8

Cuando La Crus del Sude va veni? Doman? Pos un, du semanas… plu? Entretempo, afin la espeta no pesa tro sur me, me leje multe en la sala de leje de la Otel grande de la plaia.

Me ia descovre libros suposada perdeda per la mundo, suspetante ce algas de los es copias de enrolas siensal survivente del ensende de la biblioteca de Alexandria. Me no ia sabe an ce esta obras ia persiste tra sentenios, conservada en esta isoleta… Me reconose nomes famosa, tal como Euclide, Heron de Alexandria, Filon de Bizantio, Hipatia, Pandrosion… Ma ci es la otras?

Me no ave an cualce conose de siensistes como esta matematiciste Alzon, cui solves de la tre problemes jeometrial antica judida nonsolvable — la trisesioni del angulo, la retanguli del disco, la dupli del cubo — es resomada ala¹, en un pico de pajes de la compila Opera mathematica², scriveda en latina tarda par un monce alexandrian nomida dom Munius: esta compila poneda sur un scafal de lenio umil, a un longia de braso de me. E me ave la favore ultra valua ce esta secretas es compartida con me —, solves tan simple, tan clar… ce nun ante Alzon ia pensa a aceles! Los es notada ala, disponable en esta volum, a lado de me! Me pote toca sua folios, consulta lo libre, comprende la modo de razona…

Per esemplo — noncredable! — longo dom Munius, un nara de Zenon de Elea ia ta inspira sua solve de la trisesioni de la angulo: la nara de Acile e la tortuga! Alzon demostra ce, si on conose la distantia at entre Acile e la tortuga, e si la tortuga avansa regular con un rapidia egal a la cuatri de acel de Acile, alora, final, la tortuga percore un tri de acel distantia at inisial cuando Acile va ateni el, a la punto x. En efeto, si la curso total ax de Acile es cuatruple la curso total tx de la tortuga, alora la distantia inisial at cual ia separa los a la comensa es truple la curso total tx de la tortuga.

Alzon razona simil con la angulos — per crea, de un angulo inisial, un angulo a tre veses plu streta —, si, en loca de move reta, Acile e la tortuga move sur la banda curva de un stadion sirculo. La construi gradal, alora, mostra la progresa de la tortuga — ajuntante, a cada ves, la cuatri de la distantia partal presedente traversada par Acile (at, poi tt_₁, poi t_₁t_₂, poi t_₂t_₃, etc.), per dise: cuando Acile, partida de la punto a, ateni la punto t, la tortuga ia avansa tra un cuatri de at, e, de t, ariva a t_₁; cuando Acile, partida de t, ateni t_₁, la tortuga ia avansa tra un cuatri de tt_₁, e ariva a t_₂; cuando Acile ateni t_₂, la tortuga ia avansa tra un cuatri de tt_₂, e ariva a t_₃, etc. Cuando los encontra, a la punto x, la tortuga, movente a la rapidia cuatrida de la rapidia de Acile, ia percore un cuatri de la distantia ax cual Acile ia percore, donce un tri de la distantia inisial at cual ia separa los.

Entre la paperes poneda sur la buro, me ia trova alga notas del otelor sur acel solves en un proba de letera, adirijeda a “sua ami dulse” e en cual el atenta esplica, con frases e desinias, la modo de pensa de Alzon — con ce, simultan, el pare duta pico ce acel letera pote ateni sua resetor: me va posta mea letera pronto cuando la barcon de carga va ariva asi; de longa lo no ia veni plu —, ma, cisa, oji… o doman… Esce la barcon ia veni? Esce la letera vera ia es enviada, ante ce sua autor ia desapare?

Me espera ce sua letera ia ateni sua gol — car el fini sua scrive con esta parolas triste: … tu manca tan a me!

 

Per aora, me no ia susede trova alga esplica sur la orijina de la lus cual lumina la otel a la declina del dia. Me ia suspeta un relata con la lumina estrema cual ia nase de la conca de petra, cuando acel ia comensa jira, en la cripta de la eglesa del Aciropoeta. Me espera ce la misterio de la petra va es solveda en alga de esta libros. Me vade a continua la leje de la volumes cuantiosa de la obras suscriveda AK cual me ia vide sur la scafales de la sala. Car entre esta pajes, cisa, me va oteni la responde a la demanda xef consernante mea situa:

Do me trova me? Do acel isola trova se?