Capitol 5

“Alo, can jenerosa! Cual tu fa en esta parte de la site a un tal ora temprana? Tu aspeta es preocupada!”

“Sandro! La encontra de tu es un tal plaser! Si, me ave preocupas e me no sabe como sorti me de un situa difisil…”

“… en cual denova tu jenerosia ia pone tu, no vera?”

Milan acorda silente con la testa.

“La amis razona bon cuando los nomi tu “can jenerosa”. Cuando tu va comprende a fini ce la salva de tota la umanas no es la tua encarga? Lasa la umanas se mesma solve sua problemes…”

“Escuta, a esta ves, acel no ia es vera posible. Escuta asi la conserna.” E el raconta sur Ricardo.

“Bon, dise a el, ce aora acel basta,” Sandro proposa pos la reporta detaliosa. “Dise a el ce tre dias a tua costa es la masima, cual tu pote aseta. Tu ia fa el abita, fa el come, tu es sola un studiante, ci no es de familia rica, como el. Cual el fa en la vive?”

“Ance el es un studiante. Sur filosofia.”

“Evidente! Acel filosofistes ave la testa plen con pensas la plu strana, ma los tota no sabe ata pratical.”

“Tu razona bon, a la min sur acel Ricardo. El no ata per solve se problemes. El sola senta ala, cuasi plorante, como si un solve va veni de la sielo, sola si el va mostra ce el es sufisinte compatable.”

“Tu no fa a el un bon servi cuando tu cura el. Envia el a via. Ta ce el aprende vive!”

“Me debe dise ce me es alga coler contra me mesma. El espeta ce me deside cual el debe come, cual el debe fa. El segue constante me, a cualce loca do me vade. Acel comensa es pesosa. A esta matina, me ia susede es separada de el, sola car ia es multe temprana e el ia dormi ancora cuando me ia sorti de la abitada.”

“Tu es strana. Tu veni de dise ce tu es coler contra tu mesma. Lo pare a me ce tu ta debe es coler contra el. Cria forte a el ce acel basta aora, ce el malusa tua jenerosia, ce tu no plu tolera el!”

“Me no ta pote fa acel. Cisa lo es strana, ma me no es coler contra el. Me compati el. El es tan sin defende en la vive…”.

“Vide, tu lasa denova tua tende de compati dirije tu e gida tu a desides fol!”

“Ma, si me va rejeta el, el… el… en fato me no sabe cual el va fa, ma acel ta pote es alga cosa multe perilosa. Cisa la conserna va fini con un suiside.”

“Bon, si tal, acel va es sua deside, no el de tu. Tu no es encargada sur sua deside. Tu ia fa tua debe, an plu. Si el no es capas de vive solitar, perce el ia viaja a un pais distante? Perce el no ia atende sua mone? Tu ia aida bastante el. Envia el a via!”

“Tu ave un cor tan fria! No. Nunca me ta pote.”

“Si tal, aseta el con tota tua cor. En fato, aora, tu no aseta el, tu trova ce el es nontolerable turbante. Ma en la mesma tempo tu no rejeta el. Consernante el, tu ave du conduis cual contradise la un la otra. Donce tu sufri.”

“Tu razona bon, ma tua disedas, an si los es la plu esata, tota no aida me. Me no pote cambia me. Me no ta pote dise a el ce me refusa ave el en me casa. A otra lado me gusta multe me libria, e la presentia constante de esta lamentor gida la me nervos a… a… como dise?… a un esplode de coleria.”

“Me ia dise esata acel a tu: es coler, e el va fuji!”

“Ma alora me va es multe nonfelis. Me no va ave la coraje de regarda mea fas en la miror. Me va dise a me: tu es un mal om ci ia debe aida un nonfelis, e, en loca de fa la tu debe, tu ia forsa el a via.”

“Compatable! Tu fa cuasi ce me compati tu! Ma me no es un can jenerosa, e me va lasa tu mesma solve tu problem. Adio, Milan, me espera ce an tal tu va trova la via a la sajia.”