Capitol 27

1. Cuando lo ia matini, tota la pretes xef e la veas de la popla ia discute como esecuta Jesus.
2. Los ia lia el, porta el a via e ia trae el a Pilato, la governor.
3. Alora Judas, sua trador, pos vide ce Jesus ia es condenada, ia regrete profonda lo cual el ia fa ja. El ia redona la tredes monetas de arjento a la pretes alta e la veas,
4. disente: “Me ia peca tradinte sangue inosente.” Los ia dise: “Como lo conserna nos? Lo es tua conserna.”
5. Alora el, lansante la mone a la templo, ia sorti e ia pende se.
6. La pretes xef ia asembla la mone, ma los ia dise: “Lo no es legal ce on depone esta en la tesoro de la templo, car lo es la custa de sangue.”
7. A pos consulta, los ia usa lo per compra un campo, nomida “campo de la vasor” per entera stranjeres.
8. Par esta causa, acel campo es an oji nomida Campo de Sangue.
9. Alora lo ia es completida, lo cual ia es diseda tra Jeremia la profeta: “E los ia prende tredes monetas de arjento, la valua de un om con un custa en sua testa, un custa donada par alga ivris,
10. e los ia paia lo per la campo de la vasor, tal como la Senior ia comanda me.”
11. Alora Jesus ia sta ante la governor, e el ia interoga el: “Esce tu es la re de la iudis?” Jesus ia dise: “Tu ia dise lo.”
12. E cuando el ia es acusada par la pretes xef e la veas, el no ia responde.
13. Alora Pilato ia dise a el: “Esce tu no oia cuanto cosas los atesta contra tu?”
14. Ma el no ia responde a sua demandas e esta ia lasa la governor multe stonada.
15. Aora en la aveni de la festa la governor ia abitua a libri a la fola un prisonida cual los desira.
16. E en acel tempo los ia ave un prisonida notable nomida Barabas.
17. Donce cuando los ia asembla ja, Pilato ia dise a los: “Vos vole ce me libri ci a vos, Barabas o Jesus nomida Maxia?”
18. Car el ia sabe ce el ia es traeda par causa de invia.
19. En cuando el ia es ancora sentante sur la banca de judi, sua sposa ia envia a el un mesaje: “No misca con esta om justa, me ia sufri multe en un sonia oji par causa de el.”
20. La prete xef e la veas, ia convinse la fola a demanda per Barabas ma esecuta Jesus.
21. Cuando la governor ia responde a los: “Vos vole ce me libri ci de la du per vos?”, los ia responde: “Barabas!”
22. Pilato ia dise a los: “Alora cua me debe fa con Jesus nomida Maxia?” Tota de los ia dise: “Ta ce el es crusida!”
23. Ma el ia dise: “Perce? Cual mal el ia fa?” Los ia cria sola plu forte: “Ta ce es el crusida!”
24. Cuando Pilato ia vide ce el va ariva a no cosa, e ce en loca la tumulta ia aumenta, el ia prende acua e ia lava sua manos en vista de la fola, disente: “Me es inosente de la sangue de esta om. El es vosa conserna.”
25. E la popla intera ia dise: “Ta ce sua sangue cade sur nos e sur nosa enfantes.”
26. Alora el ia libri Barabas a los, ma a pos el ia fa ce Jesus es flajelida, e ia dona el per es crusida.
27. Cuando la soldatos de la governor ia porta Jesus a la tenda de jeneral, el ia asembla un desilejion completa sirca el.
28. Los ia nudi el e ia pone sur el un capa roja.
29. Pos entretexe un corona de spinas, los ia pone lo sur sua testa e un basto en sua mano destra. E proninte ante el, los ia burla el, disente: “Lodas, Re de la Iudis!”
30. Los ia sputa sur el e ia prende la basto e ia colpa el a la testa.
31. E cuando los ia burla ja el, los ia prende de el la capa, ia vesti el con sua propre vestes, e ia porta el per crusi el.
