Capitol 15

Felis de es solitar en esta boteca multe vasta, Catarina turi en el, oservante, interesada sur acel e sur esta cosa, an dansante a veses en la coredores cual a dia es sempre multe plen de persones movente, ma cual a esta note aspeta noncredable larga par causa de la asentia de persones.

  

  Ma aora el oia como si alga persones ta veni a en.


  “Milan! Me ia oblida Milan!” el pensa. “Serta Milan ia catura acel teroriste e ia raconta cada cosa a la polisia. Donce los veni per vide la esplodente. E me an no ia telefoni a Securix! Esta va pare suspetosa. Me debe telefoni pronto.”


  Felis, el trova rapida un telefon, e pos alga atentas el susede reseta un comunica con la esterna.


  “Securix,” un vose dormosa dise, pos cuando la tintina longa ia sesa a la fini.


  “Me es en Plunova,” Catarina dise, “me telefoni en loca de vosa gardor. El ia trova un teroriste ci la polisia xerca, e…”


  Catarina raconta tota la conserna, con la cambias cual el trova es plu presentable.


  “Bon, me va informa pronto la polisia. Resta ala. Tu va reseta serta pronto sua visita,” la ajente de Securix dise fininte.


  Oiante la ruidos, Catarina comprende ce on xerca el. El deside revade la plu discreta a la loca do la esplodente es, afin apare ala. Aora el es sur la nivel sete, e la persones ci ia entra a la vendetota, oiable, esamina nivel pos nivel, comensante de su. Catarina desende rapida la scalera asta la nivel sinco do la teroriste ia fa sua labora ascondeda, e ala el bonveni la polisiores, ci es segueda par Milan, de ci se fas mostra marcas de bate.


  “Cual tu fa asi, a note, en un boteca clavida?” un de la polisiores demanda con suspeta.


  “Me espeta vos.”


  “Como tu pote espeta nos? Nos an no ia es informada sur tu presentia!”


  Esata a esta momento, la enviador e resetador portable de radio, cual la otra polisior porta, tintina subita. La comunica no es multe oiable per la otra presentes, ma la polisior esplica pronto:


  “On demanda ce nos veni a la nivel sinco de Plunova. Ala nos es espetada par un xica, ci ave alga cosa importante per dise.”


  “Lo es strana ce nos deveni informada sola aora,” la otra dise.


  “O, vos sabe,” Catarina responde con surie, “acel ajente de Securix ia pare tan dormosa; el ia dise ce el va informa la polisia, ma me ia demanda a me esce fida el es saja. An tal el ia repete tan “nos taxe es contata la polisia, ta ce tu no ave preocupas”, ce me mesma no ia ave la coraje de clama vos ofisia.”


  “A! Securix! Comprendable!” la polisiores dise en plu o min la mesma tempo. “Aceles crede ce los es plu forte ca la polisia vera, e sempre se mesmas vole solve la problemes, an cuando los no es capas… Ma dise donce a nos perce tu ia telefoni a Securix, e cual tu fa asi.”
  

  Denova la reporta de Catarina presenta no plen la veria, ma el es credable, e esata sur la detalias cual risca produi segues multe importante. Cuando Catarina mostra la cosa cual la teroriste ia fisa su la table de esposa, la fases de la polisiores prende un espresa plu seria. Pronto la xef de polisia es informada, e pos un dura nonimajinable corta, un spesialiste de esplodentes e de cosas suspetosa ariva.