4
A esta momento, la lus ia clari plu forte, e, pronto a pos, estingui. Me espeta silente tra alga minutos multe longa. Final, me regardeta rapida. Me vide no la pope no sua conversor. La conca sta, solitar, a la sentro de la sala, su la volta de petra. Insertada en un silindre liada a un motor eletrical. Me imajina ce acel motor debe move la petra: par cualce razona misteriosa, on ta nesesa jira la sculta. Perce? — On ta debe osa puxa la comutador.
Me vijila, escutante la silentia. La lus, entrante tra un lucarna streta, debili pico e pico: la note, a esterna, ia veni; en la cripta, tota deveni difisil vidable. A esta ora, la portas de la eglesa debe es cluida; la eglesa, vacua. Lo ta es la momento oportun per fura la petra.
Vera, me ia vole fura la petra, intendente studia lo. Ma mea curiosia domina, e me fisa con regarda la comutador. Mea dito prosimi. Me puxa lo.
La motor eletrical, ronronante, comensa move la silindre, jirante la conca de petra. Alora alga cosa strana aveni. Alga cosa apena credable. En cuando armoniales nase e crese, sona e resona, vocalinte plu e plu, la aira pleni con un luminese traeda en un move spiral sirca la conca.
Subita, on ave un flax luminante, nonsuportable briliante, como un lampo tan abaliante ce me debe clui la oios: la persiste retinal conserva la imaje de un xaceria con cuadretas jala e negra contorseda. Su mea pede, la solo comensa move lenta, osilante. Me bambola, tropeza, e final desecuilibra, cadente a jenos sur la sursolo. Un move de aira fresca caresa mea fas, odorinte un parfum iodida. Me resta ala, con mea manos e mea jenos poneda sur la solo, sin comprende. Un jeta fria de acua salida abri brusca mea oios.
Me vide un solo de plances, alga salpicada, alga ondante. Un venta dulse ajita mea capeles. Ultra la armoniales, me persepi la flue de la mar. Do me es?
Alga nubes separa, la sol clari la sena. Parente, me sta sur la nivel alta de un nave. Un nave… On leje esta nom sur la anelos de salva, a mea lado: La Crus del Sude. E esta nave cruseri en la mar alta.
∴