Capitol 28

1. Pos la dia santa, en la matina de la prima dia de la semana, Maria de Magdala e la otra Maria ia veni per vide la tomba.
2. E regarda, on ia ave un trematera grande; car un anjel de la Senior ia desende de la sielo, ia prosimi, ia rola la petra de la tomba e ia senta sur lo.
3. Sua aspeta ia es como lampo e sua vestes ia es blanca como la neva.
4. La gardores ia es secuteda par teme e ia deveni como omes mor.
5. Alora la anjel ia dise a la femes: “No teme! Me sabe ce vos xerca Jesus la crusida.
6. El no es asi, car el ia revive como el ia dise. Veni e vide la loca do el ia es.
7. Alora vade rapida e dise a sua disiplos: ‘El ia revive de la mores, e el vade ante vos a Galilea; ala vos va vide el.’ Regarda, me ia dise a vos.”
8. Alora los ia vade rapida de la tomba, temosa ma estasiante, e ia core per anunsia esta a sua disiplos.
9. E regarda, Jesus ia apare a la femes en sua via e ia saluta los. Los ia prosimi, ia abrasa sua pedes e ia onora el.
10. Alora Jesus ia dise a los: “No teme, vade per comanda mea frates a vade a Galilea e ala los va vide me.”
11. En cuando los ia es vadente, algun de la gardores ia vade a la site e ia dise a la pretes xef tota cual ia aveni.
12. Los ia asembla con la veas e los ia consulta e ia dona multe mone a la soldatos,
13. disente a los: “Vos debe dise: ‘Sua disiplos ia veni per la note e ia fura el cuando nos ia dormi.’
14. E si esta ariva a la oreas de la governor, nos va pasi el sin crea un problem per vos.”
15. La soldatos ia prende la mone e ia fa como comandada. E esta nara ia sirculi entre la iudis asta oji.
16. La des-un disiplos ia vade a Galilea, a la monte cual Jesus ia comanda a los.
17. Cuando los ia vide el, los ia adora el, ma los ia duta.
18. Cuando Jesus ia prosimi, el ia dise a los: “Tota potia en sielo e sur tera ia es donada a me.
19. Vade per fa disiplos de tota la nasiones, batizante los en la nom de la Padre, e de la Fio, e de la Spirito Santa,
20. enseniante los a oserva lo cual me ia comanda a vos. E regarda, me es sempre con vos, asta la fini de la mundo.”