Capitol 21

1. Cuando los ia es prosima a Jerusalen e ia veni a Betfage
2. en la Monte de Olivos, Jesus ia envia du disiplos disente a los: “Vade a la vileta oposante vos, e direta vos va trova un asino liada, e un cavaleta con el. Deslia los e trae los asi a me. E en caso ce algun dise cualce cosa a vos, responde: ‘La Mestre nesesa lo e el va reenvia lo direta.’” Esta ia aveni afin lo cual ia es diseda par la profetas es completida:
3. “Dise a la fia Sion, ‘Regarda, tua re veni a tu, umil e montante un asino, e un cavaleta, un bestia de carga.”
4. La disiplos ia vade e los ia fa lo cual Jesus ia comanda de los.
5. Los ia trae la asino e la cavaleta e ia pone sua capas sur los, e el ia senti sur los.
6. La fola grande ia estende sua capas sur la rua, en cuando otras ia talia ramos de la arbores e ia covre la rua con los.
7. La fola presedente el e lo seguente el ia comensa cria disente: “Hosanna al fio de David; bondiseda es el ci veni en la nom de la Senior; hosanna en la plu alta.”
8. E cuando el ia entra a Jerusalem tota la site ia secute e ia demanda: “Ci es este?”
9. E la fola ia responde: “Esta es Jesus la profeta, de Nazaret en Galilea.”
10. Jesus ia entra a la area de la templo e ia espulsa los ci ia vende e ia compra ala. El ia inversa la tables de la intercambiores e la sejas de los ci ia es vendente pijones.
11. E el ia dise a los: “Lo es scriveda: ‘Mea casa debe es un casa de prea’, ma vos ia converti lo a un cava de furores.”
12. La siecas e la coxeantes ia prosimi a el en la area de la templo e el ia sani los.
13. Cuando la pretes xef e la scrivistes ia vide la cosas stonante cual el ia es fante, e la enfantes criante en la area de la templo “Hosanna a la fio de David”, los ia es iritada
14. e ia dise a el: “Esce tu oia cua los es disente?” Jesus ia dise a los: “Si, esce vos ia leje nunca la testo ‘En la boca de la enfantes e de la suckling tu ia pone tua lodas’?”
15. E abandonante los, el ia sorti de la site a Betania, e el ia resta ala en la note.
16. Cuando el ia es reveninte a la site en la matina, el ia avese fame.
17. Vidente un figo a lado de via, el ia prosimi a lo, ma el ia trova sola folias. E el ia dise a lo: “Ta ce no fruta veni de tu denova.” E direta la figo ia seci.
18. Cuando la disiplos ia vide esta, los ia mervelia e ia dise: “Como lo ia aveni ce la figo ia seci direta?”
19. Jesus ia responde a los: “Amen, me dise a vos, si vos ave fida e no vasila, vos va fa no sola lo cual ia es fada a la figo, ma an si vos dise a esta monte: ‘Es levada e lansada en la mar’, lo va es fada.
20. Cualce cosa cual vos demanda en prea con fida, vos va reseta lo.”
21. Cuando los ia ariva a la area de la templo, la pretes xef e la veas de la popla ia prosimi a el cuando el ia es enseniante, e ia dise: “Par la autoria de ci tu fa esta cosas? Ci ia dona a tu esta autoria?”
22. Jesus ia responde a los: “Me va demanda ance a vos,
23. e si vos responde lo a me, alora me va dise a vos par cual autoria me fa esta cosas.
24. De do la batiza de Joan ia veni? Lo ia es de orijina sielal o umana?” Los ia discute esta entre se e ia dise: “Si nos dise ‘De orijina sielal’, el va dise a nos: ‘Alora perce vos no ia crede el?’
25. Ma si nos dise: ‘De orijina umana’, nos teme la popla, car los ia regarda Joan como un profeta.”
26. Alora los ia responde a Jesus: “Nos no sabe.” El mesma ia dise a los: “Me ance no va dise a vos par cual autoria me fa esta cosas.
27. Cua es vosa opina? Un om ave du fios. El ia veni a la prima e ia dise: ‘Fio, sorti e labora en la viteria oji.’
28. El ia responde: ‘Me no vole’, ma a pos el ia cambia sua opina e ia vade.
29. La om ia veni a la otra fio e ia dona a el la mesma comanda. El ia responde: ‘Si, senior’, ma el no ia vade.
30. Cual de la du ia fa la vole de sua padre?” Los ia responde: “La prima.” Jesus ia dise a los: “Amen, me dise a vos, coliores de impostas e prostituidas va entra a la rena de la sielo ante vos.
31. Cuando Joan ia veni a vos per abri la via de virtua, vos no ia crede el; ma la coliores de impostas e la prostituidas ia crede el. Vos, an si los ia vide lo, vos no ia cambia vosa opina a pos e ia crede el.
32. Escuta un otra parabola: On ia ave un imobilor ci ia planta un viteria, el ia sepi lo a sirca, el ia escava un presador de vino e ia construi un tore. Alora el ia ofre lo a luores e ia vade en un viaja.
33. Cuando la anio de recolie ia prosimi, el ia envia sua servores
34. a sua luores per oteni sua frutas.
35. Ma la cultivores ia saisi la servores e los ia bate un, ia mata un otra e ia lansa petras a la otra.
36. Denova el ia envia otra servores, multe plu numerosa ca la primas, ma los ia trata los en la mesma modo.
37. A fini, el ia envia sua fio a los, pensante: ‘Los va respeta mea fio.’
38. Ma cuando la luores ia vide la fio, los ia dise mutua: ‘Esta es la eritor. Nos va mata el e oteni sua erita.’
39. Los ia saisi el, ia espulsa el de la viteria e ia mata el.
40. Cua la proprior va fa a acel luores cuando el veni?”
41. Los ia responde: “El va fa ce acel omes misera mori e va ofre la viteria a otra luores ci va dona a el la frutas en la tempo conveninte.”
42. Jesus ia dise a los: “Esce vos ia leje nunca en la Scrivedas Santa: ‘La petra cual la construores ia rejeta deveni la petra de angulo; lo ia es fada par la Senior, e lo es stonante en nosa oios’?
43. Alora, me dise a vos, la rena de Dio va es sutraeda de vos e donada a un popla ci va produi sua frutas.
44. El ci cade sur esta petra va es rompeda e lo va destrui cualcun sur ci lo va cade.”
45. Cuando la pretes xef e la fariseos ia escuta esta parabolas, los ia sabe ce el parla sur los.
46. E an si los ia es atentante aresta el, los ia teme la folas, car los ia vide el como un profeta.