Capitol 4

“No prende lo!” - un vose dise.

Ricardo turna lenta sua testa a la parlor. Lo es un joven alta e forta, con spalas larga. Ricardo, ci no duta ce el va vide un polisior, regarda con noncrede esta xico grande, de ci sua oios surie a el.

“Perce tu ia fa acel?” el demanda.

La grande leva sua spalas.

“Me ia oserva tu tra alga tempo. Seguente tu modo de regarda, seguente tu fas, acel cual tu intende ia es clar. Ma me duta esce tu ta susede vera. Me ia deside proteje tu contra tu mesma. Aora, veni con me. Ta ce nos vade per bevi un cafe en un loca min ruidosa, do tu va pote esplica a me perce tu, ci vidable ia fura nunca, ia ave la idea strana de deveni ance vidable nononesta.”

Los sorti de la stasion e pos un pasea de alga minutos los trova un beveria calma, en cual los senta se.

Racontante tota la conserna, Ricardo pote sola difisil domina sua nesesa de plora, car el senti ce el es tan compatable. Un silentia longa segue, tra cual la grande pensa con cura.

“Bon, me no es sufisinte rica per paia a tu un bileta de reveni,” el dise a fini. “Ma me pote per poca tempo furni a tu un sala de dormi. Me abita en la casa de un seniora vea ci es asente tra tota la estate. Donce el no va oposa si me va lasa tu usa la sala peti cual el fa lua a un studiante tra la anio de studia. Me fida ce tu va manteni limpa la sala.”

“Tu salva me! Como me va pote espresa mea grasia?”

“Nos va vide acel a pos. Aora lo nesesa ce tu come, car tu ia dise ce tu es multe fame. Ma nos ancora no ia presenta la un a la otra. Mea nom es Milan. Tua nom es cual?”