Capitol 12

“Me ave un idea,” Catarina dise. “Cisa esta va permete a tu un relata plu tarda con la polisia. O cisa an tota no.” Catarina no crede acel es posible, ma, seguente se opina, no importa parla falsa si esta pote repone alga calmia en la cor de la xico tremante.

“Un idea? Cual un?!”

“Continua tua curso de esamina como gardor. Me va telefoni a Securix ce tu ia sorti per persegue un teroriste, ma tu ia comprende ce tu no ave un posible de ateni el. Alora tu ia vide me ci tu conose e fida, e tu ia demanda a me telefoni a Securix e a la polisia, en cuando me resta asi per mostra do es acel cosa suspetada. En la mesma tempo tu continua tua curso de garda de note, sur cual tu es tarda contra tu vole. Tal los va relata sola con me, e los va estima la plu alta tu: pos un tal aventura, tua pensa prima es sola tua encarga como gardor de Securix.”

“Me debe continua, me, aora, pos tota esta? Ma me es apena capas de pensa!”

“Tan plu bon! No pensa. Sola reprende tua paper con la indica de la serie de taxes, vade a la casa do tu debe vade pos Plunova, e continua ancora.”

“Tal a la min me mesma no va debe telefoni a Securix o a la polisia! Grasias, Catarina, lo pare a me ce tu idea es bon. Esce sempre tal tu razona bon?”

“Cisa no tota sempre, ma frecuente, cara, la plu frecuente.”

En cuando Ricardo pasea a via, lejerida par causa de la posible ce se mesma no va telefoni a acel ofisias asustante, la parola “cara” resona plasente en sua oreas.