Capitol 13

1. En acel dia, Jesus ia vade estra la casa e ia senta a lado de la mar.
2. Folas tan grande ia asembla sirca el ce el ia entra a un barco e ia senta, e la fola intera ia sta longo la costa.
3. E el ia parla a los en parabolas disente: “Un semor ia sorti per semi.
4. E en cuando el ia semi, alga semes ia cade sur la rueta, e la avias ia veni e ia come los.
5. Alga ia cade sur tera rocosa, do los ia ave pico solo de tera. Los ia crese direta car la solo no ia es profonda,
6. e cuando la sol ia leva, lo ia es negrida e los ia seci par manca de radises.
7. Alga semes ia cade entre spinas, e la spinas ia crese e ia sofoca los.
8. Ma alga semes ia cada sur tera rica, e los ia produi frutas, sentuple o sesdesuple o tredesuple.
9. Cualcun ci ave oreas debe oia.”
10. La disiplos ia prosimi a el e ia dise: “Perce tu parla a los en parabolas?”
11. El ia responde a los: “Car conose de la misterios de la rena de sielo ia es donada a vos, ma a los no ia es donada.
12. Car a el ci ave plu va es donada e el va es rica; ma a el ci no ave, an lo cual el ave va es sutraeda de el.
13. Esta es la causa par cual me parla en parabolas a los, car “los regarda ma no vide e oia ma no escuta, no comprende.”
14. La predise de Isaia ia es completida en los, cual dise:
    “Vos va oia ma vos no va comprende,
    vos va regarda ma vos no va vide.
15. La cor de esta popla es dur,
    los oia apena con sua oreas,
    los ia clui sua oios.
    Los no vole vide con sua oios,
    no vole oia con sua oreas, no vole comprende con sua cores.
    Par esta los no va converti
    e me no va sani los.”
16. “Ma vosa oios es bondiseda, car los vide, e vosa oreas, car los oia!”
17. Me dise a vos, multe profetas e persones santa ia anela vide lo cual vos vide, ma los no ia vide lo, e los ia anela oia lo cual vos oia, ma los no oia lo.
18. Oia aora la parabola de la semor.
19. La seme semida sur la via es el ci oia la parola de la rena sin comprende lo, e la Malvolente veni e fura lo cual ia es semida en sua cor.
20. La seme semida sur la solo rocosa es el ci escuta la parola e reseta lo direta con joia.
21. Ma lo no ave radis e dura sola tra alga tempo. Alora alga angusa o persegue veni par causa de la parola, e lo separa direta.
22. La semes semida entre spinas es el ci oia la parola, ma la angusa mundal e la tenta de ricias sofoca la parola e lo no fruti.
23. Ma la seme semida sur solo rica es el ci oia la parola e comprende lo, ci fruti vera e furni sentuple o sesdesuple o tredesuple.”
24. El ia proposa un otra parabola a los. “La rena de la sielos pote es comparada a un om ci ia semi bon semes en sua campo.
25. En cuando totas ia dormi sua enemi ia veni e ia semi malerbas entre la trigo, e ia vade a via.
26. Cuando la granos ia crese e ia fruti, la malerbas ia apare ance.
27. La sclavos de la proprior ia vade a el e ia dise: “Mestre, esce tu no ia semi bon semes en tua campo? De do veni la malerbas?”
28. El ia responde: “Un enemi ia fa esta.” Sua sclavos ia dise a el: “Esce tu vole ce nos vade e desmalerbi los?”
29. El ia respode: “No, si vos desmalerbi, vos ta pote desplanta la trigo con los.
30. Lasa ce los crese en junta asta la recolie; alora en la tempo de recolie me va dise a la recoliores: ‘Colie prima la malerbas e faxi los per arde; ma junta la trigo en mea graneria.’”
31. El ia proposa un otra parabola a los: “La rena de la sielos es como un seme de mostarda cual un person ia prende e ia semi en un campo.
32. Lo es la plu peti de tota la semes. An tal, cuando lo crese completa, lo es la plu grande de la plantas. Lo deveni un arboreta grande, e la ‘avias de la sielo veni e abita en sua ramos.’”
33. El ia dise un otra parabola a los: “La rena de la sielos es como la fermentante nural cual un fem ia prende e ia misca con tre mesuras de farina de trigo asta cuando tota ia es fermentada.”
34. Jesus ia dise tota esta cosas a la folas en parolas. El ia parla a los sola en parabolas,
35. per reali lo cual ia es diseda tra la profeta:
    “Me va abri mea boca en parabolas,
    me va anunsia lo cual ia es ascondeda de la crea de la mundo.”
36. Alora, enviante la fola a via, el ia vade a la casa. Sua disiplos ia prosimi a el e ia dise: “Esplica a nos la parabola de la malerbas en la campo.”
37. El ia responde: “El ci ia semi bon semes es la Fio de la Om,
38. la campo es la mundo, la bon semes es la fios de la rena. La malerbas es la fios de la malvolente,
39. e la enemi ci ia semi los es la diablo. La recolie es la fini de la eda e la recoliores es la anjeles.
40. Como la malerbas es recolieda e ardeda con foco, tal lo va es a fini de la eda.
41. La Fio de la Om va envia sua anjeles, e los va colie de la rena tota cual causa peca e tota ci fa mal.
42. Los va lansa los a un fornon focosa, do on va ave plu ca larmas e dentes molente.
43. Alora la virtuosas va brilia como la sol en la rena de sua Padre. Cualcun ci ave oreas ta debe oia.
44. La rena de la sielos es como un tesoro enterada en un campo, cual un person ia trova e ia asconde denova, e alora joiosa, el ia vade per vende tota cual el ave e ia compra acel campo.
45. Denova, la rena de sielo es como un mercator xercante perlas valuada.
46. Cuando el trova un perla de custa grande, el vade per vende tota cual el ave e compra lo.
47. Denova, la rena de sielo es como un rede lansada a la mar, cual catura pexes de tota tipos.
48. Cuando lo es plen, los tira lo a tera e pone la bon pexes en sestos. La males es lansada a via.
49. Tal lo va es a la fini de la eda. La anjeles va sorti e separa la malvolentes de la virtuosas
50. e lansa los a la forno focosa, do on va ave ululas e moles de dentes.
51. Esce vos comprende tota esta cosas?” Los ia responde: “Si.”
52. E el ia responde: “Alora cada scriviste ci ia es instruida en la rena de la sielo es como la proprior de un casa ci trae de sua reteneria la novas e la veas.”
53. Cuando Jesus ia fini esta parabolas, el ia vade a via de ala.
54. El ia veni a sua loca nativa e ia ensenia a la popla en sua sinagoga. Los ia es stonada e ia dise: “De do veni tal sajia e atas potiosa?
55. Esce el no es la fio de la carpentor? Esce sua madre no es nomida Maria e sua frates Jacob, Joseph, Simon, e Judas?
56. Esce sua sores no es tota con nos? Do esta om ia oteni tota esta?”
57. E los ia coleri contra el. Ma Jesus ia dise a los: “Un profeta no es sin onora estra en sua loca nativa e en sua casa propre.”
58. E el no ia fa ala multe atas potiosa par causa de sua manca de fida.