Capitol 10

En la mesma tempo, Catarina entra a la vendetota. El susede fa lus e orienta se par segue la sonas a la loca a su, do Ricardo es encluida. Felis, la clave es en la porte. Donce Catarina abri fasil lo.

“Catarina!”

Ricardo freta a el, e prende el en se brasos. Se coraje no vade asta besa el, an si Ricardo desira forte.

    

  “Raconta! Cual ia aveni?”


  Ambos informa la otra sur la avenis la plu resente.


  “Ma el es un gardor de Securix!”


  “Tota no! Un gardor vera no ta ata tal. Cuando el ia fa cade Milan, ia es clar ce el vole fuji la plu rapida.  Un onesta no ta fa simil. El ia susede furni a se un uniforma, esata car el ia previde la risca de encontra algun como tu. El ia sabe ce acel uniforma va causa un momento de esita cual el va pote usa con susede. Ma ta ce nos no perde tempo. Acel individua es perilosa. Lo pare a me ce me ia vide ja sua fas. Par alga causa el evoca alga cosa matante. Do el es? Cual el fa? Ta ce nos vade pronto per esamina.”


  Ricardo recorda bon la loca do la ombra ia es cuando el ia descovre la individua. Los vade ala.


  “Regarda, acel… acel cosa, cual el ia fisa su la table de esposa asi… Esce acel no es… Me recorda perce se fas ia pare conoseda! El es un entre acel teroristes ci la polisia xerca. Fotos de el ia es publicida en cada loca de la pais. Esce tu no ia vide? En la stasion los es sur cada mur con la indica ce si algun pote dona a la polisia un informa gidante a la trova, el va reseta me-no-sabe-cuanto mone. Ta ce nos telefoni pronto a la polisia.”


  “Catarina, me suplica tu, no fa acel cosa!”


  La sona de la vose de Ricardo stona la xica, car el es tan temosa.


  “Ma… nos no pote lasa esta cosa… Perce no telefoni?”


  “La mea permete de labora! Lo es falsa! Si la polisia va investiga, si el va demanda a me, el va esamina serta, e…”


  “Los no va nota acel cosa, o los no va considera.”


  “Me teme. Me ia presenta me a la polisia, cuando Joan ia fura mea mone e mea bileta de viaja. Donce los sabe ja sur me.”


  “Acel es tota otra cosa. Los no…”


  “Par la nom de Dio, me suplica tu, Catarina, lasa me estra esta conserna.”


  “Bon, me va atenta no misca tu en esta, ma nos ave un encarga a fronte de la multe persones ci esta cosa pote mata. En cualce aveni, tu debe informa pronto la ofisia sentral de Securix. Tu no pote fa pare ce no cosa ia aveni.”


  Ricardo trema con tota sua corpo. El es capas de dise sola:


  “Acel es asustante, asustante!”


  E pos un momento peti:


  “Esce me va debe dise la veria? Ce me no ia defende me? Ce me ia lasa ce el enclui me a alga loca su tera? Me va perde pronto mea labora!”


  “Vide, nos pote ajusta la veria. Nos pote dise ce tu ia atenta catura el, ma ce el ia susede asconde se en la boteca, e a pos fuji, ma ce cuando tu ia vide la loca do el ia es fante alga cosa en modo ascondeda, tu ia vade per esamina, e tu ia vide esta cosa.”


  “Tu razona bon. Me teme cuasi asta mori, ma me comprende ce me no pote fa alga otra cosa. Me va vade per telefoni. Esce tu aseta veni con me? Tu presentia asta me es multe nesesada.”