17
Nos silenti e escuta atendosa, tra alga tempo nonmesurable.
En cuando me entra a interna de me mesma, la silentia, en la profondia de la spasio, apare como un spesie de trama, un trensa de multe vibras sutil entretexeda.
Pico a pico, a prima debil ma pronto alga clar, me persepi en esta marania un canta dulse veninte de la sala prosima. A dui vose, Atanasios ajunta:
« La canta de la tera e de la sete sferas de sielo, la fonte vivin de nosa imnos sacra! »
Nos avansa, lenta, pasetante sur ditos de pedes, asta ce la santeria, vasta, luminesente, apare ante nos. En la aira, la vocali persiste, refletante se, nasente e resonante de cada parte de la parietes, turnante sin fini su la volta alta, tota a sirca de nos. A ves nova, como en la boteca del anticalior a Tesalonici, cuando me ia prosimi la conca a mea orea a lo, me resta fasinada par la vose cuasi vivente de la petra.
« Oia la vocales, Minos. Aora, tu sabe perce nosa imnos inclui sola la sete vocales1. Su esta arco de petra, los es como la sete colores de la arco de sielo. »
A mea lado, acel parolas de Atanasios resona en mea memoria, remente me de un testo de Demetrio de Falero2, un de la fundores de la biblioteca de Alexandria, consernante la cantas liturjial en Ejipte antica: En Ejipte, la pretes selebra la dios tra imnos de la sete vocales3.
« E u asi la macina cual alia nos, umanas, con la Alma sin limita. Algunes nomi lo “la arca del Alia”. Considera lo, o Minos, como un amplifiador de la vibras musical cual tu oia, en tal modo ce, de la resona, la imajes colorida relatada apare, no como un sonia, ma como la realia. Esta rota va permete tua entra en la mundo pur, la mar profonda, pasosa, de la Alma . Tal, la mundo intera mesma va conose la pas profonda, con tu, con nos! »
A la fondo de la sala, un rota grande, fada de lenio, espeta. Me reconose en acel la desinias de la obra de dom Munius, simbolida, o scemada par la crus serifida en sua sirculo.
« La planetas no pote turna sin la sol… », Minos comensa dise, memorinte la parolas de Atanasios ja oiada.
— E la sol no pote jira sin la planetas! » me completi.
— Esata! » Atanasios conclui. « Ta ce nos repone la sol a la sentro de sua sistem. La tempo ia veni. »
∴
1 Acel sete vocales es la vocales elinica antica α, ε, η, ι, ο, υ, ω —, per dise la vocales a, e cluida, e abrida, i, o cluida, o abrida, e la vocal u anterior rondida, notada [y] en la alfabeta fonetical internasional.
2 En fato, nos sabe aora ce esta testo no ia es scriveda par Demetrio de Falero: par acel causa, on nomi sua autor “Pseudo-Demetrio de Falero”.
3 Ἐν Αἰγύπτῳ δὲ καὶ τοὺς θεοὺς ὑμνοῦσι διὰ τῶν ἑπτὰ φωνηέντων οἱ ἱερεῖς. (Pseudo-Demetrio de Falero, De la stilo, capitol lxxi.)