BIBLIA
Atesta Vea —
Jenese ·
Esodo ·
Levitico ·
Numeros ·
Deuteronomio ·
Joxua ·
Judores ·
Rut ·
Samuel ·
Res ·
Cronicas ·
Ezra ·
Nehemia ·
Ester ·
Tobi ·
Judita ·
Macabeos ·
Job ·
Salmos ·
Proverbos ·
Eclesiaste ·
Canta de Cantas ·
Sajia ·
Sirac ·
Isaia ·
Jeremia ·
Lamentas ·
Baruc ·
Ezeciel ·
Daniel ·
Hoxea ·
Joel ·
Amos ·
Obadia ·
Jona ·
Mica ·
Nahum ·
Habacuc ·
Sefania ·
Hagai ·
Zecaria ·
Malaci
Atesta Nova —
Mateo ·
Marco ·
Lucas ·
Joan ·
Atas ·
Romanes ·
1 Corintianes ·
2 ·
Galatianes ·
Efesianes ·
Filipianes ·
Colosianes ·
1 Tesalonianes ·
2 ·
1 Timoteo ·
2 ·
Tito ·
Filemon ·
Ivris ·
Jacobo ·
1 Petro ·
2 ·
1 Joan ·
2 ·
3 ·
Juda ·
Apocalise
Capitol 22
- Denova Jesus ia responde a los parlante en parabolas e disente,
- “La rena de sielo pote es comparada a un re ci ia dona un banceta de sposi per sua fio.
- El ia envia sua servores per avisa la invitadas, ma estas no ia vole veni.
- A un ves du el ia envia sua servores disente: ‘Dise a la invitadas: “Mea banceta es preparada, me ia mata mea bovetas e mea boves la plu bon, e tota es pronto; veni a la banceta.”’
- Algas ia iniora la invita e ia vade a via, un a sua cultiveria, otras a sua negosia.
- La resta ia prende la servores, ia maltrata los, e ia mata los.
- La re ia es colerida e ia envia sua soldatos, ia destrui la matores e ia arde la site.
- Alora, el ia dise a sua servores, ‘La banceta es preparada, ma los ci me ia invita no ia merita lo.
- Vade a la vias xef e invita cualcun ci vos trova.’
- La servores ia vade a la vias e ia asembla tota los ci los trova, bones e males, e la sala ia es plenida con invitadas.
- Ma cuando la re ia veni per encontra la invitadas, el ia vide un om ci no porta vestes de festa.
- El ia dise a el: ‘Mea ami, como tu ia veni asi sin tua vestes de festa?’ Ma el ia resta silente.
- Alora la re ia dise a la invitadas: ‘Lia sua manos e pedes e lansa el a la oscuria esterna, do on va ave ululas e moles de dentes.’
- Multes es invitada, ma picos es elejeda.”
- Alora la fariseos ia vade e ia conspira como trapi el en sua parla.
- Los ia envia sua disiplos a el, con la herodianes, disente: “Mestre, nos sabe ce tu es un om onesta e ce tu ensenia la via de Dio seguente veria. E tu es consernada par la opina de nun, car tu no regarda la state de la person.
- Dise a nos, alora, cua es tua opina: Esce lo es permeteda ce on paia la imposta a Cesar o no?”
- Conosente lor malvole, Jesus ia dise: “Perce vos proba me, ipocritas?
- Mostra a me la moneta con cual vos paia la imposta?” Alora los ia mostra a el un moneta roman.
- El ia dise a los: “De ci es esta imaje e esta enscrive?”
- Los ia responde: “De Cesar.” Jesus ia dise a los: “Alora paia a Cesar lo cual parteni a Cesar e a Dio lo cual parteni a Dio.”
- Cuando los ia oia esta, los ia es stonada e los ia parti abandonante el.
- En acel dia la saduseos ia prosimi a el, disente ce on ave no revive. Los ia demanda esta a el,
- disente: “Mestre, Moxe ia dise: ‘Si un om mori sin enfantes, sua frate debe sposi sua sposa e ave desendentes con el.’
- Alora, on ia ave sete frates entre nos. La prima ia sposi e ia mori sin desendentes e ia lasa sua sposa a sua frate.
- La mesma ia aveni con la du e la tre, e tal asta la sete.
- A fini la fem ia mori.
- Aora cuando los va revive, de ci va es la sposa si el ia sposi tota?”
- Jesus ia responde los: “Vos es malgidada car vos conose no la scrivedas, no la potia de Dio.
- En la revive, omes e femes no va sposi, ma tota va es como la anjeles en sielo.
- E consernante la revive de la mores, esce vos no ia leje lo cual ia es diseda a vos par Dio:
- ‘Me es la Dio de Abraham, la Dio de Isaac e la Dio de Jacob’? El no es la Dio de la mores ma de la viventes.”
- Cuando la folas ia escuta esta, los ia es stonada par sua ensenia.
- Cuando la fariseos ia escuta ce el ia silenti la fariseos, los ia asembla
- e un de los, ci ia es un erudita de la lege, ia proba el demandante:
- “Mestre, cual comanda en la lege es la plu grande?”
- El ia dise a el: “Tu debe ama la Senior, tua Dio, con tota tua cor, con tota tua spirito e con tota tua mente.
- Esta es la comanda la plu grande.
- La numero du es simil: Tu debe ama tua visina como tu mesma.
- La lege intera e la profetas depende de esta tu comandas.”
- Cuando la fariseos ia asembla, Jesus ia demanda los:
- “Cual vos pensa sur la Maxia? De ci el es la fio?” Los ia responde: “De David.”
- El ia dise: “Como, alora, David pote nomi el ‘Senior’, inspirada par la Spirito cuando el dise:
- ‘La Senior ia dise a mea Senior: “Senta a mea mano destra asta ce me pone tua enemis a su tua pedes”’?
- Si David nomi el ‘Senior’, como el pote es sua fio?”
- Nun ia pote responde e de acel dia nun ia osa demanda plu a el.