32. Cuando los ia es sortinte, los ia encontra un om de Cirene nomida Simon; los ia obliga el a porta la crus.
33. E cuando los ia veni a un loca nomida Golgota (cual sinifia la Loca de la Cranio),
34. los ia dona a Jesus vino miscada con bile. Ma cuando el ia proba lo, el ia refusa bevi lo.
35. Pos crusi el, los ia divide e ia distribui sua vestes;
36. e los ia senta e ia resta ala per vijila el.
37. E los ia pone supra el la acusa scriveda contra el: “Esta es Jesus, la Re de la Iudis.”
38. Du furores ia es crusida con el, un a sua destra e la otra a sua sinistra.
39. Persones pasante ia insulta el, negante con testa
40. e disente: “Tu ci ta destrui la templo e reconstrui el en tre dias, salva tu mesma, si tu es la Fio de Dio, e desende de la crus!”
41. Ance la pretes xef con la scrivistes e la veas ia burla el e ia dise:
42. “El ci ia salva otras, no pote salva se mesma. El es re de Israel! Ta ce el desende de la crus aora, e nos va crede a el.
43. El ia fida Dio; ta ce Dio libri el si el ama el. Car el ia dise: ‘Me es la Fio de Dio.’”
44. Ance la furores ci ia es crusida con el ia insulta el.
45. De mediadia asta la ora tre de posmedia, oscuria ia veni sur la tera intera.
46. E a la ora tre Jesus ia cria en vose forte: “Eli, Eli, lema sabactani?”, cual sinifia: “Mea Dio, mea Dio, perce tu ia abandona me?”
47. Alga oservores ci ia escuta lo ia dise: “El clama Elija.”
48. Direta un de los ia core per prende un sponja; el ia empapa lo en vino, e ponente lo sur un basto, ia dona lo a el per bevi.
49. Ma la otras ia dise: “Espeta, ta ce on vide si Elija veni per salva el.”
50. Ma Jesus ia cria denova en vose alta, e ia respira final.
51. E regarda, la velo de la santeria ia fende de supra a su. La tera ia trema, rocas ia rompe, e la corpos de multe santas mor ia revive.
52. E sortinte de sua tombas pos la mori de Jesus, los ia entra a la site santa e ia apare a multes.
53. La senturion e la omes con el, ci ia es vijilante Jesus, ia teme multe cuando los ia vide la trematera e tota cual aveni, e los ia dise: “Vera, esta ia es la Fio de Dio!”
54. On ia ave multe femes ala, regardante de distantia, ci ia segue Jesus de Galilea per servi el.
55. Entre los ia es Maria de Magdala e Maria la madre de Jacob e Josef, e la madre de la fios de Zebedeo.
56. Cuando la sera ia ariva, un om rica de Arimatea nomida Josef ia veni. El ia es un disiplo de Jesus.
57. El ia vade a Pilato e ia demanda per la corpo de Jesus; alora Pilato ia comanda ce los dona lo a el.
58. Pos prende la corpo, Josef ia envolve lo en stofa limpa de lino,
59. e ia pone lo en sua tomba nova cual el ia escava en un roca. Alora el ia rola un roca enorme a la entra de la tomba e ia parti.
60. Ma Maria de Magdala e la otra Maria ia resta sentante ala, a fas de la tomba.
61. A la dia seguente, lo cual segue la dia de prepara,
62. la pretes xef e la fariseos ia asembla ante Pilato
63. e ia dise: “On recorda ce esta impostor en cuando el ia vive ia dise: ‘A pos tre dias me va revive.’
64. Comanda ce la tomba es securida asta la dia tre, afin sua disiplos no fura la corpo e dise a la popla: ‘El ia revive de la mores.’ Esta engana ta es plu mal ca la prima.”
65. Pilato ia dise a los: “Prende gardores e securi lo tan bon como vos sabe.”
66. Donce los ia vade e ia securi la tomba, selinte la petra e lasante ala la gardores.