20
Acel encontra major ia aveni en la pasada distante, en un curso de la manejor tra la isola, cuando, paseante sur un vieta ancora no percoreda, el ia prosimi acaso a la eremiteria de la padre Casian. Acel, ja alga vea, ia es blancinte la mures con la acua de calce.
« Esce me pote proposa aida tu? » ia es sua parolas prima adirijeda a la vea Casian.
— Bien volente! Esta spesie de eserse comensa es laborosa per mea corpo senesente. »
Tal, dia pos dia, la cabana bruta de petra de padre Casian ia prende un vive nova. No sola par la renovi de sua mures e sua blancia nova, ma ance par la conversas entre la instruor e sua disiplo, la ensenias spirital vivin cual la eremita vea ia inisia. La cabana ia deveni un egleseta bela.
Como Joan Casian, en la dias antica, ia es instruinte la disiplos ci ia es veninte a el, resetante los, ofrente a los alga comedetas e conversante con los1, tal la padre Casian ia es enseniante la eserses spirital e compartinte con sua ospitada la frutas e la legumes de sua orteta, la acua de sua fonteta e la acua vivin de sua esperia esiciste, con la modo pasiente de xerca la loca del cor. Sur esta teraza de petra, a retro de la caseta, la du monces ia es meditante per oras, como estra la tempo, estra la spasio.
A prima, la ospitada ia resta ala per alga dias, poi el ia reveni frecuente per visitas plu e plu longa, tal ce, pos un mense o du, el comensa a vive en esta eremiteria a lado de sua instruor vea.
Cuando la vea eremita ia mori, la manejor de la otel ia es ja tota cambiada en la manejor de la tesoro spirital del isola. El ia es aora la padre Casian nova, sua susedor, portante la vestes de acel, la roba gris de eremita e sua xapeta silindre de feltro mol. En la sentro del isola, el teni sua posto de gardor de la santerias.
An tal, a un dia, sua vijila ia fali. Visitante un santeria de la isola, el nota ce un fura ia aveni. Cuando? Par causa de ci? El ia sabe nunca. Un cosa xef cual el ia debe garda ia desapare.
De alora, el ia nota ance ce no barcon no nave veni plu a la molo. De alora, el ia es isolida, separada de la mundo e de sua alma.
El ia espera tan! El ia prea tan forte, plu forte ca usual ce la furor repone sua furada. Ma lo ia aveni nunca asta oji. E sua meditas ia deveni tan difisil! La lumina, la vibra lejera de sua mente ia debili, e tota ia deveni bien plu pesosa ca a ante.
Esce tota ia deveni plu oscur, plu vacua, car la padre Casian no ia es plu ala? O car la maladia del mente nomida acedia2 ia infeta sua mente, acel maladia bien conoseda par la monces? O esce lo ia aveni par causa de la desapare de la parte vival de la arca, la petra?
Do la petra es ascondeda?
∴
1 Acel abitua de Joan Casian es vidable en la titulo mesma de un obra sua, titulida en latina Collationes, un parola cual sinifia “cometas” (comes lejera), o “comedetas” (comedas lejera), per dise comedas material e spirital.
2 La acedia — en elinica, ἀκηδία — es la depresa letarjial cual pote afeta un monce o cualce esersor en curso de sua pratica spirital.