Capitol 15

1. Alora la fariseos e scrivistes ia veni a Jesus de Jerusalen e ia dise:
2. “Perce tua disiplos rompe la tradision de nosa asendentes? Los no lava sua manos ante come.”
3. El ia responde: “E perce vos, per segue vosa tradision, rompe la comanda de Dio?
4. Car Dio ia dise: ‘Onora vosa padre e vosa madre’ e ‘Cualcun ci maldise sua padre o madre debe mori’.
5. Ma vos dise: ‘Cualcun ci dise a sua padre o madre “Me ia ofre en la templo la benes cual me ia ave per aida vos”,
6. es libre de debes con los.’ Vos ia nega la parola de Dio per segue vosa tradision.
7. Ipocritas, Isaia ia predise bon sur vos cuando el ia dise:
8. ‘Esta popla onora me con sua labios,
   ma sua cores es distante de me;
9. futil los adora me,
   enseniante como credes prinsipes umana.’”
10. El ia clama la fola e ia dise a los: “Oia e comprende.
11. Lo cual desanti un person no es lo cual entra par sua boca, ma lo cual sorti de lo.”
12. Alora sua disiplos ia prosimi a el e ia dise a el: “Esce tu sabe ce la fariseos ia ofende cuando los ia oia cua tu ia dise?”
13. El ia responde a los: “Cada planta cual mea Padre sielal no ia planta va es desradisida.
14. Lasa los: los es sieca ci gida otra siecas. Si un sieca gida un otra, ambos va cade en un caveta.”
15. Alora Pedro ia dise a el: “Esplica esta parabola a nos.”
16. El ia dise a los: “An vos no pote comprende?”
17. Esce vos no comprende ce tota cual entra par la boca pasa a la stomaco e es espulsada en la latrina?
18. Ma lo cual sorti de la boca veni de la cor, e los desanti.
19. Car de la cor pensas malvolente veni: omiside, adultera, nonmoralia sesal, fura, atesta falsa, blasfema.
20. Esta es lo cual desanti un person, ma come con manos susia no desanti.”
21. Alora Jesus ia sorti de acel loca e ia vade a la rejion de Tiro e Sidon.
22. Un fem cananes de acel rejion ia veni e ia comensa cria: “Senior, Fio de David, ave compatia per me! Mea fia es tormentada par un demon.”
23. Ma el ia responde no cosa. Sua disiplos ia veni e ia demanda a el: “Senior, envia el a via, car el persegue nos con sua crias.”
24. El ia responde: “Me ia es enviada sola a la oveas perdeda de la casa de Israel.”
25. Ma la fema ia veni e ia proni ante el e ia dise: “Senior, aida me.”
26. El ia dise: “Lo no es bon ce on prende la come de la fios e lansa lo a la canes.”
27. El ia dise: “Per favore, Senior, an la canes come la pesos cual cade de la table de sua seniores.”
28. Alora Jesus ia dise a el: “O fem, grande es tua fida! Ta ce lo es fada como tu vole.” E sua fia ia es sanida en acel momento.
29. De ala, Jesus ia ariva a la costa de la Mar de Galilea, ia asende un monte e ia senta ala.
30. Folas enorme ia veni a el, traente con se la coxeantes, la siecas, la malformidas, la mudas e multe otras. Los ia pone los a sua pedes, e el ia sani los.
31. La folas ia es stonada cuando los ia vide la mudas parlante, la malformidas restorada, la coxeantes paseante, e la siecas vidente, e los ia glori la Dio de Israel.
32. Jesus ia clama a sua disiplos e ia dise: “Mea cor es emosiada con compatia per la fola, car los ia es con me tra tre dias e los ave no cosa per come. Me no vole envia los fame a via, car los pote colasa sur la via.”
33. La disiplos ia dise a el: “Do nos ta pote oteni pan sufisinte per sasia un tal fola en esta loca de deserto?”
34. Jesus ia dise a los: “Cuanto panes vos ave?” “Sete,” los ia responde, “e alga pexes.”
35. El ia comanda ce la fola senta sur la tera.
36. Alora el ia prende la sete panes e la pexes, ia grasia, ia rompe la panes e ia dona los a sua disiplos, ci ia dona los a la fola.
37. Tota de los ia come asta es sasiada. Los ia recolie la fratos restante – sete sestos plen.
38. Los ci ia come ia es cuatrosento omes, sin conta femes e enfantes.
39. E cuando el ia envia la fola a via, el ia entra a la barco e ia vade a la distrito de Magadan.