ance la niveles inferior… Cuanto niveles? Du, tres, cuatro?

Tre scaleras grande asede la niveles inferior. Un scalera a media, la du otras a cada estrema de la coredor. Me debe desende: alga cosa impulsa me, an si, simultan, un teme grande teni mea mente. A prima, me ia senti como librida de la tempo — libre… ma, cisa, prisonida en un tempo antica? Esce mea recordas misca con alga cosa otra? Car, me no sabe perce, me senti ce me debe desende afin me encontra algun ala. Algun ci debe espeta ja, ante un sala, a su, cisa la sala indiseda B1? Un person tan importante ce mea cor comensa bate forte en mea peto.

Un emosia pasa sur mea fas, como un venta calda cual abri mea oios a ves nova: en fato, me es ancora sentante sur la mesma grado de la mesma scala metal, a la nivel alta de La Crus del Sude. En ce la note fini. Nubes grande pasa lenta supra me. La sielo rosi al orizon. Un tera apare a via. Un monte roja su la leva del sol.

Me move, e aora me sta a lado de la proa de la nave. Un isola prosimi, pico e pico, ofrente sua marania de plantas esotica, do alga palmas alta emerje, osilante, lenta, en cuando un misca parfumida de flores e de frutas savaje pleni la aira.

A sinistra de un molo de plances, a poca distantia de la mar, un construida de lenio apare, solitar, con sua du niveles e un spesie de belvedere. A supra, un rel de balustres proteje la galeria esterna asedente a la salas ; lo no pare vera solida, tal como la scalera elica cual alti asta lo. Esta va es mea abiteria?