1
Tesalonici, [1962]1.
La anticalior ia pare vea tal como sua boteca. Me ia entra per curiosia, atraeda par la desordina spetaculin e la diversia de la ojetos miscada ala (amforas, vasos, colares, brasaletas, o simple ornetas…), — cuando, subita, me sta a fronte de un spesie de conca jigante, strana gravada con sinias a longo de sua spiral.
Me reconose alga formas bizantian de leteras, ma lor gasta no permete estrae cualce sinifia de lor asemblas, cual, stonante, sembla mera segues de vocales.
Memorinte ce, cuando me ia es un enfante, abitual mea madre e padre ia dise a me ce on pote oia la ondas de la mar a interna de la concas, instintosa, me prosimi mea orea a lo.
A esta ves, me esperia un resona forte, no como un roci simple, fondal, ma vera como un tipo de vocali, esfluente armoniales con un vose cuasi vivin, sempre modulante. Me senti pronto fasinada, tal como Ulise escutante, tra la encantas de la sirenas, la vose de un mundo nonconoseda. Me forsa per sutrae me de la encanta, e demanda a la botecor de cual loca esta conca orijina.
« Lo no es un conca, el responde; an no un conca fosilida. La talento de la artiste pote engana tu, ma, en fato, lo es un sculta, un petra siselida en forma de conca. Lo ia ta es descovreda en un santeria vea a media de un isoleta. Cual isola?… La marinor ci ia vende la ojeto a me no ia intende revela lo. Ma bon… Nunca me ia revide esta marinor ci, si me recorda bon, ta es un Malti. »
Me regrete ce me no ia compra la sculta a acel dia. Me ia debe vade a visita un loca arceolojial, a alga cilometres a norde de Tesalonici2, per studia la fratos de un papiro resente desenterada en un necropoli. Ma, tra acel viaja corta, me ia pensa e repensa constante a la conca: par cual causa un petra ta pote canta tal? Esce la forma de la sculta ta pote jenera esta? O la esense mesma de la petra, posible un misca de cristales? O ambos causas en junta — con la forma de la sculta amplifiante la sona jenerada par la petra? Me ia nesesa esamina plu la sculta.
∴