Capitol 13

Isolida en la boteca multe vasta, Catarina deside no telefoni pronto. Acel teroristes vole tota serta ce la esplode aveni a un alga momento de la dia cuando va ave un cuantia enorme de persones en la prosima. Los ia fa ja acel cosa a du veses, denova los fa serta acel. Par segue, lo no es presante ce on informa la polisia o la ofisia sentral de Securix. Plu tarda los va sabe sur la conserna, plu longa los va lasa ce Ricardo es calma. E la comforta de esta oveta amable debe es atendeda con un seria estrema.

En mesma tempo, sentis diverjente luta en la cor de Ricardo, en cuando el pasea de construida a construida, seguente la paper sur cual on ia descrive la serie de se taxes de note. “Me espera ce Catarina va espeta ante clama la polisia”, el pensa, temente la momento de es a fronte de un polisior, ci cisa va es interesada par sua permete de labora. Ma la pensa oposada ocupa el en mesma modo: “Aora, esta xica corajosa e cara es tota isolida en acel loca perilosa, do un esplode risca aveni de minuto a minuto. Me espera ce el va clama pronto la polisia, afin los libri rapida el de acel peril la plu asustante.”

Ance sur un otra campo la xico ave sentis resiproca contradisente. “Perce me fa esta curso sirculo? Perce me no desapare pronto? Me ta pote revade a casa par autostopa. Tal la polisia no ta sabe sur mea permete falsa de labora. Comprendable, me no ta reseta la mone de Securix, ma cuanto es la valua de mone, si on va sabe ce el ia es resetada par un remedia nononesta? Si, ma autostopa es un cosa perilosa. On pote espeta tra oras, e no auto para. E, en ajunta, me no gusta autostopa, nunca me ia autostopa, me no es un tal person ci susede en cosas simil. E plu, la paia de Securix es importante. La espeta de el es valuada. No, no. Me debe no parti. Me debe fa la plu consiensosa mea labora. En ajunta, si me ta desapare, me ta perde Catarina.”

  

  La pensa sur Catarina redona coraje a el. La problem de la permete de labora deveni peti, peti. E an si la polisia descovre sua mal ata, an si on enclui el en prison, Catarina va veni per visita el, per trae oranias a el…


  E pos acel pensa, cual fa el surie, un teror saisi denova el. Ma cual on debe fa? Cuando on senti ce on es nonpotiosa, on turna se a Dio. “Dio, mea Dio,” el dise cuieta, “me suplica tu, fa ce Catarina clama pronto la polisia, ce acel esplodente no opera en cuando el es ala sin defende.”


  Tal Ricardo vade ancora, saisida o par la teme, o par la espera, o denova tremante par teme, o repensante sur sua ama… La sentis dansa en el un dansa xef nonplasente. E el pasea ancora e ancora su la luna.