7
De cuando me ia desembarca asi, me no sesa demanda a me par cual majia me ia susede ariva en esta isola, tra cual via… Mea istoria conteni un rompe baliante, un buco vasta, un falia cual me no pote pleni. Me atenta ordina mea memoria: me ia es en xerca de un petra concin, un petra misteriosa cantante, e, cuando me prosimi a lo, u ala ce me es traeda a via, barcida par un spesie de nave fantasma e portada sur esta costa desabitada, en media de no loca. Como? Perce? Per cua?
E aora? Cua me va deveni? Aora, tra cuando me sta asi, cua me va fa, cua me debe fa? Esce me va returna – ma como? E la petra, como me ta retrova lo?
Cuanto demandas sin responde!
Me ia resta en esta senti de nonsertia tra plur semanas. Pico a pico, la demandas ia debili, e me ia comensa abitua a esta vive en esta vea otel vacua. La descovre de la sala de leje ia tisa mea curiosia: a cada ves, me aprende cosas nova. A alga dia, si me trova alga paper, an me vade a atenta scrive mea istoria, posible en la lingua miscada mesma de esta loca, car, me confesa, me comensa senti un plaser noncomun cuando me leje lo. Sola per plaser, a alga ves, me saisi cualce scriveda sur la table e me leje… cosas tal:
La isola es un santeria. Un santeria cual ia proteje tan multe fujores, de cuando la bibliotecas de la mundo antica ia comensa arde su la furia de la oscuristes de cualce credes —, un santeria cual proteje ancora multe secretas de siensas, en libros, pergamines e enrolas antica ascondeda en cavas de roca, en media de la montes, vales, a lado de rios e lagos del isola.
Me es convinseda ce me no ia ariva asi acaso: asi es la templo do la petra ia es furada, asi la petra debe returna, e, nondutable, alga descovres arceolojial major va aveni, ajuntada a la tesoro de documentos e arcivos valuosa contenida en esta biblioteca streta. Con acel sertia oncida en me, me debe sola espeta la veni prosima de La Crus del Sude. Longo la dise de padre Atanasios, el e sua acompanior debe vade a Malta, a prima, per convinse la furor, converti el… Poi los va veni sur L., esta isola —, con la petra concin, per repone lo en sua loca. Lo pare es la gol xef de lor mision. Cisa, me ta pote es presente, alora, e vide lo cual va aveni.
∴
A esta matina, al solo, su un mobila — un portascafal de la sala de labora —, me ia trova un envelopa vacua cual ia debe cade e lisca ala, a alga dia nonresente (considerante la amasa de polvo sur lo), con un papereta fisada a supra par un clip: Ta ce me no oblida envia mea letera a tu per la veni prosima de la barcon de carga.
Manouna Orti
458, pasea del Mar
Portofranca
∴