Capitol 20

1. “La Rena de Sielo es como un imobilor ci ia vade a leva de sol per emplea laborores per sua viteria.
2. Pos acorda con los la salario dial usual, el ia envia los a sua viteria.
3. El ia sorti denova e ia vide alga persones osiosa en la venderia,
4. e el ia dise a los: ‘Ance vos vade a mea viteria, e me va dona vos lo cual es justa.’
5. Donce los ia vade. El ia sorti denova a mediadia e a mediasera e ia fa la mesma.
6. Sortinte a la ora sinco en la posmedia, el ia trova otras a ci el ia dise: ‘Perce vos es osiosa tra tota la dia?’
7. Los ia responde: ‘Car nun ia emplea nos.’ El ia dise a los: Ance vos vade a mea viteria.’
8. Cuando lo ia es la sera, la proprior de la viteria ia dise a sua manejor de servores: ‘Clama la laborores e dona a los sua paia, comensante par la ultima e fininte par la prima.’
9. Cuando los ci ia comensa a la ora sinco en la posmedia ia veni, cada ia reseta la paia dial usual.
10. Alora cuando la prima ia veni, los ia pensa ce los va reseta plu, ma cada ia reseta la salario usual.
11. E cuando los ia reseta lo, los ia cexa contra la imobilor disente:
12. ‘Acel ultimas ia labora tra sola un ora, e tu dona a los la mesma como a nos, ci ia porta la carga de la dia e la caldia.’
13. El ia responde a un de los: ‘Mea ami, me no es frodante tu. Esce nos no ia acorda la salario dial usual?
14. Prende lo cual es vosa e vade. Cua si me vole dona a esta ultima la mesma como a tu?
15. O esce me no es libre per fa como me desira con mea propre mone? Esce vos es inviosa car me es jenerosa?’
16. Tal, la ultima va es la prima, e la prima la ultima.”
17. Cuando Jesus ia es vadente a Jerusalem, el ia vade sola con la des-du e en la via el ia dise a los:
18. “Regarda, nos es vadente a Jerusalem, e la Fio de la Om va es traeda a la pretes xef e la scrivistes, e los va condena el a mori,
19. e los va dona el a la paganes per es burlada, tormentada e crusida, e el va revive a la dia tre.”
20. Alora la madre de la fios de Zebedeo ia prosimi a el con sua fios e ia onora el, desirante demanda alga cosa a el.
21. El ia dise a el: “Cua tu desira?” El ia responde a el: “Comanda ce esta du mea fios senta, la un a tua destra e la otra a tua sinistra, en tua rena.”
22. Jesus ia responde: “Tu no sabe per cua tu es demandante. Esce tu pote bevi la copa cual me va bevi?” Los ia dise a el: “Nos pote.”
23. El ia responde: “Vera vos va bevi mea copa, ma senta a mea destra e a mea sinistra, no me pote dona esta, ma los per ci lo ia es preparada par mea Padre.”
24. Cuando la des ia oia esta, los ia es iritada contra la du frates.
25. Ma Jesus ia clama los e ia dise: “Vos sabe ce la gidores de la paganes domina los e ce la potiosas fa ce los senti sua autoria.
26. Ma lo no va es tal entre vos. Plu bon, cualcun ci desira es grande entre vos debe es vosa servor;
27. cualcun ci desira es la prima entre vos debe es vosa sclavo.
28. Tal la Fio de la Om no ia veni per es servida ma per servi e per dona sua vive como rescata per multe.”
29. Cuando los ia sorti de Jerico, un fola grande ia segue el.
30. Du omes sieca ia es sentante a lado de la via, e cuando los ia oia ce Jesus es pasante, los ia clama: “Senior, Fio de David, ave compatia per nos!”
31. La fola ia averti los a es silente, ma los ia clama plu: “Senior, Fio de David, ave compatia per nos!”
32. Jesus ia para e ia clama los e ia dise: “Cua vos vole ce me fa per vos?”
33. Los ia responde: “Senior, lasa ce nosa oios es abrida.”
34. Jesus ia ave compatia per los e ia toca sua oios. Direta, los ia reseta sua vide, e los ia segue el.