10

Entre la molo e la otel, on ave la comensa de un pasaje, difisil vidable — ma cuando on sabe, on vide. Ala on inisia sua curso, traversante la foresta de palmas, repuxante la boscetas, rascada par la rametas agu cual, cisa, ta vole mera caresa la viajor.

Pronto, la ruido bolante de un rieta riente acompania la paseor, su un covre de ramos verde clar, tremetante: du strumentos jua en junta, tocada par la manos divin de la gravita e de la venta ventante — du causas nonvidable, supraumana, aciropoeta! —, en esta eglesa abrida, natural e eterna, do la colonas es troncos de arbores; la scultas es rocas; la arcos de volta e la vitrales es ramos e flores luminosa su cual on pasa, purida par diversa parfumes de flores e frutas odorosa, osilante como alga insensadores jigante.

Poi, la rueta de tera comensa asende, pico e pico, plu e plu, sur la lado de un colina, poi de un monteta, poi de un monte. Aora, la plantas cambia sua aspeta tropical, miscante se con alga tinjes mediteranean, como si la situa de la isola mesma ta es modifiada sur la globo teral, tra esta curso longa: pinos e juniperes apare, la parfumes floral cambia sua sabores, aora plu terosa e ru, dominada par la odor potiosa del fenogreco.

A destra, sur la inclina forte, la vejetales rari, como si, an per los, lo deveni difisil onci se sur esta solo roja brun polvosa. A sinistra, me prosimi a un egleseta elinica, blancida con acua de calce, tipal con sua teto azul ronda emerjente de un construi cubo.

Un fatiga intensa ia permea gradal mea gamas tra la viaja, tal ce aora lo pare a me ce me ia pasea tra dias intera, o semanas, menses. La tempo flue tan strana de cuando me ia inisia la esplora de la isola. Sin tarda, me senta a estra de la egleseta, sur esta parte de la mur en forma de banca, a fas del inclina. La scema de la curso en mano, me segue la trasa serpentin de la via asta la sinia de un cuadro con un sirculo e un crus a en, ⊕⃞, cual me interprete como la simboli de la egleseta. Un linia, poca pos la loca do me pausa, mostra un diverje de la via. E, en efeto, cuando me regarda a via, me crede vide un rueta cual desende, poi curva a destra, distantinte de la via prima cual me ia es seguente — un desende cual pare gida a un area grilida, contorseda, sur la mapa. Me va esplora ala, pos un para nesesada.

A retro de la caseta, on trova un spesie de teraza paveda su un teto corta de lenio e un pergola de uvo, do on pote oia la flue lejera de un fonteta prosima e ole la tera umida de un orteta. Me supini ala, per un momento, e, sin ce me persepi, me ia trova me en un projeta de imajes sur la scermo de mea mente. La loca, alora, es cuasi simil, ma la egleseta, aora, es mera un cabana bruta de petra. Me vive asi, solitar, posesente no cosa otra ca esta roba negra, palida a gris, con esta xapeta silindre de feltro mol.

Sur acel banca, ante la caseta, en cuando mea cor resita siclin la prea eterna, me regarda a via, al fondo de la inclina. Entre la ombras de la rocas, tota a basa, mea oios distingui un estende plata oscur. La lago asconde ala.

Me resta asi, sentante e preante, asta ce la note veni. Subita un lus grande lumina cada parte, veliante me: me sta inclinada, con la testa poneda sur mea manos e mea manos sur la pila de leteras, folios e… desinias cual resta ancora liscada entre mea ditos.