2

Pronto cuando me ia reveni a Tesalonici, me ia vade direta a la anticalieria. La scafal, do la conca ia sta a ante, ia es vacua.

« Tu ia cambia la loca de la conca? » me demanda a la anticalior.

— La conca? O ma me ia vende lo ier! Un cliente ia entra e ia declara ce el es multe interesada par acel sculta.

— Ci? Algun de asi, de Tesalonici?

— Un viajor… un stranjer. En curso de discute, pos la compra, el ia aviseta ce el ia es xercante acel de longa, fante la mesma demandas como tu: a ci me ia compra la conca, de do esta marinor ia veni, do el ia trova la sculta, e tal cosas… »

Me ia senti, a acel dia, cuanto la sculta es un cosa valuosa e misteriosa, e cuanto me ia es stupida ce me no ia compra la conca pronto. Ance me ia senti la nesesa de emprende un xerca e, cisa, situa la isola de la sculta. Me ia demanda a la anticalior esce, longo el, el ave cualce indica, un nom, un adirije… afin me ta pote retrova esta compror. El no ia sabe la nom, el no ia conose cualce adirije. El ia pare tan embarasada… Me ia intende alora sorti de la boteca, cuando, subita, me sensa sua mano reteninte mea braso :

— Me no ia dise tota… », el xuxa.

 

A esta momento, el sta tan strana… Cual cosa ia preveni ce el dise tota?

« Acel viajor… no ia es solitar. Ante la compra de la conca, el ia sorti de la boteca tra poca tempo e ia discute con un pope. De alga paroletas cual el ia cade, me ia comprende ce los ia es parlante de un prete de la sentenio des-sete cui nom me no susede recorda. Ma me ia nota ce la pope ave la mesma nom individua.

— Donce, tu conose esta pope?

— Si… el es la padre Atanasios. El maneja, plu o min, la eglesa de la Aciropoeta¹.

— Me ia intende visita acel eglesa. Ma me demanda sempre a me cua Aciropoeta sinifia…

— Lo sinifia ‟no fabricada par la mano umana”. Perce? Cisa, car… ‟fabricada par la mano divin”? »

Me grasia la anticalior e pasea a la distrito de la eglesa, pensante a un modo per contata la padre Atanasios, e xercante en mea testa la nom de acel prete de la sentenio des-sete. Futil. Sola cuando me ia renunsia xerca, final la nom ia apare clar, e me ia senti subita ce lo es la bon responde a mea demanda, plu cuando me ia recorda ce el ia sta per alga tempo en la isola Malta: Athanasius… Athanasius Kircher.