BIBLIA
Atesta Vea —
Jenese ·
Esodo ·
Levitico ·
Numeros ·
Deuteronomio ·
Joxua ·
Judores ·
Rut ·
Samuel ·
Res ·
Cronicas ·
Ezra ·
Nehemia ·
Ester ·
Tobi ·
Judita ·
Macabeos ·
Job ·
Salmos ·
Proverbos ·
Eclesiaste ·
Canta de Cantas ·
Sajia ·
Sirac ·
Isaia ·
Jeremia ·
Lamentas ·
Baruc ·
Ezeciel ·
Daniel ·
Hoxea ·
Joel ·
Amos ·
Obadia ·
Jona ·
Mica ·
Nahum ·
Habacuc ·
Sefania ·
Hagai ·
Zecaria ·
Malaci
Atesta Nova —
Mateo ·
Marco ·
Lucas ·
Joan ·
Atas ·
Romanes ·
1 Corintianes ·
2 ·
Galatianes ·
Efesianes ·
Filipianes ·
Colosianes ·
1 Tesalonianes ·
2 ·
1 Timoteo ·
2 ·
Tito ·
Filemon ·
Ivris ·
Jacobo ·
1 Petro ·
2 ·
1 Joan ·
2 ·
3 ·
Juda ·
Apocalise
Capitol 25
- Alora la rena de sielo va es como des virjines ci prende sua lampas e sorti per encontra sua sposos nova.
- Sinco de los ia es fol e sinco ia es saja.
- La foles, cuando los ia prende sua lampas, no ia trae olio con los,
- ma la sajas ia trae botelas de olio con sua lampas.
- Car la sposos nova ia tardi, los ia adormi.
- A medianote, on ia ave un cria: “Regarda, la sposo nova! Veni per encontra el!”
- Alora tota acel virjines ia leva e ia prepara sua lampas.
- La foles ia dise a la sajas: “Dona a nos alga de vosa olio, car nosa lampas ia fini la sua.”
- Ma la sajas ia dise: “No, on no ave sufisinte per totas. Lo es plu bon ce vos vade per compra lo a la mercato.”
- En cuando los ia vade per compra lo, la sposo nova ia veni e los ci ia es preparada ia vade a la banceta de sposi con el. Alora la porte ia es cluida.
- A pos la otra virjines ia veni e ia dise: “Senior, Senior, abri la porte per nos!”
- Ma el ia responde los: “Amen, me dise a vos, me no conose vos.”
- Alora, resta veliada car vos conose no la dia, no la ora.
- Lo va es como cuando un om ia vade a un viaja e ia clama sua servores e ia confida sua posesedas a los.
- A un el ia dona sinco talentos; a un otra, du; a la numero tre, sola un (a cadun longo sua capasia). Alora el ia vade a via. Direta
- el ci ia reseta sinco talentos ia vade e ia comersia con los, e ia ateni sinco plu.
- Ance la otra ci ia reseta du ia oteni du plu.
- Ma la om ci ia reseta sola un ia vade e ia escava un buco en la solo e ia entera la mone de sua senior.
- Pos un tempo longa la senior de acel servores ia reveni e ia salda con los.
- El ci ia reseta sinco talentos ia veni a ante e ia presenta a el la otra sinco. El ia dise: “Senior, tu ia dona a me sinco talentos. Vide, me ia fa sinco plu.”
- Sua senior ia dise a el: “Bon fada, mea bon servor fidosa. Car tu ia es fidosa en cosas peti, me va dona a tu encargas plu grande. Veni, comparti la joia de tua senior.”
- Alora, el ci ia reseta du talentos ia veni a ante e ia dise: “Senior, tu ia dona a me du talentos. Vide, me ia oteni du plu.”
- Sua senior ia responde: “Bon fada, mea bon servor e fidosa. Car tu ia es fidosa en cosas peti, me va dona a tu encargas plu grande. Veni, comparti la joia de tua senior.”
- Alora el ci ia reseta sola un talento ia veni a ante e ia dise: “Senior, me ia sabe ce tu es un person demandante, recoliente do tu no ia planta e coliente do tu no ia sperde;
- par esta causa me ia teme e me ia entera tua talento en la solo. Asi lo es.”
- Sua senior ia responde: “Tu servor malvolente e pigra! Donce tu sabe ce me recolie do me no ia planta e me recolie do me no ia sperde?
- Esce tu no ia debe donce pone mea mone en la banco afin me pote reprende lo con interesas?
- Alora, prende la talento de el e dona lo a el con des.
- Car a cualcun ci ave, plu va es donada e el va deveni rica; ma a el ci no ave, an cuanto el ave va es sutraeda.
- E lansa esta servor nonusosa a la oscuria, do on va ave larmas e dentes molente.”
- Cuando la Fio de Om veni en sua gloria, e tota la anjeles con el, el va senta sur sua trono de gloria,
- e tota la nasiones va asembla ante el. E el va separa los de lunlotra, como un pastor separa la oveas de la capras.
- El va situa la oveas a sua destra e la capras a sua sinistra.
- Alora la re va dise a los de la destra: “Veni, vos ci es bondiseda par mea Padre. Erita la rena preparada per vos de la crea de la mundo.
- Car me ia fami e vos ia dona comeda a me, me ia sidi e vos ia dona bevida a me, un stranjer e vos ia bonveni me,
- nuda e vos ia vesti me, malada e vos ia cura me, en prison e vos ia visita me.”
- Alora la virtuosas va responde el e dise: ‘Senior, cuando nos ia vide tu faminte e ia dona comeda a tu, o sidinte e nos ia dona bevida a tu?
- Cuando nos ia vide un stranjer e nos ia bonveni tu, o nuda e nos ia vesti tu?
- Cuando nos ia vide tu malada o en prison, e ia visita tu?”
- E la re va responde los: “Amen, me dise a vos, cualce cosa cual vos ia fa per la plu peti de mea frates, vos ia fa lo per me.”
- Alora, el va dise a los de sua destra: “Parti de me, vos maldisedas, a la foco eterna preparada per la diablo e sua anjeles.
- Car me ia fami e vos ia dona no comeda a me, me ia sidi e vos ia dona no bevida a me,
- un stranjer e vos no ia bonveni me, nuda e vos no ia vesti me, malada e en prison e vos no ia cura me.”
- Alora, los va responde e dise: “Senior, cuando nos ia vide tu faminte o sidinte, o un stranjer o nuda o malada o en prison e nos no ia lejeri tu?”
- El va responde los: “Amen, me dise a vos, cualce cosa cual vos no ia fa per un de la plu peti de mea frates, vos no ia fa lo per me.”
- E los va vade a puni eterna, ma la virtuosas va vade a vive eterna.
