Capitol 20

“Cual el ia dona a tu?” Catarina demanda multe curiosa. “O plu esata, cuanto?”

“No cosa,” Ricardo responde. “El ia es la plu realiste. El ia dise: me no ia pote aspeta nonjenerosa a fronte de la otras, ma nos compania no es sufisinte rica per ata per tu como un senior grande, como la stato o como Plunova; me ia prepara per tu un paper cual va pote aida tu en la vive.”

“Un paper! Sola un paper! Cual es sur lo?

“Lo es scriveda, ce me ia es un colaboror de Securix con un valua spesial alta, ce en la campo de me operas me ia presalva la vive de un cuantia grande de persones par la aida de mea coraje e mea capasia de pensa rapida, e tal continuante, e tal continuante. Per un studiante de filosofia, acel va aida enorme me. On nesesa un aida grande per comprende como la parolas espresada relata con la veria. Imajina! El an parla en esta letera sur mea modo pertinente e pratical de fronti la problemes, e sur mea condui nontemosa a fas de la peril!”

  

  “Bon, acel no importa. La mone cual tu ia reseta va paia la tua viaja a retro a tua casa, e multe mone va resta ancora a tu. Como a me e a Milan, en ajunta. Un fortuna tan noncredable!”


  “Nos debe tri la mone cual me ia reseta de Plunova. Ta es nonjusta ce sola me reseta lo, par causa ce me ia es la gardor, en cuando Milan e tu ia mostra ce vos es multe plu corajosa…”


  “Bela! Tu es la plu amable. Grasias, Ricardo cara. Dise cual cosa tu vole fa aora? Esce tu va revade pronto a casa?


  “Me no sabe, me no ia deside ancora. Me no ancora es capas de aseta la realia de acel tra cual me ia vive. Lo no es fasil ce me deveni consensa ce aora me es alga rica, en cuando ante ier me ia ave esata no cosa.”


  “Bon, sempre me ave un testa pratical. Cual tu opina sur la idea ce nos fa en junta un viaja longa tra Europa e America? O esce tu prefere ata saja e no spende esta mone, con eseta de la viaja a tua pais, e conserva lo en alga loca nonperilosa como un banco per la acaso si on ta fura denova tu?”


  “No, no. Me no es un tal om seria. Me prefere multe la viaja con tu. Ma esce… esce… esce Milan va viaja con nos?”


  Catarina rie.


  “Ance tu reata como un can jenerosa! Tu sabe, no vera?, ce tal es la nometa de la ami Milan. Tu tota no desira ce el veni, ma tu senti ce tu es obligada de invita el, car el ia reseta alga bates sur la testa, en cuando tu ia senta calma en un loca sin peril a fondo de un construida. No. Milan es un xico bon e saja. El ia atenta fa ce me crede ce me es la fem en sua vive, ma me fa ce el comprende cuanto el malpensa. Me ama tu, e me vole es con tu. Per Milan me senta gusta, estima, amia, ma la ama es un tota otra cosa. La fato ce el no ia vole vade per aida tu, en cuando tu ia es isolada en Plunova con acel individua asustante, mostra ce el no ta pote es un om conveninte a me.  Me ia esplica acel cosa, e el es sufisinte saja per acorda ce lo es plu bon si el oblida pronto me, ante cuando el deveni forte liada par sua cor, ca pos multe cosas viveda en junta. El es un xico la plu bon, ma me no pote vera ama tal omes, en cuando tu… tu nesesa un camerada fem pratical, desidosa, capas de fa tota con susede, diseda corta, tu nesesa me.”


  “E tu nesesa me, no vera? Milan es multe tro autonom per tu. Tu nesesa dona, aida, servi… e ance dirije. Si, si. Me comprende aora. Tu es un can jenerosa.”


  “Ricardo!”


  Ma Ricardo sola surie. Con ama.



  EPILOGA


  Ricardo cara!


  Cisa tu reconose mea scrive, e tu stona resetante un letera de me.


  Aora me scrive per mostra ce me es consensa ce mea ensenia ia es vera instruinte.


  Me ia leje sur tu, e an me ia vide tua foto en un jornal. Tu ia deveni conoseda en la mundo intera. Sin duta la fato ce los ia manca a tu, sabes sur la arte de es cauta, ia fa ce tu aseta la rol de gardor.


  Me joia sur tua comensa multe bela en esta ocupa. Tu ia salva la pais de terorisme en tua dia prima de labora, acel es un ata famosa, multe notable. Car me conose tu, e pos cuando me ia trae mea aida peti a esta susede, me no ia pote resta silente. Me ia debe scrive a tu per espresa mea simpati e ance mea joia grande ce tu no sola ia perde no cosa par causa de me, ma an tu ia reseta multe plu. Tu es estrema plu rica aora, ca cuando tu ia comensa conose me, no vera? Lodas! E esperable tu senti alga grasia per me.


  Si a alga ves tu va pasa en la prosima de esta mea loca de abita, per favore visita me. Me no dise ce me va redona a tu cual me ia prende. Acel no ta es justa, car cada instrui seria cual gida a un susede real merita un paia, e en esta caso tu ia paia poca en compara con acel cual tu ia reseta. Ma me ta es felis de revide tu, e de oia la raconta par tu de tua aventuras de acel note.


  Cisa mea espera de revide tu es nonrealiste. Si esta es vera, me va regrete lo. Cisa an, aora cuando tu ave mea nom de familia e mea adirije, tu va vade pronto porta esta letera a la polisia, a cual tu ia reporta sur la fura. Me prende sur me esta risca, car me senti un tende forte de deveni tu ami.


  Me espera ce tu vade bon, e me desira a tu


  cada bon cosa,


  tua Joan