Capitol 18

1. En acel tempo, la disiplos ia prosimi Jesus e ia dise: “Ci es la plu grande en la rena de sielo?”
2. El ia clama un enfante, situante el entre los,
3. e el ia dise: “Amen, me dise a vos, si vos no va cambia e deveni como enfantes, vos no va entra en la rena de sielo.
4. Cualcun ci umili se como esta enfante es la plu grande en la rena de sielo.
5. E cualcun ci reseta un enfante como esta en mea nom reseta me.
6. “Cualcun ci fa ce un de esta petis ci crede en me peca, lo ta es plu bon per el ce el ave un petra de molin pendeda de sua colo e ce el es afocada a la profundia de la mar.
7. Mal fortuna a la mundo par causa de la cosas cual causa peca! Tal cosas debe veni, ma mal fortuna a el tra ci los veni!
8. Si tua mano o pede fa ce vos peca, talia lo e dejeta lo. Lo es plu bon ce on entra en la vive eterna ferida o descapasida, ca con du manos o du pedes on es lansada a la foco eternal.
9. E si vosa oio fa ce vos peca, estrae lo e dejeta lo. Lo es plu bon ce on entra a vive con un oio ca con du oios on es lansada a la focos de Gehena.
10. Vide ce vos no despeta un de esta petis, car me dise a vos ce sua anjeles en sielo sempre regarda la fas de mea Padre sielal.
11. Car la Fio de Om ia veni per salva cual ia es perdeda.
12. Cua es vosa opina? Si un om ave sento oveas e un de los es perdeda, esce el no va lasa la otra novedes-nove sur la colinas e vade per xerca la perdeda?
13. E si el trova lo, amen, me dise a vos, el joia plu par acel ca par la novedes-nove cual no ia es perdeda.
14. En la mesma modo, lo no es la vole de vosa Padre sielal ce un de esta petis es perdeda.
15. Si tua frate peca contra tu, vade per reproxa el entre tu e el solitar. Si el escuta tu, tu ia vinse tua frate.
16. Si el no escuta, prende un o du otras con tu afin ‘cada ata es instituida sur la atesta de du o tre atestores’.
17. Si el refusa escuta los, dise a la eglesa. Si el refusa escuta an la eglesa, alora trata el como tu ta trata un pagan o un colior de impostas.
18. Amen me dise a vos, cualce cosa cual vos lia sur la tera va es liada en la sielo, e cualce cosa cual vos deslia sur la tera va es desliada en la sielo.
19. Denova, (amen) me dise a vos, ce si du de vos acorda per demanda alga cosa, mea Padre sielal va dona lo a los.”
20. Car cuando du o tre es asemblada en mea nom, ala me es entre los.”
21. Alora Pedro ia prosimi a el e ia dise: “Senior, si mea frate peca contra me, a cuanto veses me debe pardona el? Tan multe como sete veses?”
22. Jesus ia responde: “Me dise a vos, no sete veses, ma setedes-sete veses.
23. Par esta la Rena de Sielo es como un re ci ia vole salda sua contas con sua servores.
24. Cuando el ia comensa la contabli, un detor ci ia deta a el un cuantia enorme ia es traeda ante el.
25. Car el ia ave no modo de paia el, sua mestre ia comanda ce el es vendeda con sua fem, sua fios, e tota sua proprias per paia la deta.
26. La servor ia cade a sua pedes disente: “Es pasiente con me, e me va paia tota.”
27. Compatiante el, la mestre de acel servor ia lasa ce el vade e ia pardona sua deta.
28. Cuando la servor ia sorti, el ia trova un de sua cameradas ci ia deta a el un cuantia multe plu peti. El ia prende el, e ia comensa strangula el, esijente: ‘Paia lo cual tu deta.’
29. Cadente a sua jenos, sua camerada ia suplica el: ‘Es pasiente con me, e me va paia tu.’
30. Ma el ia refusa. En loca, el ia pone el en prison asta ce el paia lo cual el deta.
31. Aora cuando sua companiores ia vide lo cual ia aveni, los ia es multe turbada, e los ia vade a sua mestre e ia reporta la caso intera.
32. Sua mestre ia clama el e ia dise a el: ‘Tu mal servor! me ia pardona a tu tua deta completa car tu suplica me.
33. Esce tu no ia compatia tua camerada?’
34. Alora colerida, sua mestre ia trae el a la torturores asta ce el ia paia la deta completa.
35. Tal mea Padre sielal va fa con vos, si no cadun de vos pardona sua frate de sua cor.”