13

Considerante mea curso per junta la pope e sua acompanior en lor percore tra la isola per repone la petra en sua loca, me ia senti como Acile — atentante ateni la tortuga partida con alga presede, e esperiante la teoria de Alzon sur sua construi de la trisesioni del angulo. Me ia evalua mea rapidia relatada a la lor e, si mea computa es coreta, me espeta ateni los ante lor ariva a la santeria a la riva de la lago secreta. (Con alga difisilia, en pasa, car la ora de la inisia de lor pasea manca a me, e me debe evalua la interval de nonpresisia con… presisia!)

A prima, cuando me ia entra la foresta, me no ia es vera serta ce me ta pote retrova la via, ma pronto me gania un fida vera per mea recordas soniosa. Asi, ala, sempre me retrova alga detalia cual me pote reconose. Tal roca, tal arbor, tal curve de la via… Tal, mea avansa, esitante e dutante a la comensa, ia deveni plu e plu osante e, aora, mea pasos presa forte la tera, an si la trasa de la rueta no es multe vidable.

Me avansa, e me progresa, sur tera e, ance, en mea mente do un spesie de ajenda es en curso de scrive, notante tota la taxes per fa, pos la repone de la petra.

Punto un: determina plu presisa la situa de acel isola, cual pare evidente: lo sta, con sertia, en un parte de la mar Mediteraneo tal ce la esiste simultan de parolas espaniol, catalan, italian, portuges, ositan, sisilian, sarda, corsican… indica un locali sentral en la mundo mediteranean.

Otra punto: me ta debe studia la dirijes de la flues maral — e la libros de la biblioteca de la otel va pote aida me, afin me defini cual corente spesial calda envolve esta tera; acel ta esplica la diversia de la plantas, sur la costa e a interna.

Punto tre: me ta debe asende la punto apical de la isola afin me ave un vide global de lo; un desinia de sua forma jeneral va es multe usosa, cuando me va returna en mea mundo presedente, e va pote xerca esta silueta sur la mapas per oteni sua situa esata… si, par fortuna, esta isola es marcada sur los!

Puntos cuatro e sinco (per memoria): prima, nota la angulo de la sol a sua zenite en la sielo, compara lo a la angulo de la sol en esta periodo de la anio e calcula la latitude. Poi, nota la difere entre la ora de mea orolojeta e la ora solal vera per calcula la lonjitude, par causa de la desfase entre la ora de Tesalonici e la ora local asi. Malfortunosa, acel puntos cuatro e sinco es marcada per memoria, car no me deteni alga compas, no mea orolojeta pote aida, car strana fisada sur la ora 21:20 de pos mea naviga sur La Crus del Sude. Nonesplicable: como si un nonsertia sur la tempo, en acel loca, ta indui un nonsertia sur la loca — e resiproca!

Cuanto taxes per completi!

Per aora, la foresta tropical ia fini, poi, pico a pico, me ia entra en la mundo seguente plu sever, plu ru. Ma, pronto, pos un pasea longa sur la lado de la monte, esta severia ance ia fuji car me ia comensa oia la rieta de un rieta — e me mervelia ce la parolas rie e rio es tal liada en mea oreas — o de un fonte: nondutable, la fonte visina a la eremiteria, simbolida en mea mapa con un cuadro intermiscada con un sirculo e un crus¹.

Serta, la refuja es vidable, aora. Me freta per senta sur la banca e reprende mea respira. An tal, me no trae alga carga como la du persones ci me trasa. Me ia ta espera trova los asi, sentante sur esta banca e reprendente lor respira. Ma no. Me es ancora solitar. Regardante la abiso ante me, e seguente con mea oios la curso cual me va percore alora. La diverje de la via, a destra, sua desende e sua curva ancora a destra, poi un via plu streta cual tufa ancora a destra direta a la loca de la lago, a basa, tota a basa. Un via longa, cual me deside talia con un deside firma. Me va vade direta a la lago, seguente la curso de la rieta riente cual prende sua fonte asi. Un linia reta cual va gida me per un via multe plu corta, multe plu presipe e perilosa, ma direta a la lago secreta.

Alora, me distingui du manxetas oscur, no plu grande ca du formicas, movente a su, nondistante de la parte vidable de la lago ensircada par la rocas.