Capitol 8

1. Cuando Jesus ia desende de la montania, un fola grande ia segue el.
2. E alora un leprosa ia prosimi el, ia proni e ia dise: “Senior, se tu vole, tu pote puri me”.
3. El ia estende sua mano, el ia toca el e ia dise: “Me vole, es purida”. Sua leprosia ia es purida.
4. A pos, Jesus ia dise: “Dise a nun, ma vade a la prete, e ofre la donada cual Moises ia prescrive; esta va es proba per los”.
5. Cuando el ia entra a Caparnaum, un senturion ia prosimi el e ia suplica el,
6. disente “Senior, mea servor es reclinada a casa paraliseda, sufrinte asustante”.
7. El ia dise: “Me mesma va vade per cura el”.
8. Ma la senturion ia responde: “Senior, me no merita ce tu entra a mea casa, ma sola dise un parola e mea servor va sani.
9. Car me ance es un om su autoria, con soldatos su mea comandas. E me dise a un “Vade”, e el vade, e a otra “Veni asi”, e el veni, e a mea sclavo “Fa esta”, e el fa lo”.
10. Cuando Jesus ia escuta esta, el ia es merveliada e ia dise a ci ia es seguente el: “Me dise a vos, nun en Israel me ia trova con tal fida”
11. Me dise a vos, multe va veni de la este e la ueste, e va senta con Abraham, Isac e Jacob en la banceta en la rena de la sielo,
12. ma la fios de la rena va es espulsada a la oscuria, do on va ave ululas e moles de dentes”.
13. E Jesus ia dise a la senturion “Vade, como tu ia crede, tal va es donada per tu”. E en acel ora, sua servor ia sani.
14. Jesus ia entra a la casa de Pedro, e ia vide sua madre par sposi reclinada en leto con febre.
15. El ia toca sua mano, la febre ia abandona el e el ia leva e atende el.
16. Cuando lo ia es sera, multe poseseda par demones ia es traeda a el, e el ia espulsa la spiritos e sani tota la maladas,
17. completinte cual ia es diseda par Isaia la profeta:
    “El ia sutrae nosa debilias
    e ia porta nosa maladias”.
18. Cuando Jesus ia vide la fola sirca el, el ia comanda sua disiplos crusa a la otra lado.
19. Un scriviste ia prosimi e ia dise: “Mestre, me va segue tu en cualce loca tu vade”.
20. Jesus ia responde el: “La volpes ave cavas e la avias de la sielo ave nidos, ma la Fio de la Om no ave loca per reposa sua testa”.
21. Otra de sus disiplos ia dise a el: “Senior, lasa me prima entera mea padre”.
22. Ma Jesus ia responde el: “Segue me, e lasa ce la mores entera sua mores”.
23. El ia entra a un barceta e sua disiplos ia segue el.
24. Subita, un tempesta tan grande ia aveni tal ce la barceta ia es covreda par la ondas; ma el ia es dorminte.
25. Los ia veni e ia velia el disente: “Senior, salva nos! Nos es afondante!
26. El ia responde los: Perce vos es terorida, omes de pico fida! El ia leva, ia reproxa la ventas e la mar, e on ia ave calma grande.
27. La omes ia es merveliada e ia dise: “Ci es esta om, a ci an la ventas e la mar obedi?”.
28. Cuando los ia ariva a la otra riva, a la teritorio de la gadarenes du demonines ci ia veni de la tombas ia encontra el. Los ia es tan savaje ce nun ia pote viaja par acel via.
29. Los ia clama: “Cual tu vole de nos, o Fio de Dio? Esce tu ia veni asi per tormenta nos ante la tempo asiniada?”
30. A alga distantia on ia ave un manada de porcos nurinte.
31. La demones ia peti el: “Se tu espulsa nos, envia nos a la manada de porcos”.
32. E el ia dise a los: “Va!” Los ia sorti e ia entra en la porcos, e la tota manada ia freta a la mar de la falesa do ia afoca.
33. La porcores ia fuji, e cuando ia ariva a la site, los ia reporta tota, incluinte lo ce ia aveni con la demonines.
34. Tota la site ia sorti per encontra con Jesus e los ia demanda a el lasa sua abandona sua teritorio.