19

Multe fatigada, la eremita vea senta sur un spesie de banca, un petra plana simple, ante la sol reposante sur la mar.

De cuando el ia susede la padre Casian, la eremita presedente, a veses, el lasa sua eremiteria tra un semana per visita la santerias, percorente tota la vietas gidante a acel bibliotecas sperdeda en la isola, en la locas la plu secreta, per inspeta la state de la libros, enrolas, pergamines — como sua rol de conservor de la tesoro del isola esije. Fortunosa, a un plu ves, tota es en state perfeta, protejeda, secur contra la umidia, la caldia o la fria, insetos e rodentes. Alora, sua taxe es completida.

A la note presedente el ia refuja se en un cava de la deserto vertical, esta parte de la isola do la falesas roja, alta e presipe, domina la mar. Ala, sirca a la media de la note, el ia esperia un sonia tan intensa ce lo ia velia el, con la convinse nonrepresable ce la dia ia veni, ce oji es la dia.

El nota ce, de aora, sua medita es plu forte, plu profonda, esplorante a interna de sua corpo, mente e alma, a interna de sua sensas e sentis, e ateninte niveles nunca esperiada, tal ce el comensa presensa la loca del cor. Un sensa strana dulse, diferente de cualce sensa presedente.

 

Temprana en acel matina, cuando el ia leva e sta a la sorti de la cava, el vide la estende del mar — e sua luminese rosa a supra — en un modo tota otra: esta cosa abitual comun es alora miscada con un sensa de calma profonda, un spesie de libria en sua mente. Sua respira es envolveda en enspiras e espiras longa traente un pas potiosa.

Portante esta pas con el en cada paso sua, el asende la monte de la Rocas roja, paseante atendosa, sur la rueta de tera, sua corpo gastada par la anios. E, aora, a la lado del monte, el senta, cuieta, sur acel spesie de banca, ante la mar movente a su.

Sua medita, a esta momento, es como un revista jeneral de sua vive. Sua enfantia, sua adolese a Portofranca, un vileta de pexores. Poi, sua studias de paleografia en la templo de la Sabe: ala, en la coredor vasta de la nivel prima, sua encontra acaso, distante, con la mervelia ci pleni sua oios e sua cor, sua sonias e sua pensas asta oji: el ia es la alma de tota la locas cual el ia es traversante — la stradas, la porto, la plaia, la baietas rocosa, la sielo sur la mar, la mar su la sol, la sol en la sielo… De cuando sua oios ia encontra la alma, sua respira pare repete sin sesa: E me, e tu.

« E me, e tu », el suspira a un ves nova.

 

An tal, me no ia susede entra en tua vive, restante a via, ma sempre respirante tu, en cada de mea sonias e de mea pensas —, e me ia gusta tua libria en tua brilia.

Me ia afonda en la studias de manoscritos antica, asta ce un ensenior strana, alga vea, suposada un monce pasada — vivente en un monceria visitada en la sentenio sinco par san Joan Casian e situada sur un isola prosima — ia invita me: el ia es xercante un aidor per la esplora noncomun de un loca valuosa cui descrive el ia trova en alga manoscrito oscur.

A alga dias a pos, nos ia es navigante en dirije de Malta, a prima sur un nave grande, poi sur un barcon min grande, poi un barco plu peti, poi… arivada en la porto de Valeta, mea instruor ia contata un marinor ci ia embarca nos sur sua barceta de pexa, la barceta de vela cual ia trae nos asta asi, asta esta isola.

Pos alga recomendas per mea rexercas, el ia reparti con la marinor Malti, disente ce el ta reveni pos alga tempo. Mea taxe ta consiste xerca e studia cualce ojeto arceolojial, fabricada o… nonfabricada! Ma, an cuando me labora, me pensa a tu, a cada instante, como si tu ta regarda supra mea spala.

A veses, un barcon de carga para a la molo. Alga viajores resta asi per plur dias, poi reparti. A un dia, me ia reseta un letera misteriosa: on va ave un carta postal per me en posta restante, a la dia cuando me ta reveni… si a alga dia me ta reveni. Esce tu ia scrive esta mesaje per me?

 

El recorda aora sua vive en la otel vacua, cumulante en sua sala de labora pergamines descovreda en cavas, a sirca, poi studiante e traduinte la testos. El ia ordina cada volum, cada enrola en sua sala, como en un biblioteca. Asta ce… el encontra esta eremita vivente a media del isola.