BIBLIA
Atesta Vea —
Jenese ·
Esodo ·
Levitico ·
Numeros ·
Deuteronomio ·
Joxua ·
Judores ·
Rut ·
Samuel ·
Res ·
Cronicas ·
Ezra ·
Nehemia ·
Ester ·
Tobi ·
Judita ·
Macabeos ·
Job ·
Salmos ·
Proverbos ·
Eclesiaste ·
Canta de Cantas ·
Sajia ·
Sirac ·
Isaia ·
Jeremia ·
Lamentas ·
Baruc ·
Ezeciel ·
Daniel ·
Hoxea ·
Joel ·
Amos ·
Obadia ·
Jona ·
Mica ·
Nahum ·
Habacuc ·
Sefania ·
Hagai ·
Zecaria ·
Malaci
Atesta Nova —
Mateo ·
Marco ·
Lucas ·
Joan ·
Atas ·
Romanes ·
1 Corintianes ·
2 ·
Galatianes ·
Efesianes ·
Filipianes ·
Colosianes ·
1 Tesalonianes ·
2 ·
1 Timoteo ·
2 ·
Tito ·
Filemon ·
Ivris ·
Jacobo ·
1 Petro ·
2 ·
1 Joan ·
2 ·
3 ·
Juda ·
Apocalise
Capitol 10
- A pos el ia clama sua du-des disiplos e ia dona los autoria sur spiritos nonpur per espulsa los e per cura tota maladias e debilias.
- La nomes de la des-du apostoles es esta: Simon nomida Pedro, e sua frate Andres, Jacobo, la fio de Zebedeo, e sua frate Joan;
- Filipe e Bartolome, Tomas e Mateo la coliores de impostas, Jacobo, fio de Alfeo, e Tadeo;
- Simon la cananean, e Judas Iscariote ci ia tradi el.
- Jesus ia envia esta des-du con esta instruis: “No va a un teritorio pagan e no entra a un site samaritan.
- Plu bon, vade a la oveas perdeda de la cada de Israel.
- En cuando vos vade, fa esta proclama: “La rena de la sielo es prosima”.
- Cura la maladas, revive la moris, puri la leprosas, espulsa demones. Sin custa vos ia reseta lo, sin custa dona vos.
- No prende oro e no arjento e no cupre;
- e no saco per vosa viaja, no un camison du, no sandales, no un basto car la laboror merita sua susta.
- En cuando vos entra en un vila o vileta, xerca un person meritante, e resta ala asta ce vos parti.
- Cuando vos entra en un casa, desira pas sur lo.
- Si acel casa merita lo, ta ce la pas veni sur lo, si no, ta ce la pas reveni a vos.
- Cualcun ci no reseta vos o escuta vosa parolas—vade estra acel casa o vila e secute la polvo de vosa pedes.
- Me dise a vos ce en la dia de la judi Sodom e Gomora va es tratada con min severia ca acel vila.
- Regarda, me envia vos como oveas en media de lupos: es astuta como serpentes e simple como pijones.
- Regarda vos contra la persones, car los va trae vos a judores e tormenta vos en sua sinagogas
- e vos va es portada ante governores e res par me como un atestor ante los e la paganes.
- Cuando los pasa vos, no preocupa vos sur como parla o cual dise. Vos va reseta en acel momento cual vos debe dise.
- Car no va es vos ci va parla, ma la Spirito de vosa Padre va parla tra vos.
- La frate va pasa sua frate per mori, e la padre sua fio, la fios va revolta contra sua jenitores e va trae los per mori.
- Vos va es odiada par tota par causa de mea nom, ma cualcun ci dura asta la fini va es salvada.
- Cuando vos es persegueda en un vila, fuji a otra. Me dise a vos, vos no va fini la sites de Israel ante la Fio de la Ome veni.
- No disiplo es sur sua ensenior, no sclavo sur sua senior.
- Es bastante per la disiplo deveni como sua ensenior, per la sclavo deveni como sua senior. Si el senior de la casa es nomida Bal Zebul, cuanto plu a aceles de sua casa!
- Donce no teme los. No cosa es ascondeda cual no va es revelada, no secreta cual no va es conoseda.
- Cual me dise a vos en oscuria, parla lo en lus, cual vos escuta xuxada, proclama lo sur la tetos.
- E no teme aceles ce pote mata la corpo ma no pote mata la spirito; plu bon, teme acel ce pote destrui ambos la spirito e la corpo en la Gehena.
- Esce on no vende du pasaros per un moneta peti? An tal nun de los cade a tera sin la conose de vosa Padre.
- An tota la capeles de vosa testa es contada.
- Donce no teme; car vos es valuada plu ca multe pasaros.
- Tota acel ce atesta me ante otras, me va atesta el ante mea Padre sielal.
- Ma cualcun ci nega me ante otras, me va nega el ante mea Padre sielal.
- No suposa ce me ia veni per trae pas a la tera. Me no ia veni per trae pas, ma per trae un spada.
- Car me ia veni per fronti
la fio “contra sua padre,
la fia contra sua madre,
e la fia par sposi contra la madre par sposi;
- e tal, la om va ave como enemis a aceles de sua casa”.
- Cualcun ci ama sua padre o sua madre plu ca me no merita me, e cualcun ci ama sua fio o fia plu ca me no merita me;
- e cualcun ci no prende sua crus e segue me no merita me.
- Cuancun ci trova sua vive, va perde lo, e cualcun ci perde sua vive par me va trova lo.
- Cualcun ci reseta vos va reseta me e cualcun ci reseta me reseta a ci ia envia me.
- Cualcun ci resta un profeta car el es un profeta va reseta la recompensa de un profeta, e cualcun ci resta un om virtuosa car el es virtuosa va reseta la recompensa de un om virtuosa.
- E cualcun ci dona sola un copa de acua fria a un de esta petis car el es mea disiplo—amen, me dise a vos, serta ce el no va perde sua recompensa.
