Capitol 3

Cisa alga consulerias aida la jovenes ci es colpada par la destina, ma no en esta pais.

“Nosa taxe no es solve la problemes de nosa sitadanes noncauta,” la ofisior de consuleria responde seca a la esplicas de Ricardo. “Nosa pais no es tan rica ce el distribui mone al tota la demandores. Si nos ta aseta esta, la informa ta sperde pronto, e la resulta ta es ce la noncautia ta deveni frecuente. “Perce nos ta atende nosa cosas,”- la viajores ta pensa, - “si nos va perde alga cosa, la consuleria va repaia a nos”. No, no. Esta no ta es tolerable.”

Ricardo senti ce el es plu e plu desperante. Un situa tan sin sorti! El ia nase en un familia sufisinte rica, ma aora acel tota no aida. An si el ta pote telefoni a sua casa… El ta pote fa esta, en fato, an sin mone, par la aida de la sistem cual posibli ce la clamada paia… Ma acel no ta es usosa: aora se jenitores viaja a alga loca en la mundo, e el tota no ta sabe, como descovre la loca do los es aora.

El comensa es fame. En situas normal, el ta pote fasil resta sin come tra multe oras. Un corpo joven e sana pote tolera multe mancas. Ma la pensa mera ce el pote furni a se no come e no leto fa ce se desira de come es spesial agu e dolosa. Car el no plu pote tolera, el deside demanda un aida a la pasores. El es presentante a los sua mano abrida, e cuasi plorante, el atenta emosia la cor de los par esplica, con poca parolas, se situa compatable. Ma nun considera seriosa el. Cisa el aspeta tro sana, en state tro bon. O el no sabe como usa sua vose per velia un compati cual ta causa un dona. Cualce es la causa, el no susede.

“Fura es la sola solve”, el pensa subita. Lo es la estate. La clima es la plu bela. Paseante sin gol esata, el ariva a un mercato esterna e vasta, do la campanianes, la un asta la otra, proposa comedas cual velia la desira de la pasores ci vade lenta. Fura de un fruta asi, de un otra ala, pare plu fasil ca cual el ia imajina a la comensa.

Ricardo es jeneral estrema onesta, e normal, con un tal mal ata nonasetable, un vose ta leva se de la fondo de la cor per espresa con autoria sua desacorda con el. Ma a esta ves, la vose es silente. La ipocritia de Joan, la fria de la polisior, la nonaida de la consuleria, e la cores de petra de la persones en la strada a ci el ia demanda, cuasi justi la fura.

Acel susedes prima coraji el continua sur la mesma via: si el va fura sufisinte mone, el va pote reviaja a sua pais distante e multe desirada. La cambieria de mone en la stasion de trenes va es perfeta per esta. Ala multe jovenes de tota paises ariva multe fatigada, cuasi dorminte, e no atende sua posesedas.

Un pensa subita, un ata pronto. Pos no longa tempo, Ricardo sta en la stasion personosa asta la cambieria de mone, do un filo longa de jovenes espeta en bon ordina, la un pos la otra.

Ricardo oserva con atende. Cuando un acaso multe oportun ariva - un xica ia pone sua portamone vidable plen en la loca la plu conveninte, e sesa atende el per turna la fas a sua cameradas ci rie ruidosa - el estende sua braso per fura lo e… …un mano pesosa e forte saisi Ricardo a la spala con autoria.