Capitol 9

En cuando Ricardo jua tan bela sua rol de arestor, opinas diverjente deveni espresada en un modo no multe amin en la danseria tota prosima.

“Resta asi, si tu vole, ma me no va lasa ce el es solitar contra un furor cisa perilosa,” Catarina dise desidosa.

Milan no responde pronto. El no comprende esata perce, ma esta idea no plase a el. A fini, el dise alga parolas cual el prende cuasi de la boca de Sandro, la ami encontrada a matina:

“Si nos core constante per aida el en la problem la plu simple, nunca el va deveni un om vera, el va resta un peti enfante plorosa, an si el ave un corpo plu forte ca multe otras, an si el es perfeta capas de defende se.”

Ma Catarina sola leva la spalas.

“Me vade,” el dise. “Segue tua prefere.”

Milan no pote fa otra ce vade con el.

“La construida es tota prosima,” Catarina continua dise. “lo no ta pote es plu prosima.”

Pos alga momentos los vade longo la mur de Plunova.

“Aida!” un vose sona de alga loca a su, e on oia un ruido como si algun ta bate alga cosa.

“Lo es Ricardo!” Catarina dise. “Como nos pote…?

“Veni,” Milan responde corente, “me recorda cual porte la gardores de Securix usa. A ante me ia labora ja asi per Securix. Serta el va es desecurida. Vide, nos ariva.”

Ma poca ante cuando el toca la porte, esta abri se mesma, Milan persepi con stona un individua vestida en la uniforma de Securix, e esta individua ave un fas de cual la polisia ia publici sua foto: un teroriste ci es culpable de la mori de desuples de umanas par causa de un esplode cual el ia fa aveni a media-dia, ante alga semanas, en un loca plen de paseores.

El atenta catura el, ma la otra envia a el un bate tan forte ce Milan cade sur la paseria. An tal la joven no perde tempo. Alga momentos peti sufisi afin el sta denova e core pos la teroriste.