Capitol 18

Ricardo turna se. Algun core pos el, e el senti forte ce el nesesa es plu cauta. Ma pronto el deveni plu laxe. El ci core es la forte ci el ia libri de la armario.

“Asi tu es ja! Diablo! Tu es rapida!” acel dise.

“Tu no es min rapida,” Ricardo responde. “Cual aveni? Perce tu no ia vade per dormi pronto?”

“Si tu ta sabe cuanto me desira acel cosa! Ma los no ia lasa me. Pos cuando tu ia parti, comprendable me ia telefoni pronto a Securix. Los ia opina ce tu es ancora presente, e los ia vole presante parla con tu. Me ia dise ce me va vade pronto per dona a tu cualce comunica de los, ma ce me debe prima reporta sur acel cual ia aveni a me. Lo es importante ce los sabe a cual spesie de periles nos es esposada. Acel cosa va dona a los ideas plu sana sur la valua monal de nos labora.”

“E cual es acel informa cual tu debe dona tan presante a me?”

“Me no sabe a cual el relata. Es simple ce pronto pos tu curso, tu debe vade a la polisieria xef do on espeta tu.”

La joven trema subita. Pensas desplasente sur sua permete de labora veni nonrejetable en el.