14

La porte de la eremiteria es pico abrida, a esta ves, como si Atanasios ia entra ja a ante. Me regardeta. A media de un sala blanca streta, on vide un table umil fada con plances ru, du sejas. Sur acel table, un peso de paper, tenida par la pesa de un calculo, onda lejera su la flue de la aira. Cisa un mesaje scriveda par Atanasios e lasada ala per la eremita?

Un misca strana entre latina e lingua franca. E perce esta leteras major, a fini de la mesaje: “E Me E Tu…” con la acronim “Emet²”… Perce scrive secreta acel parola ivri? Lo resona strana en me. Esce lo no ia es la parola cual, scriveda sur la fronte de la golem, ia pote versa la vive en el? La golem… un otra formi aciropoeta?

La parte alta sinistra de la paje porta la impresa de un selo sirculo, con oto radios liada per formi un spesie de crus templan e con un otra disco plu streta, incluida en la parte destra e tanjente la ase de la disco prima. Me recorda alora ce me ia vide ja, en sua eglesa, un tal crus enscriveda en un sirculo.

Un idea fol veni subita en mea mente. Me regarda a sirca, en freta. A destra, sur un scafal, alga libros antica es poneda. A basa de la scafal, me vide esta caxon, en un angulo de la sala: un caxon tota simil a acel en la sala de labora de la otel! Direta, me abri lo e me trova la mesma xapeta gris pal, poneda sur un roba de eremita de la mesma color, con cual me intende vesti me de aora.

Estraente la vestes, me descovre, a su, un libro volumosa (e pesosa) cui covre reprodui esata la mesma scema como sur la selo de Atanasios, titulida La Rota de la Teofania… Cua acel titulo vole dise? Me recorda ce la parola θεοφάνια (theophánia), en elinica antica, sinifia “la apare, la mostra, la ostenta de la divinia”. Sua sutitulo presisa la contenida de acel scriveda longa: La esperia de la lumina e de la vose divin par la esicistes.

Desende retilinial, investiga! Me segue acel consela de Atanasios, tan rapida como me pote, an si lo no es fasil, car la desende es presipe e mea roba longa onci a la rubos, a tota spesies de boscetas spinosa, a cada rameta, longo la rieta cual flue a lado de me, repetente riente: Ora, labora, “prea, labora”.

En cuando me freta sur la lado rocosa de la monte a dirije de la lago secreta, subita me recorda la libro de dom Munius poneda sur la table de la sala de leje, en la otel, abrida a la pajes de la macina de Alzon, acel rota grande con leveres en forma de gamas, con un disco interna deslocada a la lado destra de la rota. En acel scema, la analojia es tan clar, aora, con… a ves nova, la selo mesma de Atanasios!