11

Lo es un senti strana cuando on estrae se de un sonia sin sabe esce on ia vive un ilude o la realia, o an alga realia. Tota cual me ia crede vive presedente — vide, ole, oia, toca — ia es sensada tan real, ce me garda ancora acel sensas en mea corpo.

Esce me no ia esplora un parte de la isola? Esce me no ia distingui la lago secreta?

E… esce me no ia es esta pope, vivente en un eremiteria, repetente a interna la prea eterna? Un prea cual me ta pote resita ancora, fada con sola du parolas anelida sur lunlotra, e ajustada con la ritmo natural de mea respira: Lumina, resona. Resona, lumina. Ma esce on ta debe comprende Lumina la resona! Resona la lumina! — o: O lumina, ta ce tu resona! O resona, ta ce tu lumina! —, e tal continuante, en un sicle sin fini de verbo e nom, de causa e efeto. Me recorda ce acel du parolas ia es, en mea mente fol de sonior, la tradui o an la sinifia profonda de la prea corta Κύριε ἐλέησον¹.

Me recorda an la palpa de la xapeta asceta entre mea manos, la sensa dulse de la stofa de feltro, mol car tan portada, fina car tan erodeda… Esce me — como Gogo (o Jojo, en alga varia de la testo) Pasquier, en un nara famosa de George Du Maurier —, me ia es capas de sonia vera, per dise sonia real?

Me ta debe, nondutable, scrive tota lo cual me ia vide ala, en acel mundo, afin serti ce lo es real. Me nesesa sola trova alga paper, car me ave sempre un pen en un pox interna de mea jaca. Me abri un pos la otra la caxetas de la buro sin ce me trova alga folio. Poi, me vade a un caxon, en un angulo de la sala. Alora, cuando me abri lo, me trova alga cosa estracomun, an tal tan mediocre en cualce tempo otra. Esta xapeta gris pal…

Premisa un: si la tanje de esta xapeta es simil a la recorda de mea sonia… Premisa du: si esta tanje es real… Alora, on conclui la efeto nesesada de esta du causas, per dise ce mea sonia presedente es real… en alga modo.

Esta descovre fa ce un demanda nova ia apare: esce mea viaja asta la isola, sur la nave La Crus del Sude, ia es real en acel mesma modo? E aora, esce tota esta, sirca me, es ance un tal sonia? Per dise un tal realia? E a ante? Ci me ia es, ci me es, ci me va es?

Per serti ce la xapeta cabe a me, me prende lo e pone lo sur mea testa. E serta, lo cabe!

Alora, la demandas comensa jira, continuante, en mea testa, multiplinte, intensinte, rebondinte como fotones prisonida entre du mirores, o como eletrones libre xocante sur lunlotra, con rapidia grande, causante, a alga veses, interatas noncomun e permetente an la crea de cuantos de enerjia pur. La lumina, la resona, esce los no ta es la efetos de un enerjia pur?

U ala do me sta, traeda en un vortis de imajes, pensas, ipoteses, respondes, un spasio mental infinita, car refletante se mesma sin fini, un spasio vertijosa, do me ta debe pausa, do me atenta leva… e do me persepi, malfortunosa, ce me sta difisil sur mea gamas, paseante laborosa, bambolante ancora como, presedente, sur la nave.

Me ateni la scalera elica, e me asende lenta, lenta, asta la nivel la plu alta. Me ariva tal a mea sala de dormi, un vitreria, en la tore de la belvedere cual domina la otel. Me recorda ce me ia abita ja, sur un cason vea, un sala simil, multe streta. Un fenetra, tan basa, mostra a su un jardin esotica de do la lianas trepa, asende e intermisca con la edera, asta la leto, e los penetra la telas verde cual fisa a la mur la “arbor de vive” tradisional.

Tra un otra fenetra on vide la mar e, cuando on puxa la paneles, los distanti silente e los desfisa; cada de los afonda a via… Tan a via ce me deteta apena los, aceles flota en la nonpesa. Me nausea. Me debe pausa, reposa. An si me sabe ce, direta cuando me clui mea oios, la formicas invade mea sala.