Capitol 23

1. Alora Jesus ia parla a la fola e a sua disiplos,
2. disente: “La scrivores e la fariseos ia prende sua seja sur la seja de Moxe.
3. Alora, fa e oserva tota cual los dise a vos, ma no segue lor esemplo car los predica ma no pratica.
4. Los lia cargas pesosa e pone los sur la spalas de la popla, ma los no leva un dito per move los.
5. Tota sua obras es fada per es videda. Los largi sua caxas de prea e longi sua borlas.
6. Los ama la postas de onora en bancetas, sejas de onora en sinagogas,
7. salutas en mercatos, e la saluta ‘Rabi’.
8. Ma vos no es nomida ‘Rabi’ car vos ave un sola mestre e tota de vos es frates.
9. Nomi nun sur tera vosa padre; vos ave sola un Padre en sielo.
10. No es nomida ‘Mestre’; vos ave sola un Mestre, la Maxia.
11. La plu grande entre vos debe es vosa servor.
12. Cualcun ci alti se va es umilida, ma cualcun ci umili se va es altida.
13. Mal fortuna a vos, scrivores e fariseos, ipocritas. Vos clui la rena de sielo a la omes. Vos mesma no entra e vos no permete ce los entra ci atenta entra.
14. Mal fortuna a vos, scrivores e fariseos, ipocritas. Vos devora la casas de viduas e, como escusa, vos resita preas longa. Par esta causa, vos va reseta un condena sever.
15. Mal fortuna a vos, scrivores e fariseos, ipocritas. Vos traversa mar e tera per fa un convertida, e cuando lo aveni, vos fa de el un fio de Gehena a du veses plu ca vos.
16. Mal fortuna a vos, gidores sieca, ci dise: ‘Si algun jura par la templo, lo sinifia no cosa, ma si algun jura par la oro de la templo, el es liada.’
17. Vos siecas, cual es plu grande, la oro, o la templo ci ia santi la oro?
18. E vos dise: ‘Si algun jura par la altar, lo sinifia no cosa, ma si algun jura par la ofre cual es sur la altar, el es liada.’
19. Vos siecas, cual es plu grande, la ofre o la altar cual santi la ofre?
20. El ci jura par la altar jura par lo e par lo cual es sur lo;
21. el ci jura par la templo jura par la templo e lo cual es en lo;
22. el ci jura par la sielo jura par la trono de Dio e par el ci senta sur lo.
23. Mal fortuna a vos, scrivores e fariseos, ipocritas. Vos paia desis de menta, aneto e cumin, e vos ia descura la esensales de la lege: justia, compatia e fida. Ma vos debe pratica estas sin descura la otras.
24. Gidores sieca, ci filtri la moscito e engoli la camel!
25. Mal fortuna a vos, scrivores e fariseos, ipocritas. Vos puri la esterna de la copa e la plato, ma la interna es plen de avaria e promiscuia.
26. Fariseo sieca, puri prima la interna de la copa, afin la esterna es ance purida.
27. Mal fortuna a vos, scrivores e fariseos, ipocritas. Vos es como tombas blancida, cual apare bela a esterna, ma a interna es plen de osos de mores e tota tipos de susia.
28. Tal es ance vos: a esterna vos pare virtuosa, ma a interna vos es plen de nonsinseria e nonmoralia.
29. Mal fortuna a vos, scrivores e fariseos, ipocritas. Vos construi la tombas de la profetas e orna la monumentos de la virtuosas,
30. e vos dise: ‘Si nos ia ta vive en la dias de nosa asendentes, nos no ta uni con los en versa la sangue de la profetas.’
31. Tal vos atesta contra vos mesma disente ce vos es la enfantes de los ci ia mata la profetas;
32. aora completi la mesura de vosa asendentes!
33. Vos serpentes, vos projenia de viperas, como vos pote fuji de la judi de la Gehena?
34. Alora, regarda, me envia a vos profetas e omes saja e scrivores; vos va ma mata e crusi algas de los, vos va tormenta alga de los en vosa sinagogas e persegue los de site a site,
35. tal tota la sangue versada sur la tera va veni a vos de la sangue justa de Abel asta la sangue de Zecaria, la fio de Baracia, ci vos ia mata entre la santeria e la altar.
36. Amen, me dise a vos, tota esta cosas va veni a la jenera presente.
37. Ieruxalim, Ieruxalim, tu ci mata la profetas e lansa petras a los enviada a tu, a cuanto veses me ia anela reuni tua enfantes, como un gal fema asembla sua galetas su sua alas, e tu no ia vole!
38. Regarda, tua casa va es abandonada, ruinada.
39. Me dise a vos, vos no va vide me denova ante ce vos dise: ‘Bondiseda es el ci veni en nom de la Senior.’