BIBLIA
Atesta Vea —
Jenese ·
Esodo ·
Levitico ·
Numeros ·
Deuteronomio ·
Joxua ·
Judores ·
Rut ·
Samuel ·
Res ·
Cronicas ·
Ezra ·
Nehemia ·
Ester ·
Tobi ·
Judita ·
Macabeos ·
Job ·
Salmos ·
Proverbos ·
Eclesiaste ·
Canta de Cantas ·
Sajia ·
Sirac ·
Isaia ·
Jeremia ·
Lamentas ·
Baruc ·
Ezeciel ·
Daniel ·
Hoxea ·
Joel ·
Amos ·
Obadia ·
Jona ·
Mica ·
Nahum ·
Habacuc ·
Sefania ·
Hagai ·
Zecaria ·
Malaci
Atesta Nova —
Mateo ·
Marco ·
Lucas ·
Joan ·
Atas ·
Romanes ·
1 Corintianes ·
2 ·
Galatianes ·
Efesianes ·
Filipianes ·
Colosianes ·
1 Tesalonianes ·
2 ·
1 Timoteo ·
2 ·
Tito ·
Filemon ·
Ivris ·
Jacobo ·
1 Petro ·
2 ·
1 Joan ·
2 ·
3 ·
Juda ·
Apocalise
Capitol 17
- Pos ses dias Jesus ia prende Pedro, Jacobo e Joan sua frate e ia gida los a la apico de un monte.
- E el ia muta ante los, sua fas ia brilia como la sol e sua vestes ia deveni blanca como lus.
- E regarda, Moses e Elija ia apare a los, conversante con el.
- Alora Pedro ia responde a Jesus: “Senior, lo es bon ce nos es asi. Si tu desira, me va pone tre tendas asi, un per tu, otra per Moses e otra per Elija.
- En cuando el ia es ancora parlante, regarda, un nube briliante ia ombri sur los, alora de la nube un vose ia dise: “Esta es mea Fio amada, con ci me es plaseda; escuta el.”
- Cuando la disiplos ia escuta esta, los ia proni e los ia es multe temosa.
- Ma Jesus ia veni e ia toca los, disente: “Leva e no teme.”
- E cuando la disiplos ia leva sua oios, los ia vide sola Jesus.
- En cuando los ia es desendente de la monte, Jesus ia dise a los: “No nara la vide a nun ante ce la Fio de la Om va revive de moria.”
- Alora la disiplos ia demanda a el: “Perce la scrivistes dise ce Elija debe veni prima?”
- El ia responde: “Vera, Elija va veni e restora tota cosas;
- ma me dise a vos ce Elija ia veni ja, e on no ia reconose el, ma on ia fa a el cualce cosa cual ia plase. Donce la Fio de la Om va ance sufri en sua manos.”
- Alora la disiplos ia comprende ce el ia parla sur Joan la Batiste.
- Cuando los ia veni a la fola. un om ia prosimi, ia proni ante el,
- e ia dise: “Senior, compatia mea fio, car el es demente e sufri grave; frecuente el cade en foco, e frecuente en acua.
- Me ia trae el a tua disiplos, ma los no ia pote sani el.”
- Jesus ia responde: “O jenera nonfidosa e pervertida, tra cuanto tempo me va tolera tu? Trae el asi a me.
- Jesus ia reproxa el e la demon ia sorti de el e de acel ora la xico ia es sanida.
- Alora la disiplos ia prosimi privata a Jesus e ia dise: “Perce nos no ia pote espulsa el?”
- El ia dise a los: “Par causa de vosa poca fida.” Amen, me dise a vos, si vos ave la fida de la grandia de un seme de mostarda, vos va dise a esta monte, ‘Move de asi a ala’ e lo va move. No cosa va es nonposible per vos.”
- “Ma esta tipo no sorti estra tra prea e juna.”
- En cuando los ia asembla en Galilea, Jesus ia dise a los: “La Fio de la Om va es traeda a la omes,
- e los va mata el, e el va revive a la dia tre.” E los ia es inondada con tristia.
- Cuando los ia veni a Capernaum, la coliores de imposta de la tempo ia prosimi a Pedro e ia dise: “Esce tua Mestre no paia la impostas de la templo?”
- “Si,” el ia dise. Cuando el ia veni a la casa, ante ce el ia ave tempo per parla, Jesus ia demanda el: “Cua es tua opina, Simon? De ci la res de la tera prende peajes e impostas? De sua fios o de stranjeres?
- Cuando el ia dise: “De stranjeres,” Jesus ia dise a el: “Alora la fios es esenta.”
- Ma afin nos no ofende los, vade a la mar, cade un onca, e prende la pex cual sorti prima. Abri sua boca e tu va trova un mone de cual sua valua es la duple de la imposta de la templo. Dona lo a los per me e per tu.”
