Capitol 19

En fato, la ambiente en la poliseria xef es tota otra ca el ia espeta. On ave ala multe persones. Lo pare ce cada jornal ave ala un reportor e un fotografiste. Si on considera la voses e la aspeta de la fases, tota presentes ia bevi ja plu - e no acua - ca on ta imajina normal en un tal loca.

“Berto! Trae un plu botela!” algun cria, en cuando se visina dise dirijente oios alga straba a Ricardo: “A tua sania, xico, a tua sania!”

Algun senti ce el es obligada de presenta la carateres xef a Ricardo:

“Senior Ya, xef de la xefes de Securix. Senior eX, xef de la xefes de la polisia. Senior Ze, xef de la xefes de Plunova, la grande boteca conoseda.”

Sola alora Ricardo persepi ce ance Catarina e Milan es presente. El vade a los.

“Cual aveni? Esce los ia perde la testa?”

“Tota no. Los es felis, e los espresa sua felisia en un modo alga nondiniosa, ma no min valuosa par causa de esta. Atende. Algun pare desira parla a la presentes.”

Un om con la fas roja sta con un vitro en la mano, e par sinias nonesata de mano atenta produi alga silentia.

“Alga de atende, per favore, amis,” el dise, e lenta la ruido deveni peti.

“Me bevi a la sania de tre jovenes, par la aida de ci nos ia susede catura la individua la plu perilosa de un bande de teroristes ci nos ia es xercante de tempo longa. Acel bande, como vos sabe, es culpable de la mori de multe persones, ci ia fa no mal cosa, ma sola ia es nonfortunosa sur la loca cuando un esplode destinada per terori la popla ia aveni nonespetable en un strada plen de persones.”

“Vive, vive!” algun cria.

“Como vos ance sabe, mone ia es proposada per aceles de ci se informas esata va permete ce la polisia catura un de acel matores. Aora, en la nom de la stato, e en me opera de portavose de la polisia, me ave la plaser enorme de dona a nos tre corajoses un xece cual sinia la grasia de tota nos abitores per se ata famosa. Par la aida de los nos ia catura la vil, e con sertia nos va catura pronto la otras de la bande. Plu, par la aida de esta jovenes nos ia susede impedi ce un esplode asustante aveni en Plunova, con segues nonimajinable, ma serta dolosa per la persones ci va es en esta vendetota a la ora cuatro de la posmedia. E, comprendable, per sua familias. Amis, ta ce vos prosimi, esce vos desira un xece per la tre, o tre xeces de la mesma valua?”

   

  “A me…” Ricardo comensa.


  “… tota no importa,” Catarina dise.


  “Ta ce me pensa,” Milan dise dutante.


  “Grasias, amis,” la polisior pronunsia plu cuieta, “ma pardona, on no ave un loca sufisinte per scrive tre nomes, e cisa esta ta crea difisiles a la banco. Donce me va fa tre xeces.” Se vose forti denova per dise: “Me loda vos. Ta ce tota de nos bevi a la sania de los.”


  La vitros vacui, en cuando manos bate manos per espresa ruidosa la joia e la respeta de tota la persones a la tre jovenes.
  Un magra alta sta se.


  “Me dirije Plunova,” el dise. “E me vole mostra me grasia a la gardor de Securix, de ci se coraje ia permete ce el no aveni, la mata asustante, preparada per esta posmedia. Veni asi, joven. Un xece es asi per tu.”


  “Ma…,” el comensa, Ricardo, a ci la oios de tota es orientada, en cuando el pensa sur sua reposa no spesial corajosa en la loca de sua enclui.


  Felis, Catarina vide pronto cual el pensa. “Vade e prende, nos va comparti a pos,” el dise apena oiable en se orea. Ricardo, sempre obedinte, vade e prende.


  E alora la dirijor de Securix comensa parla:


  “Me es joiosa e felis ce tu es un membro de la familia grande de Securix,” el pronunsia seria. “Par la aida de tu, a cada loca de la pais on va parla la plu respetosa sur nosa compania. Ance me desira forte marca par un donada la plu concreta, la grasia de Securix per un de sua multe corajosas. Veni doman a me ofisia, xico, e tu va reseta alga cosa cual tu va oblida nunca. Espetante esta momento, me proposa ce tota de nos bevi plu a tu sania.”


  A un ves plu, ruidos de bevi sona tra la sala.


  “Bon, seniores,” la xef de la polisia parla a la presentes, “lo pare a me ce nos ia labora multe. Aora es multe tarda, e me no duta ce tota de vos va acorda si me va proposa ce nos vade per dormi. Lodas a nosa salvores, grasias a vos, seniores importante, e bon note a tota de vos per la poca note restante.”


  Tota de los separa se con ruido.